ខេត្តបាត់ដំបង ៖ ទំនិញខុសច្បាប់ «ស្រា និងបារី» រាប់សិបកេស និងប៊ិក ត្រូវបានក្រុមជនទុច្ចរិតដឹងជញ្ជូនយ៉ាងគគ្លើនទម្លុះរបាំងការពារព្រំដែនចេញទៅប្រទេសថៃបានដោយជោគជ័យ កាលពីយប់ថ្ងៃទី២៦ មេសា…
ខេត្តបាត់ដំបង ៖ ទំនិញខុសច្បាប់ «ស្រា និងបារី» រាប់សិបកេស និងប៊ិក ត្រូវបានក្រុមជនទុច្ចរិតដឹងជញ្ជូនយ៉ាងគគ្លើនទម្លុះរបាំងការពារព្រំដែនចេញទៅប្រទេសថៃបានដោយជោគជ័យ កាលពីយប់ថ្ងៃទី២៦ មេសា នៅក្នុងភូមិសាស្ត្រ ឃុំបារាំងធ្លាក់ ស្រុកភ្នំព្រឹក ខណៈកម្លាំងយោធាឆ្មក់បង្ក្រាបបានសម្រេចនូវទំនិញខុសច្បាប់(ពងមាន់កូនស៊ីឈ័ននាំមកពីចិន)បានចំនួនជាង១.៤០០គ្រាប់ ដែលស្ត្រីម្នាក់បម្រុងបញ្ជូន«ឆ្លងអូរព្រំដែន»ចេញទៅប្រទេសថៃ ក្នុងភូមិសាស្ត្រ ឃុំបឹងរាំង ស្រុកកំរៀង ។ នេះបើតាមប្រភពព័ត៌មានដែលកោះសន្តិភាពទទួលបានពីមន្ត្រីការពារព្រំដែន ។
សេចក្ដីរាយការណ៍បានឲ្យដឹងថា នៅម៉ោងប្រហែល៨យប់ថ្ងៃទី២៦ មេសា ប្រជាពលរដ្ឋបានតាមទាន់មនុស្សមួយក្រុម ដែលកំពុងលីសែងការ៉ុង ដែលមានស្រាដប និងបារី ជាច្រើនការ៉ុងឆ្លងអូរព្រំដែនតាមច្រករបៀងតូចមួយដែលនៅក្បែរស្នាក់ការប៉ុស្ដិ៍ចក្រី គ្រប់គ្រងដោយកម្លាំងវរនគរបាលការពារព្រំដែនលេខ៨១៧ ស្ថិតក្នុងភូមិចក្រី ឃុំបារាំងធ្លាក់ ស្រុកភ្នំព្រឹក ។
ក្រុមជនទុច្ចរិតប៉ុន្មាននាក់នោះ មិននិយាយឆ្លងឆ្លើយជាមួយអ្នកជជីកសួរនាំទេ បើទោះជាអ្នកសួរនាំព្យាយាមសួររកម្ចាស់ទំនិញក្ដី ។
ផ្ទុយទៅវិញ ពួកគេគិតតែពីលើកទំនិញដែលច្រកការ៉ុងលីឆ្លងអូរព្រំដែនយ៉ាងគគ្លើន ដោយមិនខ្វល់ពីអ្នកតាមថត ឬខ្លាចសមត្ថកិច្ចតាមចាប់ឡើយ ។ បើតាមការពិនិត្យលើសកម្មភាពដឹកជញ្ជូនទំនិញឆ្លងដែនយ៉ាងគគ្លើនរបស់ក្រុមជនទុច្ចរិតប៉ុន្មាននាក់នេះ ហាក់មានអ្នកបើកផ្លូវ ឬមានអ្នកចាំការពារសុវត្ថិភាពនៅក្បែរៗនោះទៀតផង រហូតពួកគេជញ្ជូនទំនិញខុសច្បាប់នេះ ឆ្លងព្រំដែនបានដោយជោគជ័យ មិនមានការរំខានពីកម្លាំងសមត្ថកិច្ចបន្តិចណាឡើយ ។
ដោយឡែក នៅឯស្រុកកំរៀងឯណោះវិញ មន្ត្រីការពារព្រំដែនបានផ្ដល់ព័ត៌មានថា ទំនិញ«ពងមាន់កូនស៊ីឈ័ន»ប្រមាណ០៤ការ៉ុង ស្មើនឹងចំនួន១,៤៤០គ្រាប់ ដែលស្ត្រីម្នាក់បម្រុងនាំឆ្លងព្រំដែនចេញទៅប្រទេសថៃដែរ ត្រូវបានបង្ក្រាប និងទប់ស្កាត់បានទាន់ពេលវេលា ដោយកម្លាំងយោធាក្នុងអង្គភាពកងពលតូចថ្មើរជើងលេខ៥៣ សហការជាមួយកម្លាំងទំនាក់ទំនងព្រំដែនច្រកទ្វារអន្តរជាតិ«ដូង» ។
របាយការណ៍បឋមដែលកោះសន្តិភាពទទួលបាន កម្លាំងយោធាកងពលតូចលេខ៥៣ និងមន្ត្រីទំនាក់ទំនងព្រំដែនខាងលើនេះ បានចុះបង្ក្រាបទំនិញខុសច្បាប់នេះ កាលពីវេលាម៉ោង២រំលងអធ្រាត្រឈានចូលថ្ងៃទី២៧ មេសា ត្រង់ចំណុច«កំពង់ឈើ»ក្បែរព្រំដែន ស្ថិតក្នុងភូមិសាស្ត្រភូមិអូរដាលើ ឃុំបឹងរាំង ស្រុកកំរៀង ។ កិច្ចប្រតិបត្តិការទាំងកណ្ដាលអធ្រាត្ររបស់កម្លាំងយោធានេះ ក្រៅពីរឹបអូសទំនិញ «ពងមាន់កូន»ចំនួន១,៤៤០គ្រាប់ ថែមទាំងបានឃាត់ខ្លួនម្ចាស់ទំនិញនេះផង គឺឈ្មោះ លន នឿន ភេទស្រី អាយុ៣៦ឆ្នាំ រស់នៅចំណុចកើតហេតុ ។ ស្ត្រីម្នាក់នេះ បានលាក់ទុកទំនិញខុសច្បាប់នេះ នៅក្នុងផ្ទះរបស់ខ្លួន ខណៈទំនិញមួយចំនួនបានបញ្ជូនឆ្លងផុតពីព្រំដែនចូលទឹកដីថៃ រួចទៅហើយ មុនពេលកម្លាំងយោធាចុះបង្ក្រាប ។ នេះបើតាមការបញ្ជាក់នៅក្នុងរបាយការណ៍ ។
នៅចំពោះមុខកម្លាំងចម្រុះដែលចុះត្រួតពិនិត្យ និងឆែកឆេរ ដែលមានទាំងមន្ត្រីគយផង ស្ត្រីម្នាក់នេះបាននិយាយថា «ពងមាន់កូន» ឬហៅថា «ពងមាន់ស៊ីឈ័ន» ទាំងនេះ នាំចូលមកពីប្រទេសចិន ។ ហើយខ្លួនត្រៀមនាំចេញបន្តទៅកាន់ប្រទេសថៃ ប៉ុន្តែទើបលួចនាំឆ្លងអូរព្រំដែនបានមួយចំនួន ក៏ត្រូវសមត្ថកិច្ចចុះទៅទាន់ល្មម ។
មន្ត្រីចុះបង្ក្រាបបានប្រាប់ថា ឈ្មួញទុច្ចរិតម្នាក់នេះ បានបញ្ជូនទំនិញឆ្លងអូរព្រំដែនតាមខ្សែពួរចងពីត្រើយម្ខាងទៅត្រើយម្ខាង ។ មុនពេលកម្លាំងសយោធាចុះទៅដល់ គឺស្ត្រីម្នាក់នេះ បានឲ្យកម្មករបញ្ជូនទំនិញឆ្លងអូរទៅទឹកដីថៃ រួចផុតអស់មួយចំនួនទៅហើយ ។ ប៉ុន្តែយ៉ាងណា កម្លាំងចម្រុះដកហូតយកពង់មាន់នេះបានចំនួន០៤ការ៉ុង ស្មើនឹងចំនួន១,៤៤០គ្រាប់ បានប្រគល់ជូនខាងមន្ត្រីគយចាត់ការតាមនីតិវិធីហើយ ។
សូមបញ្ជាក់ថា ការរត់ពន្ធទំនិញ«ឆ្លងព្រំដែន»ដោយខុសច្បាប់ពីកម្ពុជា ទៅកាន់ប្រទេសថៃ ក្នុងពេលនេះ បាននិងកំពុងបង្ហាញពីសកម្មភាពដ៏គគ្លើនរបស់ពួកឈ្មួញទុច្ចរិត ខណៈដែលមេឈ្មួញទាំងនោះមិនត្រូវបានឃាត់ខ្លួន ។
អាជ្ញាធរតាមបណ្ដាស្រុកជាប់ព្រំដែន និងលោកមេខេត្ត សុទ្ធតែបង្ហាញការប្ដេជ្ញាចិត្តខ្ពស់ ក្នុងការតាមបង្ក្រាប ឬទប់ស្កាត់នូវទំនិញឆ្លងដែនខុសច្បាប់ទាំងនេះ ហើយថែមទាំងអួតថា នឹងធ្វើការស្រាវជ្រាវតាមរកចាប់ពួកមេឈ្មួញទុច្ចរិតយកមកផ្តន្ទាទោសទៀតផង ។ ប៉ុន្តែរហូតមកទល់ពេលនេះ «សារ៉ូ» ។
ពួកឈ្មួញទុច្ចរិត ហាក់បង្កើនសកម្មភាពរត់ពន្ធទំនិញឆ្លងដែនកាន់តែសម្បើមដៃទាំងថ្ងៃ ទាំងយប់ នៅស្រុកកំរៀង ស្រុកភ្នំព្រឹក និងស្រុកសំពៅលូន ៕
ចែករំលែកព័តមាននេះ