ប្រទេសថៃ ៖ កាលពីថ្មីៗនេះ រឿងរ៉ាវដ៏ហួសចិត្តមួយបានឡើងនៅក្នុងប្រទេសថៃ បន្ទាប់ពីបុរសជនជាតិថៃម្នាក់ ឈ្មោះ Bangla ដែលជាបុគ្គលិកសន្តិសុខ ហើយក៏ជាអ្នកបង្កើតមាតិកាវីដេអូ (Content…
ប្រទេសថៃ ៖ កាលពីថ្មីៗនេះ រឿងរ៉ាវដ៏ហួសចិត្តមួយបានឡើងនៅក្នុងប្រទេសថៃ បន្ទាប់ពីបុរសជនជាតិថៃម្នាក់ ឈ្មោះ Bangla ដែលជាបុគ្គលិកសន្តិសុខ ហើយក៏ជាអ្នកបង្កើតមាតិកាវីដេអូ (Content Creator) នៅលើបណ្តាញសង្គម TikTok ត្រូវបានបង្ខំចិត្តឈប់ពីការងារ បន្ទាប់ពីរងសម្ពាធ និងការធ្វើទុក្ខបុកម្នេញផ្សេងៗ ដោយសារតែមានមុខមាត់ស្រដៀងខ្លាំងនឹងស្តេចថៃ រាមាទី ១០។
បើតាមប្រភពព័ត៌មានថៃ Bright TV កាលពីថ្ងៃទី២៦ ខែមេសា ឆ្នាំ២០២៦ បានឱ្យដឹងថា ការបាត់បង់ការងាររបស់លោក Bangla កើតឡើងបន្ទាប់ពីអតីតបុគ្គលិកសន្តិសុខរូបនេះ បានលុបចោលមាតិការបស់ខ្លួន និងប្រឈមមុខនឹងការតាមដានពីប៉ូលិសនៅកន្លែងធ្វើការថែមទៀត។
ដោយសារសម្ពាធនេះ ទើបធ្វើឱ្យលោក Bangla បាត់បង់ការងារជាសន្តិសុខ។ ទំព័រហ្វេសប៊ុក Cineview Viewer 4K បានបង្ហោះរឿងរ៉ាវរបស់ Bang La រួមជាមួយសំនួរមួយថា តើគាត់បានធ្វើអ្វីខុស?
នៅក្នុងរយៈពេលប៉ុន្មានថ្ងៃថ្មីៗនេះ គណនី TikTok របស់ Bangla ផ្ទុះការចាប់អារម្មណ៍ខ្លាំង ដោយមានការចូលមើលរាប់សិបលានដងក្នុង១វីដេអូ នៅពេលដែលអ្នកចូលមើលបានបញ្ចេញមតិថា បុរសរូបនេះមានមុខមាត់ស្រដៀងស្តេចរាមាទី ១០ រហូតដល់ផ្ទុះខ្លាំងក្លាយទៅជាប្រធានបទក្តៅ។
ទោះយ៉ាងណាក៏ដោយ មិនយូរប៉ុន្មាន ស្រាប់តែវីដេអូទាំងអស់ត្រូវបានលុបចោល បង្កើតការងឿងឆ្ងល់ពីអ្នកតាមដាន។ ប៉ុន្តែក្រោយមក ទើបគ្រប់គ្នាដឹងថា ប៉ូលិសបានបញ្ជាឱ្យ Bangla លុបវីដេអូទាំងអស់ចេញ និងបង្ខំបុរសរូបនេះឱ្យប្តូរម៉ូដសក់។ មិនតែប៉ុណ្ណោះ ត្រូវពាក់ម៉ាស់បិទមុខរាល់ពេលឡាយវីដេអូ និងត្រូវផ្អាកពីការងារសន្តិសុខ។ ជាលទ្ធផល ក្រោយមក គ្រប់គ្នាបានឃើញ Bangla ផ្លាស់ប្តូរម៉ូដសក់ និងពាក់ម៉ាស់នៅក្នុងការឡាយរបស់ខ្លួន។
ពាក់ព័ន្ធបញ្ហានេះ អ្នកលេងបណ្តាញសង្គមថៃជាច្រើនហួសចិត្តយ៉ាងខ្លាំង ព្រោះមិននឹកស្មានគ្រាន់តែមានមុខមាត់ស្រដៀងស្តេច Bangla ត្រូវជួបទុក្ខលំបាកបែបនេះសោះ។ ជាក់ស្តែង កញ្ញា Ice Rakchanok Srinok សមាជិកសភាមកពីគណបក្សប្រជាជនថៃ បានប្រើប្រាស់បណ្តាញសង្គមផ្ទាល់ខ្លួន ដើម្បីផ្តល់ការគាំទ្រដល់ Bangla ដែលកំពុងប្រឈមមុខនឹងប្រតិកម្មខ្លាំងៗ ដោយសារតែបញ្ហាមុខមាត់របស់ខ្លួន។
បើតាមប្រភពពីសារព័ត៌មានថៃ Thaiger បានរាយការណ៍ថា នៅយប់ថ្ងៃទី២៦ ខែមេសា ឆ្នាំ២០២៦ កញ្ញា Ice Rakchanok Srinok បានបង្ហោះសារមួយនៅលើហ្វេសប៊ុក ដើម្បីអំពាវនាវរកយុត្តិធម៌សម្រាប់អតីតសន្តិសុខរូបនេះ ដោយស្នើសុំយុត្តិធម៌សម្រាប់ Bangla ព្រោះការធ្វើទុក្ខបុកម្នេញហួសហេតុលើបុគ្គលិកសន្តិសុខរូបនេះ ដើម្បីផ្គាប់ចិត្តថ្នាក់លើ ឬច្បាប់ដែលមានភាពចម្រូងចម្រាស មិនគួរធ្វើឱ្យជីវិតនរណាម្នាក់មានការលំបាកនោះទេ នៅពេលដែលពួកគេមិនបានធ្វើអ្វីខុស៕
ចែករំលែកព័តមាននេះ