សង្គ្រាមអ៉ីរ៉ង់ ៖ ប្រធានាធិបតីអាមេរិក លោកដូណាល់ត្រាំ គូសបញ្ជាក់កាលពីថ្ងៃទី១ ឧសភា ប្រាប់ដល់អ្នកទទួលខុសត្រូវសភាសំខាន់ៗថា ការប្រទូស្តរ៉ាយគ្នានៅអ៉ីរ៉ង់បានបញ្ចប់ហើយ បន្ទាប់ពីរងសម្ពាធរបស់បណ្ដាសមាជិកសភា លើភាពស្របច្បាប់នៃសង្គ្រាមនោះ…
សង្គ្រាមអ៉ីរ៉ង់ ៖ ប្រធានាធិបតីអាមេរិក លោកដូណាល់ត្រាំ គូសបញ្ជាក់កាលពីថ្ងៃទី១ ឧសភា ប្រាប់ដល់អ្នកទទួលខុសត្រូវសភាសំខាន់ៗថា ការប្រទូស្តរ៉ាយគ្នានៅអ៉ីរ៉ង់បានបញ្ចប់ហើយ បន្ទាប់ពីរងសម្ពាធរបស់បណ្ដាសមាជិកសភា លើភាពស្របច្បាប់នៃសង្គ្រាមនោះ ដែលអាមេរិកបានរួមគ្នាធ្វើជាមួយអ៉ីស្រាអែលពីថ្ងៃទី២៨ កុម្ភៈ មក ។
សភាធ្លាប់បានជម្រុញសេតវិមាន ឲ្យស្នើសុំការអនុញ្ញាតរបស់សភា សម្រាប់សង្គ្រាមនោះដែលរដ្ឋការលោកដូណាល់ត្រាំចាត់ទុកថា ប្រតិបត្តិការយោធា ពេលសង្គ្រាមនោះបានចូលដល់ខែទី៣។ សង្គ្រាមដែលលោកត្រាំប្រកាសធ្វើប្រឆាំងអ៉ីរ៉ង់ ដោយមិនមានការអនុម័តរបស់សភា បានអូសបន្លាយពេលដល់៦០ថ្ងៃ ។ តាមរដ្ឋធម្មនុញ្ញអាមេរិក ប្រធានាធិបតីអាចប្រកាសធ្វើសង្គ្រាមមួយបាន ដោយមិនចាំបាច់ឆ្លងកាត់ការអនុម័តរបស់សភា តែសង្គ្រាមនោះត្រូវធ្វើមិនឲ្យលើសពី៦០ថ្ងៃ បើចង់បន្តត្រូវមានការអនុម័តរបស់សភា ។
រដ្ឋធម្មនុញ្ញអាមេរិកផ្ដល់អំណាចដល់សភាប្រកាសសង្គ្រាម ប៉ុន្តែច្បាប់មួយអនុម័តកាលពីឆ្នាំ១៩៧៣ អនុញ្ញាតឲ្យប្រធានាធិបតីប្រើកម្លាំងទ័ពក្នុងករណីបន្ទាន់ តែកម្រិតការធ្វើអន្តរាគមន៍នោះត្រឹម៦០ថ្ងៃ បើគ្មានការអនុម័តរបស់សភាដើម្បីបន្ត ។ ប្រឈមមុខនឹងកាលបរិច្ឆេទកំណត់នេះ រដ្ឋការលោកត្រាំបានលើកការបកស្រាយថា បច្ចុប្បន្ន យើងកំពុងស្ថិតក្នុងបទឈប់បាញ់គ្នា។
នេះជាជំហរមួយដែលសំដៅចៀសវាងការបោះឆ្នោតអនុម័តក្នុងពេលភ្លាមៗរបស់សភា។ ចំណែកអ្នកទទួលខុសត្រូវជាន់ខ្ពស់ម្នាក់របស់រដ្ឋការអាមេរិកលើកឡើងថា ការច្បាំងគ្នាដែលចាប់ផ្ដើមពីថ្ងៃទី២៨កុម្ភៈមកនោះបានចប់ហើយ។ ពុំមានការបាញ់តតាំងគ្នាទៀតរវាងកងទ័ពអាមេរិកនិងកងទ័ពអ៉ីរ៉ងឡើយ ចាប់តាំងពីថ្ងៃទី៧ មេសា មក។
ក្នុងសារលិខិតផ្ញើជូនប្រធានសភា និងប្រធានព្រឹទ្ធសភាលោកត្រាំសរសេរថា សង្គ្រាមដែលចាប់ផ្ដើមពីថ្ងៃទី២៨ កុម្ភៈ មកនោះបានចប់ហើយ ។ ការលើកឡើងនោះ របស់លោកត្រាំធ្វើឡើងពេលកងទ័ពអាមេរិកកំពុងមានវត្តមានច្រើនក្នុងតំបន់ ជាមួយនាវាផ្ទុកយន្តហោះដល់៣គ្រឿងនិងកងកម្លាំងនាវាចរណ៍ដ៏ច្រើននិងក្នុងពេលដែលអាមេរិកកមពុងតែបិទខ្ទប់បណ្ដាកំពង់ផែអ៉ីរ៉ង់ ។ ខ្លឹមសារនៃសារលិខិតនោះរបស់លោកត្រាំពិតជាផ្ទុយនឹងសេចក្ដីថ្លែងការណ៍នានារបស់លោក ទៅកាន់បណ្ដាអ្នកកាសែតដែលថា សង្គ្រាមនោះអាចមិនងាយចប់ទេ។
លោកថា ទោះបីជាយើងដណ្ដើមបានជ័យជម្នះ ក្នុងប្រតិបត្តិការប្រឆាំងអ៉ីរ៉ង់ និងការខិតខំប្រឹងប្រែងជាប់ដើម្បីធានាសន្តិភាពដ៏ស្ថិតស្ថេរមួយក្ដី ក៏ការគំរាមកំហែងរបស់អ៉ីរ៉ង់ចំពោះអាមេរិកនិងកងទ័ពយើងនៅតែខ្លាំងដែរ។ ចំណែកអ្នកទទួលខុសត្រូវយោធាជាន់ខ្ពស់អ៉ីរ៉ង់មួយរូប វាយតម្លៃកាលពីថ្ងៃទី២ ឧសភា ថា សង្គ្រាមជាមួយអាមេរិក អាចផ្ទុះ ជាថ្មីក្រោយការបដិសេធរបស់លោកត្រាំមិនទទួលយកសំណើរបស់យើង ៕
ចែករំលែកព័តមាននេះ