ទីក្រុងវ៉ាស៊ីនតោន៖ លោកដូណាល់ត្រាំថ្លែងថាប្រទេសអ៊ីរ៉ង់អាចទាក់ទងទៅអាមេរិកបានប្រសិនបើពួកគេចង់ចរចាគ្នាដើម្បីបញ្ចប់សង្គ្រាម។ លោកថ្លែងនៅក្នុងបទសម្ភាសជាមួយទូរទស្សន៍ហ្វក់ (Fox) ថាប្រសិនបើពួកគេចង់ចរចាគ្នា ពួកគេអាចធ្វើដំណើរមកជួបយើង ឬមិនអីចឹងទេ ពួកគេអាចហៅទូរស័ព្ទមករកយើងក៏បានដែរ។ អ្នកដឹងទេ ទូរស័ព្ទមានស្រាប់ហើយទេតើ។…
ទីក្រុងវ៉ាស៊ីនតោន៖ លោកដូណាល់ត្រាំថ្លែងថាប្រទេសអ៊ីរ៉ង់អាចទាក់ទងទៅអាមេរិកបានប្រសិនបើពួកគេចង់ចរចាគ្នាដើម្បីបញ្ចប់សង្គ្រាម។ លោកថ្លែងនៅក្នុងបទសម្ភាសជាមួយទូរទស្សន៍ហ្វក់ (Fox) ថាប្រសិនបើពួកគេចង់ចរចាគ្នា ពួកគេអាចធ្វើដំណើរមកជួបយើង ឬមិនអីចឹងទេ ពួកគេអាចហៅទូរស័ព្ទមករកយើងក៏បានដែរ។ អ្នកដឹងទេ ទូរស័ព្ទមានស្រាប់ហើយទេតើ។ យើងមានខ្សែទូរស័ព្ទដែលល្អ និងមានប្រព័ន្ធសន្តិសុខគ្រប់គ្រាន់។
កាលពីម្សិលមិញ លោកត្រាំស្រាប់តែសម្រេចចិត្តលុបចោលគម្រោងធ្វើដំណើររបស់បេសកជនពិសេសរបស់លោកគឺលោកស្ទីវវីតខូស និងកូនប្រសារបស់លោកទៅទីក្រុងឥស្លាមម៉ាបាត ប្រទេសប៉ាគីស្ថាន ក្រោមហេតុផលថានៅក្នុងផ្ទៃក្នុងថ្នាក់ដឹកនាំកំពូលៗរបស់អ៊ីរ៉ង់ពោរពេញដោយភាពរញ៉េរញ៉ៃ មិនដឹងថានរណាជាមេកោយពិតប្រាកដ។ រដ្ឋមន្ត្រីការបរទេសអ៊ីរ់ង់បន្ទាប់ពីធ្វើដំណើរទៅដល់ប៉ាគីស្ថាន និងពិភាក្សាការងារមួយចំនួនរួចហើយ លោកក៏បន្តដំណើរទៅប្រទេសអូម៉ង់។
យោងតាមទីភ្នាក់ងារព័ត៌មានអ៊ីរ៉ង់ លោកត្រាំប្រកាសថាអំណឹះតទៅ លោកឈប់បញ្ជូនគណៈប្រតិភូទៅចរចាជាមួយអ៊ីរ៉ង់ទៀតហើយ។ ដូចលោកជម្រាបជូនពីខាងលើអីចឹងគឺថាបើចង់ចរចាគ្នា អ៊ីរ៉ង់ត្រូវធ្វើដំណើរទៅជួបអាមេរិក ឬហៅទូរស័ព្ទទៅអាមេរិកតែម្ដង។ លោកថាយើងអាចចរចាគ្នាបានតាមចិត្តពួកគេចង់។ ប៉ុន្តែយើងលែងបញ្ជូនគណៈប្រតិភូធ្វើដំណើររយៈពេល១៨ម៉ោងទៅជួបគ្នាដូចកាលពីមុនទៀតហើយ។
លោកត្រាំថ្លែងថាលោកសូមសម្ដែងការគោរពដ៏ខ្ពង់ខ្ពស់បំផុតចំពោះប្រទេសប៉ាគីស្ថានដែលតែងតែធ្វើជាម្ចាស់ផ្ទះរៀបចំការចរចាគ្នារវាងអាមេរិក និងអ៊ីរ៉ង់។ លោកថាប៉ាគីស្ថាននៅតែចូលរួមនៅក្នុងការចរចាគ្នាជានិច្ច។ លោកត្រាំសូមបញ្ជាក់ជាថ្មីថាអ៊ីរ៉ង់មិនអាចមានអាវុធនុយក្លេអ៊ែរជាដាច់ខាត។ ហេតុនេះ បើពួកគេចង់ចរចាគ្នា ពួកគេអាចទាក់ទងតាមទូរស័ព្ទមកយើង។ ប៉ុន្តែជាថ្មីម្ដងទៀត ពួកគេយល់ច្បាស់ណាស់ថាអ្វីដែលជាលក្ខខណ្ឌតម្រូវឱ្យមាននៅក្នុងកិច្ចព្រមព្រៀង។ នោះជារឿងងាយស្រួលបំផុត៖ ពួកគេមិនអាចមានអាវុធនុយក្លេអ៊ែរ។ បើមិនដូច្នេះទេ យើងគ្មានហេតុផលអ្វីត្រូវជួបគ្នាទេ៕ ប្រភព៖ រ៉យទ័រ និងប្រភពដទៃទៀត
ចែករំលែកព័តមាននេះ