ទីក្រុងប៊ែឡាំង៖ អធិការបតីអាល្លឺម៉ង់ លោកហ្វ្រីតរីចម៊ែក (Friedrich Merz) ថ្លែងថាអាមេរិកកំពុងត្រូវបានអ៊ីរ៉ង់ «ធ្វើឱ្យអាម៉ាស់មុខ» នៅក្នុងសង្គ្រាមដែលអាមេរិកជាអ្នកចាប់ផ្ដើមឡើងដោយខ្លួនឯង រួចហើយបញ្ចប់ដោយខ្លួនឯងតាមរយៈការប្រកាសបទឈប់បាញ់ដោយឥតកំណត់ពេលវេលា។ លោកម៊ែកព្រមានថាទីក្រុងវ៉ាស៊ីនតោនខ្វះខាតមាគ៌ាច្បាស់លាស់ដើម្បីចាកចេញពីជម្លោះប្រដាប់អាវុធនេះ។ ទន្ទឹមនឹងនោះ លោកប្រមើលឃើញថាអ៊ីរ៉ង់បែរជាមានប្រៀបលើអាមេរិកទៅវិញ។
លោកម៊ែកថ្លែងនៅចំពោះមុខនិស្សិតនៅទីក្រុងម៉ាស្បឺក(Marsberg) ថាបញ្ហាអ៊ីរ៉ង់ស្ដែងឱ្យឃើញនូវបញ្ហាចោទជាយុទ្ធសាស្ត្រកាន់តែខ្លាំងសម្រាប់អាមេរិកបើប្រៀបធៀបនឹងចំណាត់ការនៅពេលមុនៗ។ លោកថាបញ្ហានៅក្នុងជម្លោះប្រភេទនេះគឺថាអ្នកដើរចូលទៅក្នុងសង្គ្រាម ហើយអ្នកត្រូវតែរកវិធីដើរចេញពីសង្គ្រាមនេះវិញដែរ។ យើងបានតាមដានបញ្ហានេះដោយយកចិត្តទុកដាក់បំផុតអស់រយៈពេលម្ភៃឆ្នាំនៅក្នុងបញ្ហាអាហ្វហ្កានីស្ថាន។ យើងមើលឃើញបញ្ហានេះកើតឡើងនៅអ៊ីរ៉ាក់។
លោកម៊ែកសម្លឹងឃើញមន្ត្រីរដ្ឋាភិបាលអ៊ីរ៉ង់ចេះជំនាញចរចាយ៉ាងប៉ុនប្រសប់បំផុត ហើយថែមទាំងមានភាពឆ្លាតវៃជាងអ្វីដែលយើងបានគិតពីមុនមក។ លោកថ្លែងបន្តទៀតថា «ប្រទេសជាតិមួយ (អាមេរិក) កំពុងត្រូវបានធ្វើឱ្យអាម៉ាស់មុខដោយថ្នាក់ដឹកនាំអ៊ីរ៉ង់» ជាពិសេសដោយឆ្មាំបដិវត្តអ៊ីរ៉ង់តែម្ដង។ លោកម៊ែកអំពាវនាវឱ្យអាមេរិកបិទបញ្ចប់សង្គ្រាមនេះឱ្យបានឆាប់រហ័ស។ លោកព្រមានថាចំហាយនៃសង្គ្រាមនេះចាប់ផ្ដើមជះផលអាក្រក់ទៅលើសេដ្ឋកិច្ចរបស់អាល្លឺម៉ង់ជាបណ្ដើរៗហើយ។
លោកថាគឺនៅក្នុងគ្រានេះហើយដែលអ្វីៗពោរពេញដោយភាពរញ៉េរញ៉ៃ។ វាធ្វើឱ្យយើងបាត់បង់ថវិកាជាច្រើន។ សង្គ្រាមប្រឆាំងនឹងអ៊ីរ៉ង់បានជះឥទ្ធិពលដោយផ្ទាល់ទៅលើផលិតភាពសេដ្ឋកិច្ចរបស់យើង។ មេដឹកនាំអាល្លឺម៉ង់រូបនេះថ្លែងថារដ្ឋាភិបាលរបស់លោកត្រៀមខ្លួនរួចហើយដើម្បីបញ្ជូននាវារាវគ្រាប់មីននៅក្នុងទឹកសមុទ្រដើម្បីជួយបើកផ្លូវសម្រាប់កប៉ាល់នានាធ្វើដំណើរកាត់ច្រកសមុទ្រហ័រម៉ូស។ ប៉ុន្តែលោកសង្កត់ធ្ងន់ថាចំណាត់ការរាវមីនអាចធ្វើទៅបានលុះត្រាតែភាគីទាំង២បិទបញ្ចប់អរិភាពជាមួយគ្នាជាមុនសិន៕ ប្រភព៖ អាល់ចាស៊ីរ៉ា (Al Jazeera) និងប្រភពដទៃទៀត
ចែករំលែកព័តមាននេះ