ខេត្តមណ្ឌលគិរី ៖ នារសៀលថ្ងៃទី១៩ ខែឧសភា ឆ្នាំ២០២៦ នេះ រដ្ឋបាលខេត្តមណ្ឌលគិរី បានរៀបចំកិច្ចប្រជុំបន្ទាន់មួយ ស្តីពីការបង្ក្រាប ទប់ស្កាត់…
ខេត្តមណ្ឌលគិរី ៖ នារសៀលថ្ងៃទី១៩ ខែឧសភា ឆ្នាំ២០២៦ នេះ រដ្ឋបាលខេត្តមណ្ឌលគិរី បានរៀបចំកិច្ចប្រជុំបន្ទាន់មួយ ស្តីពីការបង្ក្រាប ទប់ស្កាត់ និងប្រឆាំងបទល្មើសតាមប្រព័ន្ធបច្ចេកវិទ្យា (Online Scams) នៅក្នុងភូមិសាស្ត្រខេត្ត ដើម្បីពង្រឹងសន្តិសុខ និងសុវត្ថិភាពសង្គម។ កិច្ចប្រជុំនេះ បានប្រព្រឹត្តទៅនៅសាលប្រជុំសាលាខេត្តមណ្ឌលគិរី ក្រោមអធិបតីភាពដ៏ខ្ពង់ខ្ពស់របស់លោក ថង សាវុន អភិបាល នៃគណៈអភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្ត ។
នៅក្នុងកិច្ចប្រជុំនេះ ក៏មានការអញ្ជើញចូលរួមពីសំណាក់លោកអភិបាលរងខេត្ត, លោកឧត្តមសេនីយ៍ទោ ឡោ សុខា ស្នងការនគរបាលខេត្តមណ្ឌលគិរី ដែលបានដឹកនាំលោកស្នងការរង និងលោកនាយការិយាល័យជំនាញពាក់ព័ន្ធ ព្រមទាំងលោកឧត្តមសេនីយ៍ត្រី ហែម បូណារ៉ែល មេបញ្ជាការកងរាជអាវុធហត្ថខេត្តមណ្ឌលគិរី ដែលបានដឹកនាំកម្លាំងជំនាញអាវុធហត្ថចូលរួម ។ ក្រៅពីនេះ ក៏មានការចូលរួមពីលោកអភិបាល នៃគណៈអភិបាលក្រុង/ស្រុកទាំង៥ និងលោកអធិការនគរបាលក្រុង/ស្រុកទាំង៥ ផងដែរ ។
ការបើកកិច្ចប្រជុំ ស្តីពីការប្រឆាំងបទល្មើសបច្ចេកវិទ្យានេះ គឺធ្វើឡើងដោយអនុវត្តតាមអនុសាសន៍ និងការណែនាំដ៏ខ្ពង់ខ្ពស់ពីនាយឧត្តមសេនីយ៍ ស ថេត អគ្គស្នងការនគរបាលជាតិ ក្នុងការជម្រុញឱ្យកងកម្លាំងសមត្ថកិច្ច និងអាជ្ញាធរមូលដ្ឋាន បង្កើនការយកចិត្តទុកដាក់ និងមានវិធានការក្តៅ ក្នុងការបង្ក្រាបរាល់ល្បិចកលឆបោកតាមប្រព័ន្ធអនឡាញ គ្រប់រូបភាព ដែលកំពុងយាយីដល់សន្តិសុខស្រទាប់មហាជន ។
នាឱកាសនោះ គណៈបញ្ជាការឯកភាពរដ្ឋបាលខេត្ត បានដាក់ចេញនូវទិសដៅការងារម៉ឺងម៉ាត់ ដោយជម្រុញឱ្យកម្លាំងសមត្ថកិច្ចទាំងពីរប្រភេទ គឺទាំងកម្លាំងនគរបាលជាតិក្រោមការដឹកនាំរបស់ លោកស្នងការ និងកម្លាំងកងរាជអាវុធហត្ថក្រោមការបញ្ជាផ្ទាល់របស់ លោកមេបញ្ជាការ ត្រូវសហការគ្នាជាធ្លុងមួយ ក្នុងការស្រាវជ្រាវ ក្ដាប់ព័ត៌មាន និងបើកប្រតិបត្តិការបង្ក្រាបឱ្យបានទាន់ពេលវេលា រាល់ទីតាំង ឬសកម្មភាពសង្ស័យទាំងឡាយណាដែលពាក់ព័ន្ធនឹងបទល្មើសបច្ចេកវិទ្យា (Online Scams) ក្នុងភូមិសាស្ត្រខេត្តមណ្ឌលគិរី ដើម្បីធានាឱ្យបាននូវការការពារផលប្រយោជន៍ និងសុវត្ថិភាពជូនប្រជាពលរដ្ឋឱ្យបានដាច់ខាត ៕
ចែករំលែកព័តមាននេះ