ទីក្រុងប៉េកាំង៖ នៅទីបំផុត ត្រាំទៅដល់ប្រទេសចិនហើយកាលពីប៉ុន្មាននាទីមុននេះទាំងយប់អធ្រាត្រដើម្បីត្រៀមជួបគ្នាកម្រិតកំពូលជាមួយលោកស៊ីជីនពីង។ គេរំពឹងថារបៀបវារៈសំខាន់ៗគ្មានអ្វីក្រៅពីបញ្ហាជម្លោះពាណិជ្ជកម្ម បញ្ហាតៃវ៉ាន់ និងសង្គ្រាមអ៊ីរ៉ង់នោះទេ។ ត្រាំជិះយន្តហោះអ៊ែ ហ្វស់ វាន់ (Air…
ទីក្រុងប៉េកាំង៖ នៅទីបំផុត ត្រាំទៅដល់ប្រទេសចិនហើយកាលពីប៉ុន្មាននាទីមុននេះទាំងយប់អធ្រាត្រដើម្បីត្រៀមជួបគ្នាកម្រិតកំពូលជាមួយលោកស៊ីជីនពីង។ គេរំពឹងថារបៀបវារៈសំខាន់ៗគ្មានអ្វីក្រៅពីបញ្ហាជម្លោះពាណិជ្ជកម្ម បញ្ហាតៃវ៉ាន់ និងសង្គ្រាមអ៊ីរ៉ង់នោះទេ។ ត្រាំជិះយន្តហោះអ៊ែ ហ្វស់ វាន់ (Air Force One) ទៅចុះចតនៅរដ្ឋធានីប៉េកាំងបន្ទាប់ពីហោះហើរជ្រែកអាកាសអស់រយៈពេលដ៏យូរ និងនៅលើចម្ងាយផ្លូវដ៏វែងឆ្ងាយតាំងពីទីក្រុងវ៉ាស៊ីនតោន។
ត្រាំត្រូវបានមន្ត្រីអ្នកមុខអ្នកការចិនទទួលស្វាគមន៍នៅពេលចុះចត ហើយក៏មានពិធីស្វាគមន៍ដោយកងទ័ពកិត្តិយសចិនផងដែរ។ កូនសិស្សចិនរាប់សិបនាក់ស្វាគមន៍ត្រាំដោយការគ្រវីទង់ជាតិអាមេរិកផង និងទង់ជាតិចិនផងនៅពេលលោកដើរចុះពីលើយន្តហោះ។ នេះជាលើកដំបូងនៅក្នុងរយៈពេលជិតមួយទសវត្សចុងក្រោយដែលប្រធានាធិបតីអាមេរិកបំពេញទស្សនកិច្ចនៅប្រទេសចិន ហើយក៏ជាទស្សនកិច្ចរបស់លោកត្រាំជាថ្មីម្ដងទៀតចាប់តាំងពីលោកទៅប្រទេសចិនសាមុនកាលពីឆ្នាំ២០១៧។
លើកនេះ ការអញ្ជើញដល់របស់លោកត្រាំត្រូវបានទទួលស្វាគមន៍ដោយអនុប្រធានាធិបតីចិន លោកហានសេង ដើម្បីបង្ហាញថាទស្សនកិច្ចនេះពិតជាមានសារសំខាន់។ ក្រៅពីនេះ មានឯកអគ្គរដ្ឋទូតចិនប្រចាំប្រទេសអាមេរិក និងអនុរដ្ឋមន្ត្រីការបរទេសចិនក៏អញ្ជើញដល់កន្លែងចុះយន្តហោះផងដែរ។ ទង្វើនេះផ្ទុយពីពេលកន្លងមកដែលចិនច្រើនបញ្ជូនមនុស្សកំប៉ិកកំប៉ុកទៅទទួលមន្ត្រីរដ្ឋាភិបាលអាមេរិក ឬមេដឹកនាំអាមេរិក។ សូម្បីតែនៅពេលលោកត្រាំទៅចិនកាលពីឆ្នាំ២០១៧ក៏ចិនបញ្ជូនមន្ត្រីតូចតាចតែប៉ុណ្ណោះទៅទទួល។
ទោះបីប្រធានបទ ឬរបៀបវារៈណាសំខាន់ក៏ដោយ ក៏មិនអាចប្រៀបផ្ទឹមនឹងបញ្ហាអ៊ីរ៉ង់បានឡើយ។ សង្គ្រាមអ៊ីរ៉ង់នឹងគ្របដណ្ដប់ខ្លាំងជាងគេនៅក្នុងជំនួបកំពូលរវាងថ្នាក់ដឹកនាំអាមេរិក និងចិនលើកនេះ។ នេះបើយោងតាមការប្រមើលមើលរបស់អ្នកវិភាគ។ មុនពេលចាកចេញដំណើរពីវ៉ាស៊ីនតោន លោកត្រាំថ្លែងដោយក្ដីសង្ឃឹមថានឹងបានជជែកគ្នាដ៏ពិស្ដារជាមួយលោកស៊ីជីនពីងពាក់ព័ន្ធនឹងបញ្ហាអ៊ីរ៉ង់។ អ៊ីរ៉ង់ពឹងផ្អែកទៅលើប្រទេសចិនជាអ្នកទិញប្រេងឆៅរបស់ខ្លួនច្រើនជាងគេ៕ ប្រភព៖ ឆេនណល ញូស៍ អេស៊ា (Channel News Asia)
ចែករំលែកព័តមាននេះ