ទីក្រុងកៀវ៖ នៅថ្ងៃរំលឹកខួបទី៤០ឆ្នាំនៃសោកនាដកម្មឆេះរោងចក្រនុយក្លេអ៊ែរនៅឆឺណូប៊ីល (Chernobyl) កាលពីឆ្នាំ១៩៨៦ (កាលណោះអ៊ុយក្រែនជាផ្នែកមួយនៃសហភាពសូវៀត) ប្រមុខដឹកនាំអ៊ុយក្រែន លោកហ្សេឡិនស្គី បាននិយាយរិះគន់រុស្ស៊ីយ៉ាងចាស់ដៃ។ ប្រជាជនអ៊ុយក្រែនបានប្រមូលផ្ដុំគ្នាដើម្បីរំលឹកទៅដល់ព្រឹត្តិការណ៍ដ៏សោកសៅដែលពិភពលោកចាត់ទុកជាគ្រោះមហន្តរាយផ្នែកនុយក្លេអ៊ែរធំជាងគេនៅក្នុងប្រវត្តិសាស្ត្រពិភពលោក។ ពោលគឺជាវិនាសកម្មធំជាងការទម្លាក់គ្រាប់បែកនុយក្លេអ៊ែរនៅហ៊ីរ៉ូស៊ីម៉ា និងណាហ្កាសាគីទៅទៀត។
ពួកអ៊ុយក្រែនប្រមូលផ្ដុំគ្នារំលឹកទៅដល់ដួងវិញ្ញាណក្ខន្ធជនជាតិរបស់ខ្លួនដែលបានធ្វើអនិច្ចធម្មទៅកាន់បរលោកដោយសារហេតុការណ៍បែកធ្លាយសារធាតុវិទ្យុសកម្មចេញពីរោងចក្រនៅក្នុងគ្រានោះ រួមជាមួយមនុស្សរាប់សែននាក់ទៀតដែលរងគ្រោះដោយសារត្រូវចំហាយវិទ្យុសកម្មក្រោយហេតុការណ៍នោះ។ លោកហ្សេឡិនស្គីចោទប្រកាន់ថារុស្ស៊ីនៅតែបន្តនូវអ្វីដែលលោកហៅថា «អំពើភេរវកម្មនុយក្លេអ៊ែរ» ដោយបង្ហោះដ្រូនពីលើដែនអាកាសនៃទីតាំងដែលធ្លាប់ឆេះរោងចក្រនោះ។
លោកបានបង្ហោះសារនៅលើបណ្ដាញសង្គមថាអំពើឈ្លានពានរបស់រុស្ស៊ីមកលើអ៊ុយក្រែនជាការរុញច្រានពិភពលោកទៅរកមាត់ជ្រោះនៃមហន្តរាយដែលបង្កឡើងដោយស្នាដៃរបស់មនុស្ស។ ហ្សេឡិនស្គីកត់សម្គាល់ថាដ្រូនរបស់រុស្ស៊ីតែងតែហោះហើររំលងទីតាំងរោងចក្រនុយក្លេអ៊ែរនៅឆឺណូប៊ីលនោះជាប់ជាប្រចាំ។ មានករណីម្ដងនោះកាលពីឆ្នាំមុន ដ្រូន១គ្រឿងវាយប្រហារចំគម្របការពាររបស់រោងចក្រនេះថែមទៀតផង។ ហេតុនេះ វាបង្កជាហានិភ័យនៃការបែកធ្លាយសារធាតុវិទ្យុសកម្ម។
ហ្សេឡិនស្គីថ្លែងបន្តទៀតថាពិភពលោកមិនត្រូវបណ្ដោយឱ្យអំពើភេរវកម្មនុយក្លេអ៊ែរនេះកើតឡើងជាបន្តទៀតឡើយ។ វិធីដែលប្រសើរបំផុតគឺបង្ខំឱ្យរុស្ស៊ីបញ្ឈប់ទង្វើដ៏ខ្ជីខ្ជារបស់ខ្លួន។ ទន្ទឹមនឹងពេលដែលអ៊ុយក្រែនរំលឹកខួប៤០ឆ្នាំ បើគេក្រឡេកទៅមើលស្ថានភាពនៅទីក្រុងស្លាវូទីច (Slavutych) ឯណោះវិញ ប្រជាជនអ៊ុយក្រែនក៏បានប្រមូលផ្ដុំគ្នាតាំងពីយប់ថ្ងៃសៅរ៍ដើម្បីគោរពដួងវិញ្ញាណក្ខន្ធអ្នកដែលបានពលីជីវិតនៅពេលបោសសម្អាតកាកសំណល់វិទ្យុសកម្មក្រោយហេតុការណ៍ឆេះរោងចក្រ និងក៏គោរពដួងវិញ្ញាណក្ខន្ធអ្នកដែលបានស្លាប់នៅអំឡុងពេលឆេះរោងចក្រផងដែរ។
សូមជម្រាបថាក្រោយហេតុការណ៍ឆេះរោងចក្រនៅឆឺណូប៊ីលឆ្នាំ១៩៨៦ សហភាពសូវៀតបានប្រមូលកម្លាំងពីក្នុងចំណោមកងទ័ព, ភ្នាក់ងារអគ្គិភ័យ, កម្មករអណ្ដូងរ៉ែ, គ្រូពេទ្យ និងវិស្វករដែលរស់នៅក្នុងរដ្ឋចំណុះរបស់ខ្លួនដើម្បីឱ្យពួកគេបំពេញការងារបោសសម្អាតសារធាតុវិទ្យុសកម្មដែលសាយភាយនៅលើដី និងនៅលើអាកាស។ ពួកគេមានគ្នា៦សែននាក់បំពេញការងារប្រឈមនឹងសារធាតុវិទ្យុសកម្មកម្រិតខ្ពស់៕ ប្រភព៖ យួរ៉ូ ញូស៍ (Euro News) និងប្រភពដទៃទៀត
ចែករំលែកព័តមាននេះ