រដ្ឋមន្ត្រីក្រសួងព័ត៌មាន៖ មន្ទីរព័ត៌មានរាជធានី-ខេត្តទាំង២៥ នឹងដាក់ឱ្យដំណើរការសាកល្បងគេហទំព័ររបស់ខ្លួនចាប់ពីថ្ងៃទី១ ខែមិថុនា ឆ្នាំ២០២៦
- ភ្នំពេញ
រាជធានីភ្នំពេញ ៖ មន្ទីរព័ត៌មានរាជធានី-ខេត្តទាំង២៥ នឹងដាក់ឱ្យដំណើរការសាកល្បងគេហទំព័ររបស់ខ្លួន ចាប់ពីថ្ងៃទី១ ខែមិថុនា ឆ្នាំ២០២៦ ក្រោយពីបានរៀបចំ និងទទួលការបណ្តុះបណ្តាលមួយរយៈនេះ ក្រោមការគាំទ្ររបស់ក្រសួងប្រៃសណីយ៍ និងទូរគមនាគមន៍ ។ នេះបើតាមការបញ្ជាក់ឱ្យដឹងពីរដ្ឋមន្ត្រីក្រសួងព័ត៌មាន ។
ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌ មានបានថ្លែងក្នុងពិធីបិទវគ្គបណ្តុះបណ្តាលការប្រើប្រាស់និងការការពារគេហទំព័រ ជូនដល់មន្ត្រីរាជការនៃក្រសួងព័ត៌មាន និងមន្ទីរព័ត៌មានទាំង២៥ រាជធានីខេត្ត កាលពីថ្ងៃទី១៩ ខែឧសភា ឆ្នាំ២០២៦ នៅទីស្តីការក្រសួងព័ត៌មានថា ការរៀបចំឱ្យមានគេហទំព័រនៅតាមខេត្តមន្ទីរព័ត៌មានរាជធានី-ខេត្តទាំង២៥ មានគោលបំណង ដើម្បីឲ្យមន្ទីរព័ត៌មាន
នីមួយៗ មានកន្លែងសម្រាប់ស្តុកទុកឯកសារ ព័ត៌មាន និងទិន្នន័យរបស់ខ្លួន ហើយក៏ជាផ្នែកមួយនៃការចូលរួមកសាងប្រព័ន្ធទិន្នន័យជាតិរួម ដើម្បីភ្ជាប់ និងគ្រប់គ្រងព័ត៌មានឲ្យមានប្រសិទ្ធភាព និងងាយស្រួលប្រើប្រាស់នៅទូទាំងប្រទេស ។
ឯកឧត្តមបានបញ្ជាក់ថា ការរៀបចំគេហទំព័រ សម្រាប់មន្ទីរព័ត៌មាន គឺជាជំហានសំខាន់ក្នុងការជំរុញការប្រើប្រាស់បច្ចេកវិទ្យាឌីជីថល និងពង្រឹងប្រព័ន្ធផ្សព្វផ្សាយព័ត៌មានផ្លូវការ ឲ្យមានភាពទាន់សម័យ រហ័ស និងមានប្រសិទ្ធភាព។ គេហទំព័រទាំងនេះ នឹងក្លាយជាវេទិកាផ្លូវការសម្រាប់ផ្សព្វផ្សាយព័ត៌មាន សេចក្ដីជូនដំណឹង សកម្មភាពការងារ និងសេវាសាធារណៈផ្សេងៗដល់ប្រជាពលរដ្ឋបានយ៉ាងឆាប់រហ័ស និងទូលំទូលាយ។
ឯកឧត្តរដ្ឋមន្ត្រីបានបញ្ជាក់ទៀតថា មន្ទីរព័ត៌មានទាំងអស់ ត្រូវតែរៀបចំគេហទំព័ររឹងមាំដើម្បីបង្កើតទិន្នន័យនៅលើវេទិកាឌីជីថល ព្រោះគេហទំព័របម្រើជាឃ្លាំងទិន្នន័យសំខាន់ៗសម្រាប់ព័ត៌មានផ្លូវការ និងដើរតួនាទីយ៉ាងសំខាន់ក្នុងការធានាសុវត្ថិភាព និងភាពងាយស្រួលនៃការផ្ទុកទិន្នន័យ។
កិច្ចខិតខំប្រឹងប្រែងទាំងនេះ គឺជាផ្នែកមួយនៃកិច្ចពង្រឹង និងពង្រីកការងារឲ្យកាន់តែទូលំទូលាយ ដើម្បីធ្វើទំនើបកម្មប្រព័ន្ធព័ត៌មានរបស់ក្រសួងព័ត៌មាន និងមន្ទីរព័ត៌មានរាជធានី-ខេត្ត ក្នុងការផ្តល់ព័ត៌មានដែលទុកចិត្តបានដល់សាធារណៈជនទាន់ពេលវេលា ។
ឯកឧត្តមថា កិច្ចការដែលក្រសួងព័ត៌មានកំពុងធ្វើនេះ ក៏ជាការរួមចំណែកអនុវត្តគោលនយោបាយរដ្ឋាភិបាលឌីជីថល និងការកែទម្រង់វិស័យព័ត៌មានឲ្យស្រប តាមបរិបទបច្ចេកវិទ្យាសម័យថ្មី ដើម្បីបម្រើប្រជាពលរដ្ឋកាន់តែមានប្រសិទ្ធភាព និងទំនុកចិត្តខ្ពស់ ៕
ចែករំលែកព័តមាននេះ