ប្រទេសជប៉ុន ៖ ប្រទេសជប៉ុន និងកូរ៉េខាងត្បូង គ្រោងនឹងព្រមព្រៀងគ្នាបង្កើតក្របខ័ណ្ឌកិច្ចសហប្រតិបត្តិការស្តីពីការធានាដល់ការផ្គត់ផ្គង់ប្រេងឆៅ រួមទាំងការបង្កើតឃ្លាំងស្តុកទុកប្រេងបម្រុងរួមគ្នា។ នេះបើតាមប្រភពពី Nikkei និង Reuters…
ប្រទេសជប៉ុន ៖ ប្រទេសជប៉ុន និងកូរ៉េខាងត្បូង គ្រោងនឹងព្រមព្រៀងគ្នាបង្កើតក្របខ័ណ្ឌកិច្ចសហប្រតិបត្តិការស្តីពីការធានាដល់ការផ្គត់ផ្គង់ប្រេងឆៅ រួមទាំងការបង្កើតឃ្លាំងស្តុកទុកប្រេងបម្រុងរួមគ្នា។ នេះបើតាមប្រភពពី Nikkei និង Reuters បានចេញផ្សាយនៅថ្ងៃទី១៩ ខែឧសភា ឆ្នាំ២០២៦។
កិច្ចព្រមព្រៀងជាប្រវត្តិសាស្ត្រនេះ ធ្វើឡើងនៅក្នុងកិច្ចប្រជុំកំពូលនាថ្ងៃទី១៩ ខែឧសភា ឆ្នាំ២០២៦ រវាងនាយករដ្ឋមន្ត្រីជប៉ុន លោកស្រី Sanae Takaichi និងប្រធានាធិបតីកូរ៉េខាងត្បូង លោក Lee Jae Myung នៅក្នុងទីក្រុងអានដុង (Andong) ខេត្តក្យងសាំងខាងជើង (North Gyeongsang) ប្រទេសកូរ៉េខាងត្បូង។
តាមរបាយការណ៍ ប្រទេសទាំងពីរនឹងធ្វើការងាររួមគ្នា ដើម្បីស្វែងរកការគាំទ្រផ្នែកហិរញ្ញវត្ថុ និងបច្ចេកទេសនៅក្នុងការសាងសង់ប្រព័ន្ធស្តុកទុកប្រេងបម្រុង។ គំនិតផ្តួចផ្តើមនេះ នឹងប្រើប្រាស់ក្របខ័ណ្ឌកិច្ចសហប្រតិបត្តិការថាមពលជាមួយប្រទេសតំបន់អាស៊ីអាគ្នេយ៍ ដើម្បីជំរុញការអភិវឌ្ឍន៍វិស័យថាមពលក្នុងតំបន់ផងដែរ។
មូលហេតុពីក្រោយការសម្រេចចិត្តនេះកើតឡើង បន្ទាប់ពីវិបត្តិសង្គ្រាមមជ្ឈិមបូព៌ា ដែល កំពុងកើតឡើងនៅប្រទេសអ៊ីរ៉ង់ និងការបិទច្រកសមុទ្រហ័រមូស (Hormuz) បានធ្វើឱ្យរំខានយ៉ាងធ្ងន់ធ្ងរដល់ផ្លូវដឹកជញ្ជូនប្រេងសកល។
មូលហេតុមួយទៀត គឺការប្រែប្រួលភូមិសាស្ត្រនយោបាយសកល ដោយថ្នាក់ដឹកនាំទាំងពីរនាក់ក៏ត្រូវការផ្លាស់ប្តូរព័ត៌មាន និងវាយតម្លៃលទ្ធផលកិច្ចប្រជុំកំពូលរវាងប្រធានាធិបតីអាមេរិក លោក Donald Trump និងប្រធានាធិបតីចិន លោក Xi Jinping នៅទីក្រុងប៉េកាំង កាលពីពេលថ្មីៗនេះផងដែរ៕
ចែករំលែកព័តមាននេះ