ទីក្រុងញូយ៉ក៖ តម្លៃប្រេងឆៅតាមហាងឆេងអន្តរជាតិថ្ងៃនេះឡើងថ្លៃបន្ថែមទៀតបន្ទាប់ពីក្រុមអ្នកវិនិយោគខាងវិស័យនេះហាក់ខកចិត្តនឹងគម្រោងចរចាគ្នារវាងអាមេរិក និងអ៊ីរ៉ង់ដែលត្រូវលោកដូណាល់ត្រាំលុបចោលវិញ។ ប្រេងឆៅតាមហាងឆេងអឺរ៉ុប (Brent) ឡើងថ្លៃ២% មានន័យថាលក់ចេញ១០៦,៩៩ដុល្លារក្នុងមួយបារ៉ែល (១៥៩លីត្រ)។ ក្រៅពីនេះ ស្ថានភាពទិញ-លក់ភាគហ៊ុននៅផ្សារមូលប័ត្រនៅទ្វីបអាស៊ីហាក់ដូចជាមិនសូវមានបញ្ហាប៉ុន្មានឡើយ។
ហ៊ុននីកេរបស់ជប៉ុនឡើងថ្លៃ០,៩% ខណៈដែលហ៊ុន KOSPI របស់កូរ៉េខាងត្បូងឡើងថ្លៃ១,៥%នៅពេលចាប់ផ្ដើមជួញដូរកាលពីព្រឹកមិញ។ សូមរំលឹកថាកាលពីយប់ថ្ងៃអាទិត្យ លោកដូណាល់ត្រាំសម្រេចចិត្តលុបចោលគម្រោងជួបគ្នារវាងគណៈប្រតិភូអាមេរិក និងអ៊ីរ៉ង់នៅទីក្រុងឥស្លាមម៉ាបាត ប្រទេសប៉ាគីស្ថាន។ លោកអះអាងថានៅក្នុងជួរថ្នាក់ដឹកនាំអ៊ីរ៉ង់កំពុងមានបញ្ហារញ៉េរញ៉ៃ និងប្រជែងអំណាចគ្នា។ ដូច្នេះ លោកមិនដឹងថាតើនរណាមានសិទ្ធិអារកាត់នៅក្នុងបញ្ហានេះពិតប្រាកដ។
រដ្ឋមន្ត្រីការបរទេសអ៊ីរ៉ង់ លោកអារ៉ាក់ឈី បន្ទាប់ពីចាកចេញពីប៉ាគីស្ថាន និងអូម៉ង់ លោកបានធ្វើដំណើរទៅដល់ប្រទេសរុស្ស៊ីហើយនៅថ្ងៃនេះដើម្បីជួបពិភាក្សាការងារជាមួយលោកពូទីន និងមន្ត្រីរដ្ឋាភិបាលរុស្ស៊ីដទៃទៀត។ នេះជាផ្នែកមួយនៃកិច្ចខិតខំប្រឹងប្រែងរបស់រដ្ឋាភិបាលទីក្រុងតេអេរ៉ង់ដើម្បីរំដោះខ្លួនចេញពីភាពទ័លច្រកនៃនយោបាយការទូត។ ទស្សនកិច្ចរបស់លោកអារ៉ាក់ឈីលើកនេះកើតឡើងចំពេលដែលអាមេរិក និងអ៊ីរ៉ង់គ្មានដំណោះស្រាយអ្វីទេក្រៅពីបទឈប់បាញ់ដ៏ផុយស្រួយដែលលោកត្រាំបន្តសុពលភាពឥតកំណត់ពេលវេលា។
នៅពេលក្រុមអ្នកចរចាអាមេរិក និងអ៊ីរ៉ង់ខិតខំទាំងត្រដរដើម្បីទម្លុះទម្លាយភាពទ័លច្រក អ៊ីរ៉ង់នៅតែបន្តគំរាមកំហែងចំពោះការធ្វើនាវាចរណ៍នៅច្រកសមុទ្រហ័រម៉ូស។ ដូចនេះ វិស័យដឹកជញ្ជូនទំនិញ និងប្រេងឆៅកាត់ទីនោះនៅតែមានបញ្ហាដដែល។ ឥឡូវនេះ អាមេរិក និងអ៊ីរ៉ង់ហាក់ដូចជាចងជើងគ្នាទៅវិញទៅមក។ អាមេរិក ថ្វីដ្បិតបន្តសុពលភាពនៃបទឈប់បាញ់ ប៉ុន្តែបន្តបិទខ្ទប់ដែនសមុទ្រអ៊ីរ៉ង់មិនឱ្យកប៉ាល់ចេញចូលកំពង់ផែបានឡើយ។ អាមេរិកថាទាល់តែអ៊ីរ៉ង់យល់ព្រមបើកច្រកហ័រម៉ូស និងទទួលយកកិច្ចព្រមព្រៀងសន្តិភាពជាមុនសិនទើបខ្លួនលុបចោលការបិទខ្ទប់។ ចំណែកអ៊ីរ៉ង់ថាខ្លួនមិនអាចទទួលយកលក្ខខណ្ឌដ៏ច្រើនសន្ធឹកសន្ធាប់ និងគ្មានភាពប្រាកដនិយមរបស់អាមេរិកបានឡើយ៕ ប្រភព៖ អាល់ចាស៊ីរ៉ា (Al Jazeera) និងប្រភពដទៃទៀត
ចែករំលែកព័តមាននេះ