ក្រុមហ៊ុននាំសាច់បង្កកចំនួន៥ ត្រូវបានស្ថាប័នពីររួមគ្នាប្រកាសបើកទ្វារប្រទេសឲ្យក្រុមហ៊ុនទាំងនេះ នាំសាច់បង្កកចូលមកទីផ្សារនៅកម្ពុជា ខណៈដែលផលិតកម្ម និងបសុសត្វនៅកម្ពុជា ក៏កំពុងថយចុះបន្តិច ។
អគ្គនាយកដ្ឋានគយ និងរដ្ឋាករកម្ពុជា និងអគ្គនាយកដ្ឋានសុខភាពសត្វ និងផលិតកម្មសត្វ បានអះអាងរួមគ្នាថា ក្រុមហ៊ុនទាំងនេះ គឺមានគុណវឌ្ឍន៍នាំចូលសាច់បង្កកបន្ថែមទៀត ។
តាមការប្រកាសចុះថ្ងៃទី១៨ ខែឧសភា ឆ្នាំ២០២៦ បានឲ្យដឹងថា នេះ គឺជាជំហ៊ានទី៧ ហើយ ដែលស្ថាប័នទាំងពីរបានបើកផ្លូវ ។
កាលពីឆ្នាំ២០២៥កន្លងទៅផលិតកម្មសត្វនៅទូទាំងប្រទេសកម្ពុជា មានជិត៦៩ លានក្បាល ពោល គឺថយចុះប្រមាណជា០,៣៨ ភាគរយ ។
កម្ពុជាមានសត្វគោ និងក្របី ប្រមាណជា៣,៤៣ លានក្បាល ជ្រូកមាន ៤,៦៥ លានក្បាល និងបក្សីចំនួន ៦០,៧៦ លានក្បាល ។
ទាក់ទងនឹងការប្រកាសបើកផ្លូវឲ្យក្រុមហ៊ុននាំចូលសត្វបង្កកបន្ថែមនេះ អ្នកចិញ្ចឹមមាន់ មួយរូបបានឲ្យដឹងថា ជាការពិតតម្រូវការសត្វផ្សេងៗមកបម្រើការហូបចុករបស់ពល រដ្ឋ គឺមានច្រើន ប៉ុន្តែយើងសំណូមពរថា សត្វណាដែលកសិករយើងចិញ្ចឹមបាន មិនគួរនាំចូលបន្តទៀតឡើយ ។
លោកបានបន្តថា ពពួកសាច់បង្កក ដែលនាំចូលគួរតែជាសាច់សត្វនានា ដែលកសិករ មិនអាចផលិត និងឆ្លើយតបតាមតម្រូវការហូបចុក ដូចជា ចៀម គ្រឿងសមុទ្រប្លែកៗ ជាដើម ៕
ចែករំលែកព័តមាននេះ