ទីក្រុងហ្សឺណែវ៖ នាយកអង្គការសុខភាពពិភពលោក លោកតេដ្រូស កំពុងខ្វាយខ្វល់យ៉ាងខ្លាំងនៅពេលជំងឺអេបូឡាឆ្លងរាលដាលយ៉ាងឆាប់រហ័សជាងអ្វីដែលយើងគ្រប់គ្នាធ្លាប់គិតនៅសាធារណរដ្ឋប្រជាធិបតេយ្យកុងហ្គោ។ ជំងឺនេះបានឆ្លងទៅដល់ប្រទេសអ៊ូហ្កង់ដាហើយ ហើយត្រូវគេជឿជាក់ថាវាបានសម្លាប់មនុស្ស១៣១នាក់រួចជាស្រេច។ លោកតេដ្រូសកាលពីថ្ងៃអាទិត្យបានប្រកាសអំពីការកើតមានគ្រោះអាសន្នផ្នែកសុខភាពសាធារណៈ។
លោកតេដ្រូសអះអាងថាលោកប្រកាសនេះមិនមែនលំៗនោះទេ ប៉ុន្តែជាការបង្ហាញកង្វល់ដ៏ជ្រាលជ្រៅអំពីទំហំ និងល្បឿននៃការផ្ទុះជំងឺអេបូឡា។ លោកថ្លែងដូច្នេះនៅក្នុងអង្គមហាសន្និបាតនៃអង្គការសុខភាពពិភពលោក។ លោកថ្លែងបន្តទៀតថាលោកនឹងកោះប្រជុំគណៈកម្មការគ្រប់គ្រងគ្រោះអាសន្ននៃជំងឺនេះនៅថ្ងៃអង្គារដើម្បីដាក់ចេញអនុសាសន៍ថាតើត្រូវធ្វើអ្វីទៀតនៅក្នុងស្ថានភាពអាសន្ននេះ។
ការឆ្លងរាលដាលនៃជំងឺអេបូឡាត្រូវបានគេប្រកាសកាលពីថ្ងៃសុក្រសប្ដាហ៍មុននៅខេត្តអ៊ីធូរី (Ituri) នៃប្រទេសកុងហ្គោភាគឦសានដែលជាប់នឹងប្រទេសអ៊ូហ្កង់ដា និងសូដង់ខាងត្បូង។ នេះជាលើកទី១៧ដែលជំងឺអេបូឡាវាយប្រហារប្រទេសកុងហ្គោ។ មន្ត្រីរដ្ឋាភិបាលប្រទេសនេះព្រមានថាជំងឺនេះរីករាលដាលយ៉ាងឆាប់រហ័ស។ តួលេខចុងក្រោយពីរដ្ឋមន្ត្រីសុខាភិបាលកុងហ្គោបង្ហាញថាចំនួនអ្នកស្លាប់កើនឡើងដល់១៣១នាក់ និងធ្លាក់ខ្លួនឈឺ៥១៣នាក់។
ដោយសារជំងឺនេះកើតមានឡើងនៅក្នុងទីតាំងដែលពិបាកនឹងធ្វើដំណើរទៅដល់ គេអាចប្រមូលបានសំណាកត្រឹមតែបន្តិចបន្តួចប៉ុណ្ណោះដើម្បីធ្វើតេស្តនៅមន្ទីរពិសោធ។ លោកតេដ្រូសថ្លែងថារហូតមកដល់ពេលនេះ មនុស្ស៣០នាក់ត្រូវបានបញ្ជាក់អះអាងថាបានឆ្លងមេរោគអេបូឡានៅខេត្តអ៊ីធូរី។ លោកថ្លែងថាអ៊ូហ្កង់ដាក៏បានជូនដំណឹងទៅអង្គការសុខភាពពិភពលោកថាខ្លួនមានអ្នកឆ្លងជំងឺនេះ២នាក់នៅរដ្ឋធានីខាំផាឡា (Kampala)។ បន្ទាប់ពីពួកគេធ្វើដំណើរទៅប្រទេសកុងហ្គោ ហើយត្រឡប់ទៅមាតុភូមិវិញក៏ធ្លាក់ខ្លួនឈឺតែម្ដង។ ក្នុងនោះ ម្នាក់បានស្លាប់ហើយ៕ ប្រភព៖ Channel News Asia
ចែករំលែកព័តមាននេះ