ទីក្រុងប៉េកាំង៖ ភ្លៀងធ្លាក់ខ្លាំងនៅប្រទេសចិនបានផ្ដាច់ផ្ដិលជីវិតមនុស្សយ៉ាងតិច២២នាក់ ចំណែកមនុស្ស២០នាក់ទៀតបាត់ខ្លួន។ នេះបើយោងតាមការផ្សាយរបស់សារព័ត៌មានរដ្ឋចិននៅថ្ងៃនេះ។ គ្រោះមហន្តរាយធម្មជាតិ និងអាកាសធាតុប្រែប្រួលខ្លាំងបានក្លាយជារឿងធម្មតានៅប្រទេសចិន ជាពិសេសនៅរដូវក្ដៅជាពេលដែលតំបន់ខ្លះទទួលរងការធ្លាក់ភ្លៀងខ្លាំងយកតែមែនទែន។ ចំណែកតំបន់ខ្លះបែរជាក្ដៅធ្វើឱ្យដីបែកក្រហែង។
តំបន់ខ្លះទូទាំងប្រទេសចិនមានភ្លៀងធ្លាក់ខ្លាំងមិនធ្លាប់មាននារយៈពេលប៉ុន្មានថ្ងៃកន្លងទៅនេះធ្វើឱ្យសាលារៀន និងការដ្ឋានសាងសង់មួយចំនួនត្រូវផ្អាកសកម្មភាព។ អាជ្ញាធរបញ្ចេញសាច់ប្រាក់សម្រាប់ឧបត្ថម្ភទុន។ នៅខេត្តហ៊ូណាន មនុស្ស៥នាក់ត្រូវគេរាយការណ៍ថាបានស្លាប់ និង១១នាក់ទៀតបាត់ខ្លួន។ កាលពីម្សិលមិញ ទីភ្នាក់ងារព័ត៌មានស៊ីនហួរាយការណ៍ថាប្រជាជនចិនជាង៦ម៉ឺននាក់នៅក្នុងតំបន់មួយកន្លែងរងគ្រោះដោយសារការធ្លាក់ភ្លៀងខ្លាំង។
ចំណែកនៅខេត្តក្វាងស៊ី មនុស្ស១០នាក់ត្រូវគេអះអាងថាបានស្លាប់កាលពីថ្ងៃអង្គារបន្ទាប់ពីរថយន្តធុនធំមួយគ្រឿងកំពុងបើកសុខៗស្រាប់តែបោះពួយចូលទៅក្នុងទន្លេដែលជោរជន់ដោយទឹកភ្លៀង។ ខេត្តកួយចូវដែលនៅក្បែរខាងនោះក៏រងគ្រោះដោយសារការធ្លាក់ភ្លៀងខ្លាំងផងដែរ និងបណ្ដាលឱ្យមនុស្ស៤នាក់ស្លាប់ និង៥នាក់បាត់ខ្លួន។ ក្រឡេកទៅមើលតំបន់ប៉ែកខាងជើងដូចជានៅខេត្តហឺប៉ីជាដើម មនុស្ស៣នាក់ស្លាប់ និង៤នាក់បាត់ខ្លួននៅក្នុងគ្រោះទឹកជំនន់ដោយសារភ្លៀងធ្លាក់ខ្លាំងដែលធ្វើឱ្យបាក់រលំអគារ និងកាត់ផ្ដាច់ផ្លូវធ្វើដំណើរឆ្ពោះទៅកាន់ភូមិមួយចំនួន។
ដើម្បីដោះស្រាយបញ្ហាទុក្ខលំបាករបស់ប្រជាជន រដ្ឋបានផ្ដល់ប្រាក់វិភាជន៍១២០លានយ័ន្ត ឬប្រហាក់ប្រហែលនឹង១៧,៦លានដុល្លារសម្រាប់តំបន់រងគ្រោះចំនួន៥ទីតាំង។ ទឹកប្រាក់៣០លានយ័ន្តបន្ថែមទៀតផ្ដល់ទៅឱ្យគណៈអភិបាលខេត្តកួយចូវដែលមានអ្នកស្លាប់ច្រើន និងការខូចខាតទ្រព្យសម្បត្តិក៏ច្រើនផងដែរ។ មនុស្សជិត២៤០០០នាក់ត្រូវជម្លៀសខ្លួននៅខេត្តហ៊ូណាន កួយចូវ និងហឺប៉ី៕ ប្រភព៖ Vietnam Express
ចែករំលែកព័តមាននេះ