ទីក្រុងហ្សឺណែវ៖ អង្គការសុខភាពពិភពលោកប្រកាសថាមេរោគហាន់តាវីរុស (hantavirus) ដែលផ្ទុះឡើងនៅលើនាវាកម្សាន្ត ឬនាវាទេសចរណ៍នៅមហាសមុទ្រអាត្លង់ទិចនោះទំនងជាកើតមុនពេលភ្ញៀវឡើងជិះនាវាទៅទៀត។ ចង់មានន័យថាអ្នកទេសចរទំនងជាបានឆ្លងមេរោគនេះមិនដឹងតាំងពីណាមកទេមុនពេលឡើងលើនាវា។ ម៉្យាងទៀត អង្គការដដែលនេះយល់ថាអាចនឹងមានករណីមនុស្សឆ្លងមេរោគនេះតគ្នានៅលើកប៉ាល់ផងដែរ។ អង្គការទទួលបានសេចក្ដីរាយការណ៍ថាមេរោគហាន់តាវីរុសកើតឡើងនៅលើនាវាឈ្មោះហ៊ុនឌាស (Hundius) កាលពីថ្ងៃទី២ ខែឧសភា។
នៅក្នុងចំណោមអ្នកដំណើរ និងបុគ្គលិកនៅលើនាវាសរុប១៤៧នាក់ គេធ្វើតេស្តឃើញថាមានអ្នកឆ្លងមេរោគនេះចំនួន៧នាក់ ហើយ៣នាក់បានស្លាប់រួចហើយ។ អង្គការសុខភាពពិភពលោកយល់ថាសភាពការណ៍អាចនឹងប្រែប្រួល។ អ្នកជំងឺម្នាក់នៅប្រទេសអាហ្វ្រិកខាងត្បូងឥឡូវនេះឮថាបានគ្រាន់បើជាងមុន។ ប៉ុន្តែគាត់បន្តស្ថិតនៅក្នុងបន្ទប់សង្គ្រោះបន្ទាន់នៅឡើយទេ។ ចំណែកអ្នកជំងឺ២នាក់ទៀតដែលកំពុងស្ថិតនៅក្នុងនាវាកម្សាន្តនោះក៏ត្រៀមជម្លៀសចេញទៅព្យាបាលនៅប្រទេសហូឡង់ផងដែរ។
អង្គការសុខភាពពិភពលោកបន្តតាមដានបញ្ហានេះដោយយកចិត្តទុកដាក់។ ដើម្បីជាវិធានការបង្ការ ម្ចាស់នាវាបានស្នើសុំឱ្យអ្នកដំណើរទាំងអស់បន្តស្នាក់នៅលើនាវានោះជាបណ្ដោះអាសន្នសិនដើម្បីទុកលទ្ធភាពឱ្យក្រុមអ្នកជំនាញចាត់ការសម្អាតមេរោគ និងដាក់ចេញវិធានការថែទាំផ្នែកសុខាភិបាលសាធារណៈ។ អ្នកជំងឺ២នាក់នឹងត្រូវជម្លៀសចេញដើម្បីធានាថាពួកគេទទួលបានការថែទាំសុខភាពតបតាមតម្រូវការជាក់ស្ដែង។ ក្រៅពីនេះមិនមានសញ្ញាថាអ្នកដទៃទៀតឆ្លងជំងឺនេះទេ។
កប៉ាល់នេះនឹងបន្តដំណើរទៅកោះខាណារី (Canary) ប្រទេសអេស្ប៉ាញ។ អង្គការសុខភាពពិភពលោកកំពុងសហការជាមួយអាជ្ញាធរសុខាភិបាលអេស្ប៉ាញដើម្បីបើកការស៊ើបអង្កេតយ៉ាងពេញលេញទៅលើករណីផ្ទុះឡើងនូវមេរោគនេះ និងចាត់ការបាញ់ថ្នាំសម្លាប់មេរោគកប៉ាល់នោះ។ សូមជម្រាបថាមេរោគហាន់តាវីរុសរស់នៅក្នុងខ្លួនសត្វកកេរ ហើយអាចធ្វើឱ្យមនុស្សធ្លាក់ខ្លួនឈឺធ្ងន់ប្រសិនបើពួកគេឆ្លងមេរោគនេះ។ ជារៀងរាល់ឆ្នាំមនុស្សរាប់ពាន់នាក់ឆ្លងមេរោគនេះ។ ពួកគេភាគច្រើនឆ្លងតាមរយៈការប៉ះពាល់ពពួកសេតកកេរ ឬប៉ះពាល់ទឹកនោម លាមក ឬទឹកមាត់របស់សត្វប្រភេទនេះ៕ ប្រភព៖ ស៊ីនហួ
ចែករំលែកព័តមាននេះ