ទីក្រុងម៉ូស្គូ៖ ប្រធានាធិបតីរុស្ស៊ី លោកពូទីន ត្រៀមបំពេញទស្សនកិច្ចនៅប្រទេសចិនរយៈពេល២ថ្ងៃនាសប្ដាហ៍ក្រោយ។ នេះបើយោងតាមការបញ្ជាក់ពីវិមានក្រឹមឡាំង។ គម្រោងទស្សនកិច្ចនេះធ្វើឡើងតែប៉ុន្មានថ្ងៃប៉ុណ្ណោះក្រោយពេលលោកត្រាំទើបតែទៅប្រទេសចិនកាលពីពេលថ្មីៗនេះ។ សេចក្ដីប្រកាសរបស់វិមានក្រឹមឡើងកើតមានឡើងមិនដល់២៤ម៉ោងទេបន្ទាប់ពីលោកត្រាំបិទបញ្ចប់ទស្សនកិច្ចជាផ្លូវការនៅប្រទេសចិន។
នៅទីក្រុងប៉េកាំង លោកត្រាំ និងលោកស៊ីជីនពីងបានពិភាក្សាអំពីបញ្ហាជាច្រើនដូចជាបញ្ហាពាណិជ្ជកម្ម និងសង្គ្រាមអ៊ីរ៉ង់ជាដើម។ នៅក្នុងការចេញសេចក្ដីថ្លែងការណ៍របស់ខ្លួន វិមានក្រឹមឡាំងអះអាងថាគម្រោងទស្សនកិច្ចរបស់លោកពូទីនលើកនេះនឹងធ្វើឡើងចាប់ពីថ្ងៃទី១៩-២០ ខែឧសភា។ គម្រោងនេះរៀបចំឡើងត្រូវគ្នានឹងខួបទី២៥ឆ្នាំនៃការបង្កើតសន្ធិសញ្ញាមិត្តភាពរវាងចិន និងរុស្ស៊ីដែលកាលពីឆ្នាំ២០០១។
វិមានក្រឹមឡាំងថ្លែងបន្តទៀតថាថ្នាក់ដឹកនាំទាំង២នឹងពិភាក្សាគ្នាអំពីទំនាក់ទំនងទ្វេភាគី និងបញ្ហាសំខាន់ៗទាំងនៅក្នុងក្របខណ្ឌតំបន់ និងអន្តរជាតិ ហើយក៏ពិភាក្សាគ្នាផងដែរអំពីកិច្ចសហប្រតិបត្តិការផ្នែកសេដ្ឋកិច្ច។ ទំនាក់ទំនងរវាងចិន និងរុស្ស៊ីកាន់តែស៊ីជម្រៅនារយៈពេលប៉ុន្មានឆ្នាំចុងក្រោយនេះ ជាពិសេស ចាប់តាំងពីសង្គ្រាមអ៊ុយក្រែនផ្ទុះឡើងកាលពីដើមឆ្នាំ២០២២។ ដោយសារសង្គ្រាមនេះ រុស្ស៊ីមិនត្រូវបានរាប់រកពីសំណាក់ក្រុមបស្ចិមប្រទេសទេ។ ដូច្នេះមានតែប្រទេសចិននេះហើយដែលជាខ្នងបង្អែកដ៏ធំមួយ។
នៅពេលលោកពូទីនបំពេញទស្សនកិច្ចនៅប្រទេសចិនកាលពីខែកញ្ញា ឆ្នាំ២០២៥ដើម្បីរំលឹកខួប៨០ឆ្នាំនៃទិវាជ័យជម្នះ លោកស៊ីជីនពីងបានស្វាគមន៍លោកយ៉ាងកក់ក្ដៅ និងហៅលោកថាជា «មិត្តសម្លាញ់ចាស់»។ ចំណែកលោកពូទីនហៅលោកស៊ីជីនពីងជា «មិត្តសម្លាញ់»។ លោកពូទីនក៏ត្រៀមធ្វើដំណើរទៅប្រទេសចិននាខែវិច្ឆិកា ឆ្នាំ២០២៦ផងដែរដើម្បីចូលរួមកិច្ចប្រជុំកំពូលអេប៉ិច (APEC) នៅទីក្រុងស៊ឹនចិន (Shenzhen)៕ ប្រភព៖ AP
ចែករំលែកព័តមាននេះ