ទីក្រុងឡុង៖ ស្ថានទូតអាមេរិកប្រចាំទីក្រុងឡុង ចក្រភពអង់គ្លេស បានចេញសេចក្ដីប្រកាសឱ្យប្រជាជនរបស់ខ្លួននៅទីនោះបង្កើនការប្រុងប្រយ័ត្នខ្ពស់ព្រោះរាជរដ្ឋាភិបាលអង់គ្លេសទើបតែចេញសេចក្ដីប្រកាសអាសន្នថាគ្រោះថ្នាក់នៅពេលនេះមានកម្រិតធ្ងន់ធ្ងរ។ ស្ថានទូតបានផ្ដល់ការណែនាំឱ្យប្រជាជនអាមេរិកនៅអង់គ្លេសប្រយ័ត្នប្រយែងខ្លួននៅពេលពួកគេស្ថិតនៅទីសាធារណៈ។ ទីកន្លែងមួយចំនួនដែលស្ថានទូតណែនាំឱ្យពួកគេជៀសវាងមានដូចជាសាលារៀន, ព្រះវិហារគ្រិស្ត, ទីតាំងទេសចរណ៍ និងទីកន្លែងដឹកជញ្ជូនសាធារណៈ។
ស្ថានទូតក៏បានប្រកាសថែមទៀតថាប្រជាជនអាមេរិកគួរប្រើប្រាស់វិធីធ្វើដំណើរតាមផ្លូវច្រើនខ្សែ និងជ្រើសរើសពេលវេលាផ្សេងៗគ្នាដើម្បីកាត់បន្ថយលទ្ធភាពនៃការស្មានដឹងពីអ្នកដែលចង់ធ្វើបាបពួកគេ។ ភ្នាក់ងារសម្ងាត់អង់គ្លេស MI5 ថ្លែងកាលពីថ្ងៃសុក្រថា «មជ្ឈមណ្ឌលវិភាគអំពើភេរវកម្ម» បានដំឡើងកម្រិតគំរាមកំហែងដែលពីមុនត្រឹមកម្រិតធម្មតា ប៉ុន្តែឥឡូវនេះមានកម្រិតធ្ងន់ធ្ងរ។ នេះជាកម្រិតខ្ពស់លំដាប់ទី២ មានន័យថាខ្វះតែមួយកាំទៀតទេនឹងឈានដល់កម្រិតមហាអាសន្នមែនទែនហើយ។
ទីភ្នាក់ងារសម្ងាត់ដដែលឱ្យសញ្ញាថាការវាយប្រហារទំនងជានឹងកើតមាននៅអំឡុងពេល៦ខែគិតចាប់ពីពេលនេះតទៅដែលត្រូវប្រុងប្រយ័ត្ន។ ចក្រភពអង់គ្លេសកើតមានការគំរាមកំហែងផ្នែកភេរវកម្មកើនឡើងបន្តិចម្ដងៗជាលក្ខណៈម្ដងម្កាល។ កម្រិតនៃការគំរាមកំហែងក៏ប្រែប្រួលផងដែរក្រោយការយកកាំបិតចាក់បុរសជនជាតិជ្វីប២នាក់នៅទីក្រុងឡុងកាលពីថ្ងៃពុធ។ MI5 យល់ថាគ្រោះថ្នាក់កើនឡើងដោយមានកត្តា២ ទី១ក្រុមភេរវកម្មឥស្លាមជ្រុលនិយម និងទី២ក្រុមភេរវកម្មស្ដាំនិយមជ្រុល។
ទម្រង់វាយប្រហារអាចជាលក្ខណៈបុគ្គលដាច់ដោយឡែកៗពីគ្នា ឬជាក្រុមតូចៗនៅអង់គ្លេស។ MI5 កត់សម្គាល់ថាការគំរាមកំហែងជាពិសេសទៅលើជនជាតិជ្វីប និងជនជាតិអ៊ីស្រាអែល រួមទាំងស្ថាប័នរបស់ពួកគេផងដែរដោយសារការមានកំហឹងនឹងសង្គ្រាមនៅមជ្ឈិមបូព៌ា។ គិតទាំងលើកនេះទៀត វាជាលើកទី២ហើយត្រឹមតែរយៈពេលពីរបីសប្ដាហ៍ចុងក្រោយនេះដែលស្ថានទូតអាមេរិកប្រចាំចក្រភពអង់គ្លេសចេញសេចក្ដីព្រមានឱ្យពលរដ្ឋរបស់ខ្លួនប្រុងប្រយ័ត្ន៕ ប្រភព៖ អាល់ចាស៊ីរ៉ា (Al Jazeera) និងប្រភពដទៃទៀត
ចែករំលែកព័តមាននេះ