រាជធានីភ្នំពេញ ៖ ស្របពេលដែលព្រះរាជាណាចក្រកម្ពុជាកំពុងទទួលរងឥទ្ធិពលខ្យល់ ព្យុះធ្វើឱ្យតំបន់មាត់សមុទ្រ ជួរភ្នំ និងខ្ពង់រាប ជាពិសេសនៅតាមដងទន្លេមេគង្គធ្លាក់ភ្លៀងជោកជាំបង្កឱ្យទឹក ទន្លេឡើងជាបន្តបន្ទាប់ ។ ដោយសារមានក្តីបារម្ភពីទឹកជំនន់ក្នុងរយៈពេលប៉ុន្មានថ្ងៃ កន្លងមកនេះ
រាជធានីភ្នំពេញ ៖ ស្របពេលដែលព្រះរាជាណាចក្រកម្ពុជាកំពុងទទួលរងឥទ្ធិពលខ្យល់ព្យុះធ្វើឱ្យតំបន់មាត់សមុទ្រ ជួរភ្នំ និងខ្ពង់រាប ជាពិសេសនៅតាមដងទន្លេមេគង្គធ្លាក់ភ្លៀងជោកជាំបង្កឱ្យទឹកទន្លេឡើងជាបន្តបន្ទាប់ ។ ដោយសារមានក្តីបារម្ភពីទឹកជំនន់ក្នុងរយៈពេលប៉ុន្មានថ្ងៃកន្លងមកនេះ លោកកែប ជុតិមា អភិបាលរាជធានីភ្នំពេញ បានចុះពិនិត្យមើលស្ថានភាពទឹកទន្លេ និងស្ថានីយបូមទឹកនានាទូទាំងរាជធានីភ្នំពេញ ដើម្បីត្រៀមលក្ខណៈបង្ការទប់ស្កាត់ឱ្យបានទាន់ពេលវេលា ។ ជាក់ស្តែងនៅព្រឹកថ្ងៃទី២ សីហា ឆ្នាំ២០១១ លោកកែប ជុតិមា ឆ្លៀតពេលចុងម៉ោងចេញពីការងារ បានអញ្ជើញចុះទៅពិនិត្យមើលស្ថានភាពទឹកទន្លេមេគង្គ និងស្ថានីយបូមទឹកជាប់មាត់ទន្លេ ដែលកំពុងដំណើរការបូមទឹកយ៉ាងសកម្ម ។
ក្នុងពេលចុះពិនិត្យផ្ទាល់លោកកែប ជុតិមា បានណែនាំឱ្យបុគ្គលិកកម្មករនៅតាមស្ថានីយបូមទឹកមាត់ទន្លេ ត្រូវពិនិត្យតាមដានជាប្រចាំនូវស្ថានភាពទឹកទន្លេ និងត្រូវកាយសំរាមជាប្រចាំ ជាពិសេសនៅពេលមានភ្លៀងធ្លាក់ មិនថាយប់ ឬថ្ងៃនោះទេ ។
លោកសាំ ពិសិដ្ឋ នាយកមន្ទីរសាធារណការ និងដឹកជញ្ជូនរាជធានីភ្នំពេញ បានឱ្យដឹងថា ពិនិត្យត្រឹមថ្ងៃទី២ សីហា កម្ពស់ទឹកនៅមាត់ទន្លេចតុមុខឡើងដល់៧,៩០ម៉ែត្រ ហើយបើកម្ពស់ទឹកទន្លេនៅតែបន្តឡើងរហូតដល់ពី៩,២០ម៉ែត្រទៅ៩,៥០ម៉ែត្រ ស្ថានីយទាំង៤នៅមាត់ទន្លេត្រូវបិទជាបណ្តោះអាសន្ន ។ កន្លងមកស្ថានីយចំនួនពីរគឺស្ថានីយចតុមុខ និងស្ថានីយគីឡូម៉ែត្រលេខ៩ ត្រូវបានបិទរួចហើយ ។
ចំពោះបញ្ហាទឹកជំនន់សម្រាប់ឆ្នាំនេះ អាជ្ញាធររាជធានីភ្នំពេញ ហាក់មិនមានក្តីកង្វល់ទេ ជាពិសេសជំនន់ទឹកភ្លៀងដោយសារអាជ្ញាធរបានត្រៀមលក្ខណៈជាមុនរួចហើយ បន្ទាប់ពីប៉ុន្មានឆ្នាំមុនទទួលរងនូវការជន់លិច ដែលជាបទពិសោធន៍កន្លងមក ។ ម្យ៉ាងស្ថានីយនានាបានរៀបចំ និងត្រៀមរួចរាល់អស់ហើយដែរ ក្នុងនោះមានស្ថានីយកប់ស្រូវដែលជាអាទិភាពមានសមត្ថភាពបូមទឹកបាន៥០.៤០០ម៉ែត្រគូបក្នុងមួយម៉ោង ដែលឆ្នាំកន្លងមកមិនធ្លាប់មាន ។ ប៉ុន្តែបញ្ហាចោទដែលអាជ្ញាធររាជធានីភ្នំពេញ កំពុងមានក្តីបារម្ភនោះគឺជំនន់ទឹកទន្លេតែម្តង ៕
ចែករំលែកព័តមាននេះ