ទីក្រុងអាំស្ទ៊ែដាំ៖ អ្នកជំងឺបីនាក់ដែលឆ្លងមេរោគហាន់តាវីរុស (hantavirus) និងដែលធ្វើដំណើរនៅលើនាវាទេសចរណ៍ហុនឌាស (Hondius) ត្រូវបានជម្លៀសចេញតាមយន្តហោះទៅប្រទេសហូឡង់ដើម្បីព្យាបាលជំងឺ។ អាជ្ញាធរអន្តរជាតិក៏កំពុងចាត់វិធានការឆ្លើយតបចំពោះការឆ្លងរាលដាលនៃជំងឺនេះផងដែរ។ នាយកអង្គការសុខភាពពិភពលោក លោកតេដ្រូស (Tedros)…
ទីក្រុងអាំស្ទ៊ែដាំ៖ អ្នកជំងឺបីនាក់ដែលឆ្លងមេរោគហាន់តាវីរុស (hantavirus) និងដែលធ្វើដំណើរនៅលើនាវាទេសចរណ៍ហុនឌាស (Hondius) ត្រូវបានជម្លៀសចេញតាមយន្តហោះទៅប្រទេសហូឡង់ដើម្បីព្យាបាលជំងឺ។ អាជ្ញាធរអន្តរជាតិក៏កំពុងចាត់វិធានការឆ្លើយតបចំពោះការឆ្លងរាលដាលនៃជំងឺនេះផងដែរ។ នាយកអង្គការសុខភាពពិភពលោក លោកតេដ្រូស (Tedros) ថ្លែងថាអ្នកជំងឺទាំងនោះកំពុងធ្វើដំណើរទៅហូឡង់ហើយ។ សម្រាប់ដំណាក់កាលនេះ ហានិភ័យចំពោះសុខភាពសាធារណៈជាទូទៅនៅមានកម្រិតទាបនៅឡើយទេ។ លោកបង្ហោះសារដូចខាងលើនេះនៅលើបណ្ដាញអ៊ិច។
នៅក្នុងចំណោមអ្នកទាំងបីដែលជម្លៀសខ្លួនតាមយន្តហោះនោះក៏មានម្នាក់ជាវេជ្ជបណ្ឌិតពិនិត្យជំងឺប្រចាំការនៅលើនាវាកម្សាន្តនោះផងដែរ។ នេះបើយោងតាមការបង្ហើបឱ្យដឹងពីក្រសួងសុខាភិបាលអេស្ប៉ាញ។ ក្រសួងថ្លែងបន្ថែមទៀតថាលោកវេជ្ជបណ្ឌិតរូបនោះពីដំបូងដៃប្រុងដឹកទៅកោះខាណារី (Canary Island) ដោយសារគាត់ធ្លាក់ខ្លួនឈឺធ្ងន់ ប៉ុន្តែឥឡូវនេះត្រូវបានដឹកទៅប្រទេសហូឡង់វិញបន្ទាប់ពីស្ថានភាពជំងឺរបស់គាត់ចាប់ផ្ដើមប្រសើរជាងមុន។
នាវាឈ្មោះហុនឌាសដែលចាកចេញដំណើរពីប្រទេសអាហ្សង់ទីននៅពេលនេះកំពុងស្ថិតនៅលើផ្ទៃសមុទ្រប្រទេសខេបវើត (Cape Verde) ហើយត្រូវបង្វែរទិសដៅរបស់ខ្លួនដោយសារមានអ្នកឆ្លងជំងឺហាន់តាវីរុសនៅពេលបើកឆ្លងកាត់មហាសមុទ្រអាត្លង់ទិច។ គិតត្រឹមថ្ងៃទី៦ ខែឧសភា អង្គការសុខភាពពិភពលោករកឃើញថានៅក្នុងចំណោមអ្នកដំណើរនៅលើនាវានោះមាន៨នាក់បានឆ្លងមេរោគនេះ។ ក្នុងនោះបីនាក់បានស្លាប់ហើយ ម្នាក់កំពុងធ្លាក់ខ្លួនឈឺធ្ងន់ និងបីនាក់ក៏ឆ្លងមេរោគនេះដែរ ប៉ុន្តែចេញរោគសញ្ញាកម្រិតស្រាល។
អ្នកដំណើរដទៃទៀតដែលជិះនៅក្នុងនាវាកម្សាន្តនោះ និងដែលមិនបានបង្ហាញសញ្ញាថាឆ្លងមេរោគនេះទេ ពួកគេត្រៀមចុះពីលើនាវានេះនៅថ្ងៃសៅរ៍នៅតំបន់ថេនេរីហ្វ (Tenerife)។ នៅពេលទៅដល់ទីនោះ គេនឹងរៀបចំដឹកជញ្ជូនពួកគាត់បន្តទៅទីកន្លែងណាទៀតជាបន្ទុករបស់ពួកអឺរ៉ុប។ បន្ទាប់មក នាវានេះនឹងចតឈប់ស្ងៀមនៅកំពង់ផែក្រង់ណាឌីយ៉ា ដឺ អាបូណា (Granadilla de Abona)។ នៅទីនោះ អ្នកដំណើរអាចនឹងវិលត្រឡប់ទៅប្រទេសកំណើតរបស់ពួកគេវិញ។ អ្នកដំណើរជនជាតិអេស្ប៉ាញ១៤នាក់នឹងត្រូវគេដឹកជញ្ជូនទៅទីក្រុងម៉ាឌ្រីត៕ ប្រភព៖ យួរ៉ូ ញូស៍ និងប្រភពដទៃទៀត
ចែករំលែកព័តមាននេះ