ខេត្តកំពង់ចាម ៖ គិតរហូតមកដល់ល្ងាចថ្ងៃទី២៦ មេសា ឆ្នាំ២០២៦ មានរយៈពេល៣ថ្ងៃហើយ ដែលក្រុមចោរបានធ្វើសកម្មភាពលួចយកកាបូបលុយរបស់អាជីវករម្នាក់នៅផ្សារបឹងកុក ក្រុងកំពង់ចាម មិនទាន់ត្រូវបានចាប់ខ្លួននៅឡើយទេ។ ខណៈសមត្ថកិច្ចបានអះអាងថាកំពុងតែស្រាវជ្រាវរកមុខសញ្ញា។…
ខេត្តកំពង់ចាម ៖ គិតរហូតមកដល់ល្ងាចថ្ងៃទី២៦ មេសា ឆ្នាំ២០២៦ មានរយៈពេល៣ថ្ងៃហើយ ដែលក្រុមចោរបានធ្វើសកម្មភាពលួចយកកាបូបលុយរបស់អាជីវករម្នាក់នៅផ្សារបឹងកុក ក្រុងកំពង់ចាម មិនទាន់ត្រូវបានចាប់ខ្លួននៅឡើយទេ។ ខណៈសមត្ថកិច្ចបានអះអាងថាកំពុងតែស្រាវជ្រាវរកមុខសញ្ញា។
តាមប្រភពពីអាជីវករលក់ដូរម្នាក់ឈ្មោះឈន់បានរៀបរាប់ប្រាប់ឱ្យដឹងថា ដំបូងមានក្រុមចោរជិះម៉ូតូម៉ាកស្គុបពីមួយគ្រឿងពណ៌ខ្មៅមិនចាំស្លាកលេខបានជិះមកឈប់នៅកន្លែងគ្រែលក់បន្លែរបស់គាត់ដោយទិញដើមខាត់ណាតម្លៃមួយម៉ឺនរៀល ។ គ្រានោះអ្នកលក់ឯទៀតបានត្រឡប់ទៅផ្ទះសឹងតែទាំងអស់ព្រោះល្ងាចទៅហើយ ។ ចៃដន្យស្រាប់តែថង់ធ្លាយបន្លែជ្រុះគាត់ក៏ឱនយកមកដាក់លើគ្រែវិញ ក្រោយពេលទិញបន្លែបានហើយ ក្រុមចោរបានជិះម៉ូតូត្រឡប់ទៅទិសខាងត្បូង ស្របពេលដែលគាត់ងាកមកមើលកាបូបលុយ ស្រាប់តែបាត់ហើយក៏ស្រែកឆោឡោផ្អើលគេឯងតែម្តង។
អាជីវករលក់ដូរបានប្រាប់បន្តឲ្យដឹងទៀតថា គ្រានោះគាត់បានរត់តាមក្រោយសួរអ្នកលក់នៅខាងក្រៅគេថាឃើញក្មេងប្រុសម្នាក់ឱបកាបូបលុយមកទិសខាងជើងផ្សារឡើងជិះម៉ូតូគេចខ្លួនបាត់តែម្ដង ។ បន្ទាប់មកគាត់បានរាយការណ៍ជូនដល់ក្រុមសន្តិសុខផ្សារបឹងកុកបានប្រកូកប្រកាសតាមវិទ្យុទាក់ទង នាំគ្នាតាមរកមុខសញ្ញាចោរលួចកាបូបដែលបាត់កាលពីល្ងាចថ្ងៃទី២៤ មេសា ឆ្នាំ២០២៦ គឺមិនឃើញទាល់តែសោះ។
អាជីវករខាងលើបានលើកឡើងថានៅក្នុងកាបូបនោះមានសោម៉ូតូពីរចង្កោម ទូរសព្ទដៃពីរគ្រឿងកូនទើបនឹងទិញឲ្យ អត្តសញ្ញាណប័ណ្ណប្ដីប្រពន្ធពីរសន្លឹកគឺរូបគាត់និងប្ដីឈ្មោះឈី រួមទាំងថវិកាមួយចំនួន ដោយមិនបង្អង់យូរក៏ប្រញាប់ប្រញ៉ាល់ទៅដាក់ពាក្យបណ្ដឹងនៅប៉ុស្តិ៍រដ្ឋបាលសង្កាត់កំពង់ចាម ដើម្បីឲ្យសមត្ថកិច្ចជួយស្រាវជ្រាវរកមុខអត្តសញ្ញាណក្រុមចោរលួច។
សូមបញ្ជាក់ថា ប្រហែលមួយខែមុននេះអាជីវករលក់ដូរនៅផ្សារបឹងកុកម្នាក់ ធ្លាប់ត្រូវចោរលួចកាបូបលុយអស់ទឹកប្រាក់ចំនួន៤លានរៀល អាចទំនងជាក្រុមចោរតែមួយ ៕
ចែករំលែកព័តមាននេះ