រាជធានីភ្នំពេញ ៖ នៅថ្ងៃទី១៥ ខែឧសភា ឆ្នាំ២០២៦នេះ មានការរាយការណ៍ពីការផ្ទុះឡើងជំងឺអេបូឡា នៅប្រទេសកុងហ្គោ (DRC) ទ្វីបអាហ្វ្រិក ដែលមានករណីសង្ស័យចំនួន…
រាជធានីភ្នំពេញ ៖ នៅថ្ងៃទី១៥ ខែឧសភា ឆ្នាំ២០២៦នេះ មានការរាយការណ៍ពីការផ្ទុះឡើងជំងឺអេបូឡា នៅប្រទេសកុងហ្គោ (DRC) ទ្វីបអាហ្វ្រិក ដែលមានករណីសង្ស័យចំនួន ២៤៦ករណី និងអ្នកស្លាប់ចំនួន ៦៥នាក់ នេះបើយោងតាមនាយកដ្ឋានប្រយុទ្ធនឹងជំងឺឆ្លង CDC ។
នាយកដ្ឋានប្រយុទ្ធនឹងជំងឺឆ្លង CDC បានឲ្យដឹងថា ជំងឺ អេបូឡា ឆ្លងតាមរយៈការប៉ះពាល់ដោយផ្ទាល់ជាមួយសារធាតុសរីរាង្គរបស់អ្នកជំងឺ។ វាចេញរោគសញ្ញាជាមធ្យម ចាប់ពី៨ ទៅ១០ថ្ងៃ បន្ទាប់ពីការប៉ះពាល់អ្នកជំងឺ។ វាចេញរោគសញ្ញារួមមាន គ្រុនក្តៅ ឈឺសាច់ដុំ អស់កម្លាំង ឈឺក្បាល និងឈឺបំពង់ក និងវិវត្តិទៅជាហូរឈាមធ្ងន់ធ្ងរ និងខ្សោយតម្រងនោម និងខ្សោយសរីរាង្គដទៃទៀត។ មានវ៉ាក់សាំងចាក់ប្រភេទ Ervebo ប៉ុន្តែមិនទាន់មានឱសថព្យាបាល។ ការព្យាបាលពឹងផ្អែកលើការព្យាបាលគាំទ្រវេជ្ជសាស្ត្រ ។
ក្នុងពេលជាមួយគ្នានេះដែរ ក្រសួងសុខាភិបាលអ៊ូហ្គង់ដា បានរាយការណ៍ពីថ្ងៃសុក្រ ១៥ ឧសភា ថា ប្រទេសអ៊ូហ្គង់ដា (នៅទ្វីអាហ្វ្រិកដែរ) ក៏បានបញ្ជាក់ពីការផ្ទុះឡើង នៃជំងឺវីរុសអេបូឡា (ឆ្លងខ្លាំង) ដោយបន្ថែមថា ការផ្ទុះឡើងនេះ ពាក់ព័ន្ធនឹងពូជ Bundibugyo ។
ក្រសួងបាននិយាយបន្តទៀតថា ករណីនេះគឺជាការឆ្លងមេរោគ ដែលនាំចូលពីសាធារណរដ្ឋប្រជាធិបតេយ្យកុងហ្គោ។ អ្នកជំងឺ បានស្លាប់នៅក្នុងការថែទាំយ៉ាងយកចិត្តទុកដាក់នៅថ្ងៃទី ១៤ ខែឧសភា បន្ទាប់ពីវិវត្តទៅជារោគសញ្ញាហូរឈាម ។
នាយកដ្ឋានប្រយុទ្ធនឹងជំងឺឆ្លង CDC បញ្ជាក់ថា គ្រប់អ្នកដំណើរ ដែលធ្វើដំណើរមកពីប្រទេសខាងលើ ឬឆ្លងកាត់ប្រទេសទាំងពីរខាងលើ និងមានរោគសញ្ញា ដូចជា ៖ គ្រុនក្តៅ ឈឺសាច់ដុំ អស់កម្លាំង ឈឺក្បាល ឈឺពោះ និងឈឺបំពង់ក សូមទៅពិគ្រោះជំងឺនៅមន្ទីរពេទ្យ ឬទូរសព្ទទៅលេខ ១១៥ ៕
ចែករំលែកព័តមាននេះ