ទីក្រុងម៉ានីឡា៖ គណៈកម្មការរដ្ឋសភាទទួលបន្ទុកផ្នែកយុត្តិកម្មនៅប្រទេសហ្វ៊ីលីពីនរកហេតុផលដែលអាចកោះប្រជុំបោះឆ្នោតដកលោកស្រីសារ៉ា ឌូតឺតេ (Sarah Duterte) ពីតំណែងអនុប្រធានាធិបតី។ បើដូច្នេះមែន វាជាការបោះមួយជំហានទៅមុខទៀតទៅកាន់ចលនការមួយដែលអាចទប់ស្កាត់មិនឱ្យលោកស្រីមានឱកាសក្លាយជាប្រធានាធិបតីនៅអាណត្តិថ្មីបានឡើយ។ ពាក្យបណ្ដឹងនឹងដាក់ជូនសម័យប្រជុំសភាពេញអង្គដើម្បីបោះឆ្នោតនៅពេលសភាចូលធ្វើការវិញនៅខែក្រោយ។ ព្រឹទ្ធសភាត្រូវការចំនួន១/៣យ៉ាងតិចដើម្បីស្នើសុំឱ្យបោះឆ្នោតដកតំណែង ហើយរុញសំណុំរឿងនេះទៅព្រឹទ្ធសភាជាបន្តទៀតដើម្បីសម្រេច។
ប្រសិនបើលោកស្រីសារ៉ាត្រូវសភារកឃើញថាមានកំហុសដូចការចោទប្រកាន់មែន លោកស្រីនឹងត្រូវដកតំណែងអនុប្រធា នាធិបតី ហើយត្រូវហាមឃាត់ធ្វើនយោបាយអស់មួយជីវិត។ អ្នកដែលចង់ដកតំណែងលោកស្រីឌូតឺតេគឺអង្គការសង្គមស៊ីវិល និងក្រុមឆ្វេងនិយម។ ពួកគេចោទប្រកាន់ថាលោកស្រីចាត់ចែងមូលនិធិសាធារណៈមិនត្រឹមត្រូវ, មានទ្រព្យសម្បត្តិសម្បូរហូរហៀរដោយគ្មានការពន្យល់បកស្រាយឱ្យបានច្បាស់ថាប្រភពបានមកពីណា និងគំរាមកំហែងអាយុជីវិតរបស់គូប្រជែងនយោបាយរបស់លោកស្រី (លោកម៉ាកូសដែលជាប្រធានាធិបតីសព្វថ្ងៃ), ភរិយារបស់លោក និងបងប្អូនជីដូនមួយរបស់លោកដែលជាអតីតប្រធានរដ្ឋសភា។
នៅក្នុងការបោះឆ្នោតរបស់គណៈកម្មការសភាខាងលើ សមាជិកទាំង៥៣រូបបានឯកភាពគ្នាថាមានហេតុផលដែលអាចបោះឆ្នោតដកតំណែងលោកស្រីសារ៉ា។ ទោះបីរងការចោទប្រកាន់យ៉ាងណាក្ដី លោកស្រីតែងតែបដិសេធជានិច្ច។ លោកស្រីអះអាងថាការចោទប្រកាន់ទាំងនោះជារឿងនយោបាយ។ រហូតមកទល់នឹងពេលបច្ចុប្បន្ននេះ លោកស្រីសារ៉ា និងលោកម៉ាកូសនៅតែមានទំនាស់គ្នាយ៉ាងល្វីងជូរចត់។ សូមរំលឹកថាកាលពីមុនពេលបោះឆ្នោតប្រធានាធិបតីកាលពីឆ្នាំ២០២២ ឪពុករបស់លោកស្រីសារ៉ា (លោកឌូតឺតេដែលកំពុងជាប់ឃុំនៅតុលាការទីក្រុងឡាអេ) និងលោកម៉ាកូសជាសម្ព័ន្ធមិត្តនឹងគ្នា។
លោកឌូតឺតេសម្រេចចិត្តមិនឱ្យកូនស្រីឈរឈ្មោះជាបេក្ខជនប្រធានាធិបតីទេដើម្បីកុំឱ្យបែកសន្លឹកឆ្នោត សុខចិត្តឱ្យឈរជាបេក្ខជនអនុប្រធានាធិបតី។ លោកឌូតឺតេក៏អំពាវនាវឱ្យក្រុមអ្នកគាំទ្ររបស់លោកបោះឆ្នោតឱ្យលោកម៉ាកូសថែមទៀតផង។ ប៉ុន្តែនៅពេលធ្វើការជាមួយគ្នាយូរៗទៅចេះតែមានបញ្ហាខ្វែងគំនិតគ្នា។ លោកម៉ាកូសចង់លម្អៀងទៅខាងអាមេរិក ហើយប្រកាន់ជំហរអរិភាពជាមួយប្រទេសចិន។ ចំណែកលោកឌូតឺតេ និងកូនស្រីរបស់លោកមិនមែនរណបចិនទេ គ្រាន់តែមិនចង់មានទំនាស់ជាមួយចិន។
លោកស្រីសារ៉ា និងលោកម៉ាកូសកាលនៅមានទំនាក់ទំនងល្អូកល្អឺននឹងគ្នាក្រៅពីនេះ នៅមានបញ្ហាខ្វែងគំនិតគ្នាជាច្រើនទៀតពាក់ព័ន្ធនឹងនយោបាយផ្ទៃក្នុងជាតិ។ គួរកត់សម្គាល់ថាទោះបីលោកម៉ាកូស និងលោកស្រីសារ៉ាធ្វើការមិនចុះសម្រុងនឹងគ្នាយ៉ាងណាក្ដី ប៉ុន្តែលោកម៉ាកូសគ្មានសិទ្ធិអំណាចដកតំណែងលោកស្រីសារ៉ាទេ។ នៅក្នុងប្រព័ន្ធច្បាប់របស់ហ្វ៊ីលីពីន តំណែងប្រធានាធិបតី និងអនុប្រធានាធិបតីឯករាជ្យពីគ្នាព្រោះអ្នកទាំង២ត្រូវបានបោះឆ្នោតជ្រើសរើសដោយផ្ទាល់ពីប្រជាជន។ ម៉្យាងទៀត គោលជំហររបស់អ្នកដែលកាន់តំណែងទាំង២នេះជួនកាលមិនស្របគ្នាទេ៕ ប្រភព៖ រ៉យទ័រ និងប្រភពដទៃទៀត
ចែករំលែកព័តមាននេះ