តម្លៃប្រេងឆៅធ្លាក់ចុះ ក្រោយលោក ត្រាំ ប្រកាសបេសកកម្មបើកច្រកហ័រមូសសង្គ្រោះកប៉ាល់ជាប់គាំង
អន្តរជាតិ ៖ តម្លៃប្រេងឆៅអន្តរជាតិបានធ្លាក់ចុះបន្តិច នៅថ្ងៃទី៤ ខែឧសភា ឆ្នាំ២០២៦ បន្ទាប់ពីលោកប្រធានាធិបតី ដូណាល់ ត្រាំ (Donald…
អន្តរជាតិ ៖ តម្លៃប្រេងឆៅអន្តរជាតិបានធ្លាក់ចុះបន្តិច នៅថ្ងៃទី៤ ខែឧសភា ឆ្នាំ២០២៦ បន្ទាប់ពីលោកប្រធានាធិបតី ដូណាល់ ត្រាំ (Donald Trump) បានប្រកាសថា សហរដ្ឋអាមេរិកនឹងចាប់ផ្តើមបេសកកម្មបើកចក្រសមុទ្រហ័រមូស (Hormuz) ជួយសង្គ្រោះបណ្តាកប៉ាល់ដឹកជញ្ជូនដែលកំពុងជាប់គាំងនៅទីនោះ។ ទោះជាយ៉ាងណាក៏ដោយ ភាពមិនច្បាស់លាស់នៃកិច្ចព្រមព្រៀងសន្តិភាពរវាងអាមេរិក និងអ៊ីរ៉ង់ នៅតែធ្វើឱ្យតម្លៃមិនអាចធ្លាក់ចុះក្រោមពី ១០០ ដុល្លារអាមេរិកក្នុង១បារ៉ែលបានឡើយ។ នេះបើតាមប្រភពពី Reuters, CNBC និង Aljazeera បានចេញផ្សាយ។
តម្លៃប្រេងឆៅប្រភេទ Brent ដែលជាស្តង់ដាពិភពលោកបានធ្លាក់ចុះ ៦ សេន ឬ ០,១% មកនៅត្រឹម ១០៨,១១ដុល្លារក្នុង១បារ៉ែល គិតត្រឹមម៉ោង១១ព្រឹក (ម៉ោងនៅកម្ពុជា)។ ចំណែកប្រេងឆៅស្តង់ដាសហរដ្ខអាមេរិក West Texas Intermediate (WTI) មានតម្លៃ ១០១,៥០ ដុល្លារក្នុង១បារ៉ែល ពោលធ្លាក់ចុះ ៤៤ សេន ឬ ០,៤%។
លោកប្រធានាធិបតី ត្រាំ កាលពីថ្ងៃទី៣ ខែឧសភា ឆ្នាំ២០២៦ បានប្រកាសពីបេសកកម្មជើងទឹកថ្មីមួយមានឈ្មោះថា «Project Freedom» ដែលចាប់ផ្តើមនៅថ្ងៃទី៤ ខែឧសភា ឆ្នាំ២០២៦ ដើម្បីជួយសង្គ្រោះបណ្តាកប៉ាល់ និងនាវិកប្រហែល ២ ម៉ឺននាក់ ដែលកំពុងជាប់គាំងនៅក្នុងច្រកសមុទ្រហ័រមូស ឱ្យចាកចេញដោយសុវត្ថិភាព។
បញ្ជាការកណ្តាលសហរដ្ឋអាមេរិក (CENTCOM) ក្រោយមកក៏បានប្រកាសថា នាវាពិឃាតបំពាក់មីស៊ីលនាំផ្លូវ យន្តហោះចម្បាំងនៅមូលដ្ឋានដីគោក និងទាំងនៅលើនាវាដឹកជញ្ជូនច្រើនជាង ១០០គ្រឿង ប្រព័ន្ធដ្រូនចម្រុះដែន និងបុគ្គលិកយោធាចំនួន ១ ៥០០០ នាក់ នឹងចូលរួមក្នុងការគាំទ្របេសកកម្មនេះ។
បើទោះបីជាមានការប្រកាស ដើម្បីសម្រាលសម្ពាធពីប្រធានាធិបតីសហរដ្ឋអាមេរិកយ៉ាងណាក្តី ប៉ុន្តែតម្លៃប្រេងឆៅអន្តរជាតិនៅតែខ្ពស់ជាង ១០០ ដុល្លារក្នុង១បារ៉ែល ដោយសារតែគ្មានកិច្ចព្រមព្រៀងសន្តិភាពកើតឡើង ហើយការដឹកជញ្ជូនតាមច្រកសមុទ្រមួយនេះ នៅតែត្រូវបានរឹតត្បិត។
ការចរចារវាងសហរដ្ឋអាមេរិក និងអ៊ីរ៉ង់ នៅតែបន្តស្ថិតក្នុងស្ថានភាពជាប់គាំង បើទោះជាមានការផ្លាស់ប្តូរសំណើថ្មីៗក៏ដោយ។ កាលពីចុងសប្តាហ៍កន្លងទៅ អ៊ីរ៉ង់បានដាក់ចេញសំណើ ១៤ ចំណុច ដើម្បីបញ្ចប់សង្គ្រាម ប៉ុន្តែលោក ត្រាំ បានបង្ហាញការមិនពេញចិត្ត ដោយបានលើកឡើងថា សំណើមិនអាចទទួលយកបាន ព្រោះលោកចង់បានការធានាកិច្ចព្រមព្រៀងនុយក្លេអ៊ែរជាមួយអ៊ីរ៉ង់ជាអាទិភាព៕
ចែករំលែកព័តមាននេះ