ប្រទេសជប៉ុន ៖ ខេត្តអ៊ីបារ៉ាគី (Ibaraki) ភាគឦសាននៃទីក្រុងតូក្យូ ប្រទេសជប៉ុន បានចាប់ផ្តើមអនុវត្តកម្មវិធីមួយ កាលពីថ្ងៃទី១១ ខែឧសភា ឆ្នាំ២០២៦…
ប្រទេសជប៉ុន ៖ ខេត្តអ៊ីបារ៉ាគី (Ibaraki) ភាគឦសាននៃទីក្រុងតូក្យូ ប្រទេសជប៉ុន បានចាប់ផ្តើមអនុវត្តកម្មវិធីមួយ កាលពីថ្ងៃទី១១ ខែឧសភា ឆ្នាំ២០២៦ ដើម្បីផ្តល់ប្រាក់រង្វាន់ដល់អ្នករាយការណ៍ពីបណ្តាអាជីវកម្មដែលបានជួលពលករបរទេសបម្រើការងារដោយខុសច្បាប់។ នេះបើតាមប្រភពពីសារព័ត៌មានជប៉ុនក្យូដូ (Kyodo) បានចេញផ្សាយ។
ក្រោមកម្មវិធីនេះ បន្ទាប់ពីផ្ទៀងផ្ទាត់ព័ត៌មានថា ពិតជាត្រឹមត្រូវហើយនោះ រដ្ឋបាលខេត្តនឹងរាយការណ៍ពីម្ចាស់អាជីពកម្មទៅកាន់ប៉ូលិស ហើយប្រសិនបើព័ត៌មាននោះនាំឱ្យមានសកម្មភាពអនុវត្តច្បាប់ អ្នកផ្តល់ព័ត៌មាននឹងទទួលបានប្រាក់រង្វាន់ ១ម៉ឺនយ៉េន ឬស្មើ៦៤ដុល្លារដុល្លារអាមេរិក។
កម្មវិធីនេះ ត្រូវបានណែនាំបន្ទាប់ពីរដ្ឋបាលខេត្តអះអាងថា ខេត្តអ៊ីបារ៉ាគីមានចំនួនពលករបរទេសគ្មានឯកសារច្រើនជាងគេនៅក្នុងចំណោមខេត្តទាំង៤៧របស់ប្រទេសជប៉ុនរយៈពេល៤ឆ្នាំជាប់ៗគ្នា។ រដ្ឋាភិបាលមូលដ្ឋានបានបញ្ជាក់ថា ពលបរទេស គឺត្រូវការចាំបាច់ក្នុងចំណោមកង្វះខាតកម្លាំងពលកម្មធ្ងន់ធ្ងររបស់ប្រទេសជប៉ុន ប៉ុន្តែការបង្ក្រាបលើការជួលខុសច្បាប់នឹងជួយដោះស្រាយការរំលោភសិទ្ធិមនុស្ស។
ទោះជាយ៉ាងណាក៏ដោយ កម្មវិធីនេះ បានបង្កឱ្យមានការបារម្ភបន្ទាប់ពីការប្រកាសកម្មវិធីនេះ
លើកដំបូងក្នុងខែកុម្ភៈកន្លងទៅ ដោយសមាគមមេធាវីក្នុងស្រុក និងក្រុមពលរដ្ឋគាំទ្រអ្នករស់នៅបរទេសអះអាងថា វានឹងជំរុញឱ្យមានការរើសអើង និងការបែងចែកសង្គម។ ជាក់ស្តែង សមាជិកប្រហែល១០នាក់នៃក្រុមពលរដ្ឋមួយក្រុមបានធ្វើបាតុកម្មនៅខាងក្រៅការិយាល័យរដ្ឋាភិបាលខេត្តនៅព្រឹកថ្ងៃទី១១ ខែឧសភា កន្លងទៅ ដោយអំពាវនាវឱ្យដកកម្មវិធីនេះចេញ ដោយលើកឡើងថា កម្មវិធីនេះក៏នឹងបំភិតបំភ័យពលករបរទេសដែលត្រូវបានជួលឱ្យធ្វើការត្រឹមត្រូវផងដែរ ។
យោងតាមគោលការណ៍ណែនាំខេត្ត ការរាយការណ៍នឹងត្រូវបានកំណត់ចំពោះអាជីវកម្មដែលជួល សម្របសម្រួល ឬសង្ស័យថា សម្របសម្រួលការងារខុសច្បាប់។ ផ្ទុយទៅវិញ ការផ្តល់ព័ត៌មានដែលដាក់ជូនដោយចេតនាទុច្ចរិត ឬអំពីបុគ្គលដោយផ្អែកទៅលើរូបរាង ឬសញ្ជាតិរបស់ពួកគេ នឹងមិនត្រូវបានទទួលយកឡើយ។ ខេត្តក៏បានបញ្ជាក់បន្ថែមថា សេចក្តីរាយការណ៍អាចត្រូវបានផ្ញើតាមរយៈគេហទំព័រខេត្តដោយផ្តល់ព័ត៌មានផ្ទាល់ខ្លួន ដូចជាឈ្មោះ អាសយដ្ឋាន និងលេខទូរស័ព្ទ ហើយត្រូវតែរួមបញ្ចូលច្បាប់ចម្លងនៃអត្តសញ្ញាណប័ណ្ណជាដើម ៕
ចែករំលែកព័តមាននេះ