ខេត្តស្ទឹងត្រែង ៖ ក្រោយពីមានការភ្ញាក់ផ្អើល ជុំវិញករណីកម្លាំងសមត្ថកិច្ចចម្រុះ ចុះឆែកឆេរលំនៅឋានថៅកែរថយន្តដឹកទំនិញ និងតាក់ស៊ី ដ៏ល្បីឈ្មោះម្នាក់ ប្រចាំខេត្តស្ទឹងត្រែង រួចមក ក្រុមរថយន្តអាជីវកម្មនៅតំបន់ព្រំដែន…
ខេត្តស្ទឹងត្រែង ៖ ក្រោយពីមានការភ្ញាក់ផ្អើល ជុំវិញករណីកម្លាំងសមត្ថកិច្ចចម្រុះ ចុះឆែកឆេរលំនៅឋានថៅកែរថយន្តដឹកទំនិញ និងតាក់ស៊ី ដ៏ល្បីឈ្មោះម្នាក់ ប្រចាំខេត្តស្ទឹងត្រែង រួចមក ក្រុមរថយន្តអាជីវកម្មនៅតំបន់ព្រំដែន បានទម្លាយឱ្យដឹងថា ក្បួនរថយន្តខ្សែរបស់លោក ចាន់ ប៊ុនអែម តែងតែចេញ-ចូលឆ្លងកាត់ប៉ុស្តិ៍ច្រកទ្វារព្រំដែនអន្តរជាតិត្រពាំងគ្រៀល (កម្ពុជា-ឡាវ) ដោយពុំមានការត្រួតពិនិត្យល្អិតល្អន់នោះឡើយ។ ពួកគេនិយាយបែបចំអកថា លក្ខណៈពិសេសចឹងសុទ្ធតែខ្នាតប្រភេទរថយន្ត VIP ហើយ។
ប្រភពពីសមត្ថកិច្ចម្នាក់ ប្រចាំការនៅច្រកទ្វារខាងលើ ដែលសុំមិនបញ្ចេញឈ្មោះ បានបង្ហើបថា ជាទូទៅរថយន្តរបស់លោក ចាន់ ប៊ុនអែម ចំនួន៣ គ្រឿង តែងតែរត់ក្នុងមួយថ្ងៃ ២ជើង ។
សមត្ថកិច្ចដដែលបង្ហើបថា រយៈពេល ២ឆ្នាំចុងក្រោយនេះ បន្ទាប់ពីមានការផ្លាស់ប្តូរស៊េរីរថយន្តទំនើប រាល់ពេលរថយន្តនីមួយៗ មកដល់ប៉ុស្តិ៍ត្រួតពិនិត្យ គឺគ្រាន់តែបើកទ្វារក្រោយ និងទ្វារចំហៀង ដើម្បីលំអោនបំពេញកិច្ច ចំពោះមុខកាមេរ៉ាសុវត្ថិភាពរបស់ប៉ុស្តិ៍តែប៉ុណ្ណោះ ដោយពុំមានការឆែកឆេរម៉ត់ចត់នោះឡើយ ។
ឆ្លើយតបនឹងករណីនេះ ក្រុមអ្នករត់រថយន្តអាជីវកម្មដឹកទំនិញ និងភ្ញៀវទេសចរមួយចំនួន បានថ្លែងប្រាប់តាមទូរសព្ទជាបន្តបន្ទាប់ ដោយសម្តែងការមិនពេញចិត្ត ចំពោះស្តង់ដារពីរនេះថា ៖ «សម្រាប់រថយន្តរបស់ពួកខ្ញុំ ពេលដឹកទំនិញ ឬភ្ញៀវឆ្លងកាត់ គឺត្រូវសមត្ថកិច្ចរុករើ ឆែកឆេរ ស្ទើរតែគាស់តាប់ឡូឡានទៅហើយ ប៉ុន្តែសម្រាប់ក្រុមរថយន្តខ្សែបែប VIP នោះវិញ គឺមិនដែលឃើញមានការត្រួតពិនិត្យល្អិតល្អន់អីឡើយ។ ពួកខ្ញុំមិនដឹងថា គេមានខ្សែឥទ្ធិពលកម្រិតណាទេ តែលោក ចាន់ ប៊ុនអែម គាត់រកស៊ីលើទឹកដីឡាវ-ស្ទឹងត្រែង ជិតមួយជីវិតទៅហើយ ទើបតែពេលនេះមានការឆែកឆេរ ឃើញទំនិញគេចពន្ធ នៅក្នុងផ្ទះរបស់គាត់» ។
ដើម្បីធានាបាននូវតម្លាភាព និងតុល្យភាពព័ត៌មាន ក្រុមអ្នកសារព័ត៌មានបានព្យាយាមទំនាក់ទំនងសុំការបំភ្លឺពីលោក អ៊ូច មាន នាយប៉ុស្តិ៍នគរបាលអន្តរជាតិ ត្រពាំងគ្រៀល ចំនួន ៣លើក ៖ លើកទី១ នៅវេលាម៉ោង១០:៤០នាទីព្រឹក លោកបានទទួលទូរសព្ទ ប៉ុន្តែនៅពេលដឹងថា ជាអ្នកសារព័ត៌មាន លោកបានឆ្លើយថា «ជាប់រវល់» រួចក៏ផ្តាច់ទូរសព្ទទៅ។ លើកទី២ នៅវេលាម៉ោង ១១:៤២ នាទីថ្ងៃត្រង់ ក្រុមការងារបានទូរសព្ទ ចូលចំនួន ៣ដង តែពុំមានអ្នកទទួល។ លើកទី៣ នៅវេលាម៉ោង ២:០៧ នាទីរសៀល ក្រុមការងារបន្តទូរសព្ទចូល ចំនួន ២ ដងទៀត តែនៅតែពុំមានការឆ្លើយតបដដែល ។
ដោយឡែក លោក ដែង ឧត្តម ភ្នាក់ងារគយប្រចាំច្រកទ្វារព្រំដែនអន្តរជាតិ ត្រពាំងគ្រៀល ក៏មិនបានបកស្រាយបំភ្លឺអ្វីដែរ កាលពីល្ងាចថ្ងៃទី ១៦ ខែឧសភា ឆ្នាំ២០២៦នេះ។ នៅពេលក្រុមអ្នកសារព័ត៌មានចោទសួរថា ៖ «យោងតាមប្រភពពីសមត្ថកិច្ចប្រចាំការទីនោះថា រាល់ពេលរថយន្តលោក ចាន់ ប៊ុនអែម ដឹកទំនិញឆ្លងកាត់ប៉ុស្តិ៍ច្រក គឺមិនសូវ ដែលឃើញមន្ត្រីគយមកពិនិត្យនោះទេ តើនេះជាការពិតដែរឬទេ ?» ភ្លាមៗនោះ លោក ដែង ឧត្តម ក៏បានផ្តាច់ប្រព័ន្ធទូរសព្ទ តែម្តង ។
សមត្ថកិច្ចមួយរូប ស្ថិតក្នុងប្រតិបត្តិការចុះឆែកឆេរផ្ទះលោក ចាន់ ប៊ុនអែម ក្រុមហ៊ុនស្ទឹងត្រែងសេកុង អឹមផត អិចផត ឯ.ក ស្ថិតក្នុងសង្កាត់ស្ទឹងត្រែង ក្រុងស្ទឹងត្រែង កាលពីថ្ងៃទី៩ ឧសភា ២០២៦កន្លងទៅ និយាយនៅល្ងាចថ្ងៃទី១៦ ឧសភា ២០២៦នេះថា នៅពេលឆែកឆេរបានរកឃើញទំនិញគេចពន្ធ នៅលើរថយន្តទំនើបមួយគ្រឿង ហើយត្រូវរឹបអូសទាំងទំនិញទាំងរថយន្ត ៕
ចែករំលែកព័តមាននេះ