រាជធានីភ្នំពេញ ៖ បុរសម្នាក់ ត្រូវរថយន្តកិនស្លាប់នៅនឹងកន្លែង ហើយនារីជាគូដណ្ដឹង និងនារីម្នាក់ទៀត បានរងរបួសធ្ងន់ស្រាល ខណៈពេលម៉ូតូ២គ្រឿង ជិះក្នុងទិសដៅស្របគ្នា ទាក់ដៃចង្កូត…
រាជធានីភ្នំពេញ ៖ បុរសម្នាក់ ត្រូវរថយន្តកិនស្លាប់នៅនឹងកន្លែង ហើយនារីជាគូដណ្ដឹង និងនារីម្នាក់ទៀត បានរងរបួសធ្ងន់ស្រាល ខណៈពេលម៉ូតូ២គ្រឿង ជិះក្នុងទិសដៅស្របគ្នា ទាក់ដៃចង្កូត ដួលហើយត្រូវរថយន្ត Lexus RX300 កិនចំដងខ្លួន ។
ហេតុការណ៍គ្រោះថ្នាក់នេះបានកើតឡើងកាលពីវេលាម៉ោង០២និង១៥នាទីរសៀលថ្ងៃទី២៧ ខែមេសា ឆ្នាំ២០២៦ នៅតាមបណ្តោយផ្លូវភ្នំពេញហាណូយ (ផ្លូវ១០១៩) ក្នុងភូមិអន្លង់ក្ងាន សង្កាយឃ្មួញ ខណ្ឌសែនសុខ រាជធានីភ្នំពេញ ។
ជនរងគ្រោះដែលបានស្លាប់បាត់បង់ជីវិត ឈ្មោះ ផាន សុខសាន្ត ភេទប្រុស អាយុ២៥ឆ្នាំ មានអាសយដ្ឋានភូមិជីនាងឃុំតាំងក្រសៅ ស្រុកប្រាសាទសំបូរ ខេត្តកំពង់ធំ។ ចំណែកនារីជាគូដណ្តឹងរងរបួសឈ្មោះ វឿន សុខលី ភេទស្រី អាយុ២០ឆ្នាំ ជានិស្សិត ។ ចំណែកអ្នកបើកបររថយន្តមានឈ្មោះ ឡុង ចិន អាយុ៤៣ឆ្នាំ អាស័យដ្ឋានបច្ចុប្បន្នបន្ទប់ជួល ភូមិប៉ប្រក សង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ ត្រូវសមត្ថកិច្ចឃាត់ខ្លួនចាត់ការតាមច្បាប់ ។
តាមសាក្សីបានឲ្យដឹងថា នៅមុនពេលកើតហេតុ ជនរងគ្រោះពីរនាក់គូដណ្ដឹង បានជិះម៉ូតូមួយគ្រឿង ម៉ាក Beat ពណ៌ស ពាក់ផ្លាកលេខកំពត 1U-8437 ដោយធ្វើដំណើរក្នុងទិសដៅពីត្បូងមកជើង ខណៈពេលធ្វើដំណើរមកដល់ត្រង់ចំណុច ក៏បានប៉ះជាមួយ
ម៉ូតូមួយគ្រឿងទៀត ម៉ាក Beat ពណ៌ស ពាក់ផ្លាកលេខ ភ្នំពេញ 1LE-1309 បើកបរដោយនារីម្នាក់ ដែលបើកបង្អង់ល្បឿនបត់ឆ្លងផ្លូវ បណ្ដាលឲ្យដួល ។ ស្របពេលនោះ ក៏មានរថយន្តមួយគ្រឿង ម៉ាក Lexus RX300 ពណ៌ខ្មៅ ពាក់ផ្លាកលេខ ព្រះសីហនុ 2B-4171 ធ្វើដំណើរមកពីក្រោយ ក៏បានកិនបុរស ដែលជាគូដណ្តឹងបណ្ដាលឲ្យស្លាប់នៅនឹងកន្លែង ។ ចំណែកនារីជាគូដណ្ដឹង បានរងរបួសស្រាល ។ ដោយឡែកនារីម្នាក់ទៀត ដែលបើកម៉ូតូមួយគ្រឿងទៀត ក៏បានរងរបួសធ្ងន់ ។ ភ្លាមៗនោះ អ្នកបើកបររថយន្ត ត្រូវបានសមត្ថកិច្ចឃាត់ខ្លួន។ បន្ទាប់ពីកើតមានគ្រោះថ្នាក់ ក៏មានមន្ត្រីមូលដ្ឋាន ក៏បានចុះទៅសម្រួលចរាចរណ៍រួច ទាក់ទងទៅនគរបាលចរាចរណ៍ ចុះទៅវាស់វែង រួចនាំយករថយន្ត និងអ្នកបើកបរ ព្រមទាំងម៉ូតូពីគ្រឿង ទៅកាន់ការិយាល័យចរាចរណ៍ផ្លូវគោក ដើម្បីចាត់ការតាមច្បាប់ ។ សពត្រូវបានក្រុមគ្រួសារនាំយកទៅធ្វើបុណ្យតាមប្រពៃណី ៕
ចែករំលែកព័តមាននេះ