រាជធានីភ្នំពេញ ៖ ទីតាំងលួចលាក់ប្រព្រឹត្តបទល្មើសឆរ បោកតាមប្រពន្ធបច្ចេកវិទ្យា (អនឡាញស្កេម) ចំនួន៤ទីតាំង នៅចំណុចបុរីមួយកន្លែង ក្នុងភូមិដំណាក់ សង្កាត់គោកឃ្លាង ខណ្ឌសែនសុខ…
រាជធានីភ្នំពេញ ៖ ទីតាំងលួចលាក់ប្រព្រឹត្តបទល្មើសឆរ បោកតាមប្រពន្ធបច្ចេកវិទ្យា (អនឡាញស្កេម) ចំនួន៤ទីតាំង នៅចំណុចបុរីមួយកន្លែង ក្នុងភូមិដំណាក់ សង្កាត់គោកឃ្លាង ខណ្ឌសែនសុខ ត្រូវបានកម្លាំងគណៈបញ្ជាការឯកភាពរាជធានីភ្នំពេញ ចុះបង្ក្រាបជាបន្តបន្ទាប់ដោយឃាត់ខ្លួនជនជាតិបរទេសសរុបចំនួន ៥៤នាក់ ព្រមទាំងដកហូតវត្ថុតាងប្រព្រឹត្តបទល្មើសមួយចំនួន ។
ប្រតិបត្តិការនេះធ្វើឡើងនៅវេលាម៉ោង៩និង១០នាទីព្រឹកថ្ងៃទី១៣ ខែឧសភា ឆ្នាំ២០២៦នេះ ក្រោមការដឹកនាំបញ្ជាផ្ទាល់ដោយលោក ឃួង ស្រេង ប្រធានគណៈបញ្ជាការឯកភាពរាជធានីភ្នំពេញ និងលោកឧត្តមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ អនុវត្តផ្ទាល់ក្រោមការដឹកនាំកម្លាំងចុះបង្ក្រាបដោយលោកឧត្តមសេនីយ៍ទោ ប៊ុន សុសិក្ខា ស្នងការរងទទួលផែនការងារសន្តិសុខ និងនាយការិយាល័យប្រឆាំងបទល្មើសបច្ចេកវិទ្យា និងនាយការិយ៉ាល័យ អន្តរាគមន៍ និងតំរួតបទបញ្ជា ដោយបានការសម្របសម្រួលនីតិវិធីច្បាប់ពីលោក សេង ហៀង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ។
ក្នុងកិច្ចប្រតិបត្តិការ បានចុះត្រួតពិនិត្យរកឃើញជនបរទេសសរុបចំនួន ៥៤នាក់។ នៅក្នុងនោះ ចំនួន៣៩ នាក់ (ស្រី ០៤នាក់) មាន ០៣សញ្ជាតិ (ចិន, ឡាវ និងវៀតណាម) ជាមុខសញ្ញាប្រព្រឹត្ត Online Scams និងចំនួន ១៥នាក់ ទាក់ទងនឹងការរស់នៅខុសច្បាប់ គ្មានលិខិតឆ្លងដែន ។
នៅក្នុងប្រតិបត្តិការនោះដែរសមត្ថកិច្ចដកហូត សម្ភារៈ វត្ថុតាង រួមមាន ៖ កុំព្យូទ័រលើតុ (All In One) ចំនួន ១៤គ្រឿង, កុំព្យូទ័រយួរដៃ(LAPTOP) ចំនួន ០២គ្រឿង និងទូរសព្ទដៃ ចំនួន ៤១គ្រឿង ។
បច្ចុប្បន្ន ជនសង្ស័យ និងវត្ថុតាង ត្រូវបានកម្លាំងនគរបាលជំនាញ បញ្ជូនទៅកាន់ស្នងការដ្ឋាននគរបាលរាជធានីភ្នំពេញ បន្តនីតិវិធី ៕
ចែករំលែកព័តមាននេះ