រាជធានីភ្នំពេញ ៖ យុវជនម្នាក់បានជិះម៉ូតូ១គ្រឿង ដេញតាមចាក់សម្លាប់ស្ត្រីជាសង្សារ និងបងថ្លៃប្រុសរបស់នាង ដែលកំពុងជិះម៉ូតូដឹកគ្នាទៅធ្វើការ ខណៈនោះក៏មានការប្រវាយប្រតប់ និងដេញចាក់គ្នាទៅវិញទៅមកតាមដងផ្លូវ បណ្ដាលឲ្យយុវជនខាងលើ និងបុរសជាបងថ្លៃរបស់ស្ត្រីដែលជាអតីតសង្សារនោះស្លាប់ទាំង២នាក់តែម្ដង…
រាជធានីភ្នំពេញ ៖ យុវជនម្នាក់បានជិះម៉ូតូ១គ្រឿង ដេញតាមចាក់សម្លាប់ស្ត្រីជាសង្សារ និងបងថ្លៃប្រុសរបស់នាង ដែលកំពុងជិះម៉ូតូដឹកគ្នាទៅធ្វើការ ខណៈនោះក៏មានការប្រវាយប្រតប់ និងដេញចាក់គ្នាទៅវិញទៅមកតាមដងផ្លូវ បណ្ដាលឲ្យយុវជនខាងលើ និងបុរសជាបងថ្លៃរបស់ស្ត្រីដែលជាអតីតសង្សារនោះស្លាប់ទាំង២នាក់តែម្ដង ។
ហេតុការណ៍ខាងលើនោះបានកើតឡើងបង្កឲ្យមានការភ្ញាក់ផ្អើលកាលពីវេលាម៉ោង៥និង៣០នាទីព្រឹកព្រលឹមថ្ងៃទី២៦ ខែមេសា ឆ្នាំ២០២៦ នៅតាមផ្លូវ៦០ម៉ែត្រ ស្ថិតនៅក្នុងភូមិព្រែកថ្លឹង សង្កាត់ជើងឯក ខណ្ឌដង្កោ រាជធានីភ្នំពេញ ។
បុរសនោះឈ្មោះតុល ចាន់ណា អាយុ២៤ឆ្នាំ មុខរបរលក់ដូរ មានស្រុកកំណើតនៅភូមិជើងកួន ឃុំជើងកួន ស្រុកសំរោង ខេត្តតាកែវ និងមានទីលំនៅបច្ចុប្បន្ននៅបុរីពិភពថ្មីចំការដូង សង្កាត់ដង្កោ ខណ្ឌដង្កោ រាជធានីភ្នំពេញ ។
ចំណែកស្ត្រីជាអតីតសង្សារឈ្មោះយី សំណាង ហៅយ៉ា អាយុ២៤ឆ្នាំ មុខរបរឆុងកាហ្វេលក់ មានទីលំនៅបុរីពិភពថ្មីកួរស្រូវ៣ ភូមិកណ្ដាល សង្កាត់រលួស ខណ្ឌដង្កោ នាងមិនបានរងរបួសនោះឡើយ ។ រីឯបុរសដែលជាបងថ្លៃរបស់នាង ដែលបានស្លាប់ដែរនោះឈ្មោះសេម បូរី អាយុប្រមាណជាង៣០ឆ្នាំ មានទីលំនៅភូមិស្រុកចេក សង្កាត់ជើងឯក ខណ្ឌដង្កោ ។
នគរបាលប៉ុស្តិ៍ជើងឯកបាននិយាយថា នៅកន្លែងកើតហេតុបានរកឃើញកាំបិតចុងស្រួច១ប្រឡាក់ទៅដោយឈាមនៅលើចិញ្ចើមផ្លូវ ដែលជារបស់យុវជនសង្ស័យឈ្មោះតុល ចាន់ណា ប្រើប្រាស់សម្រាប់ចាក់ទៅលើស្ត្រីឈ្មោះយី សំណាង ហៅយ៉ា ដែលជាអតីតសង្សារ និងឈ្មោះសេម បូរី ដែលជាបងថ្លៃរបស់នាង ។ ក្រៅពីនេះបានឃើញសាកសពអ្នកទាំង២ដេកស្លាប់នៅលើផ្លូវ៦០ម៉ែត្រនោះ ចម្ងាយប្រមាណ៥ទៅ៦ម៉ែត្រពីគ្នា និងមានម៉ូតូ២គ្រឿងទៀតនៅកន្លែងកើតហេតុ ក្នុងនោះ១គ្រឿងម៉ាកហុងដាស្កូបពីពណ៍ស និង ១គ្រឿងទៀតម៉ាកហុងដាឌ្រីមសេ១២៥ ពណ៍ខ្មៅ ព្រមទាំទូរស័ព្ទដៃ១គ្រឿង ហើយភ្លាមៗនោះនគរបាលក៏បានអញ្ជើញនាងយី សំណាង ទៅសាកសួរបំភ្លឺនៅប៉ុស្តិ៍ជើងឯកផងដែរ ។
នគរបាលដដែលបាននិយាយបន្តទៀតថា តាមការសួរនាំត្រួសៗ ជំហានដំបូង នាងយី សំណាង ហៅយ៉ា បានប្រាប់ថា នាងនិងយុវជន តុល ចាន់ណា ដែលជាជនសង្ស័យ គឺជាអតីសង្សារនិងគ្នា ដែលបានចែកផ្លូវគ្នារយៈពេលជាង១ឆ្នាំកន្លងមកហើយ ។ ប៉ុន្តែជននោះតែងតែបានឆាតនិងតាមរករឿងរញ៉េរញ៉ៃគំរាមលើរូបនាងរហូតមកមិនឈប់សោះ ចំណែកនៅវេលាព្រឹកថ្ងៃកើតហេតុ ដោយខ្លាចមានបញ្ហាកើតឡើង ទើបបុរសជាបងថ្លៃប្រុសរស់នាងឈ្មោះសេម បូរី បានជិះម៉ូតូ១គ្រឿងម៉ាកហុងដាស្កូបពីពណ៍ស ពាក់ស្លាកលេខតាកែវ1AE-7524 ជូននាងចេញពីផ្ទះនៅម្ដុំកួរស្រូវ ទៅធ្វើការនៅម្ដុំផ្សារទំនើបអ៊ីអន៣ ។
នគរបាលបានប្រាប់បន្តទៀតថា ខណៈពេលមកដល់ត្រង់ចំណុចស្ពានអាកាសសម្ដេចមហាបវរធិបតីហ៊ុនម៉ាណែត នៅម្ដុំឃុំព្រែកហូរ ក្រុងតាខ្មៅ ខេត្តកណ្ដាល ស្រាប់តែជនសង្ស័យជាអតីតសង្សាររូបនោះ ជិះម៉ូតូ១គ្រឿងម៉ាកហុងដាឌ្រីមសេ១២៥ ពណ៍ខ្មៅ ពណ៍ខ្មៅ ពាក់ស្លាកលេខកណ្ដាល1Y-1596 ដេញតាមនិងយកដុំថ្មគប់មកលើរូបនាងនិងបងថ្លៃម្ដងរួចមកហើយ ប៉ុន្តែនាងនិងបងថ្លៃបានបន្តដំណើរជាធម្មតាមិនតបតឡើយ ។ បន្ទាប់មកអតីតសង្សាររូបនោះ ក៏បានជិះម៉ូតូដេញតាមរករឿង រហូតមកដល់ត្រង់ចំណុចកើតហេតុខាងលើ ក៏យកកាំបិតចុងស្រួចដេញចាក់សម្លាប់នាង ហើយបងថ្លៃប្រុសរបស់នាង ក៏បានជួយការពារនាង និងប្រវាយប្រតប់គ្នា ជាមួយជនសង្ស័យ ហើយក៏ត្រូវជននោះចាក់ត្រូវ បណ្ដាលឲ្យរងរបួស ។
នគរបាលបានបញ្ជាក់ប្រាប់បន្ថែមទៀតថា ខណៈនោះការប្រវាយប្រតប់គ្នានៅតែបន្ត ហើយបងថ្លៃនាងដណ្ដើមបានកាំបិតចាក់តបតលើជនសង្ស័យនោះវិញ បណ្ដាលឲ្យរងរបួសដែរ បន្ទាប់មកអ្នកទាំង២ ទាំងបងថ្លៃនាង និងជនសង្ស័យជាអតីតសង្សារបានស្លាប់បាត់បង់ជីវិតទាំង២នាក់ភ្លាមៗនៅនឹងកន្លែងតែម្ដង ។ ទោះបីជាបែបណារឿងរ៉ាវលម្អិតជាងនេះនៅមិនទាន់ដឹងនៅឡើយទេ ព្រោះពេលនេះស្ត្រីខាងលើកំពុងស្ថិតក្រោមការសួកសួរបន្ថែមពីសំណាក់នគរបាលនៅឡើយ ។
ដោយឡែកស្ត្រីម្នាក់ឈ្មោះទិន ស្រីទូច ដែលត្រូវជាម្ដាយបង្កើតរបស់យុវជនសង្ស័យឈ្មោះតុល ចាន់ណា បាននិយាយផងយំផងដូច្នេះថា៖ កូនប្រុសគាត់និងនាងយី សំណាង គឺជាសង្សារនិងគ្នា ដែលបានស្រលាញ់គ្នាច្រើនឆ្នាំមកហើយ គឺតាំងពីនៅរៀនជាមួយគ្នាមកម្ល៉េះ ។ ប៉ុន្តែរូបគាត់មិនដែលធ្លាប់បានស្គាល់នាងម្នាក់នោះឡើយ គ្រាន់តែឮកូនគាត់ប្រាប់ថាស្រលាញ់គ្នា និងជាសង្សារនិងគ្នាប៉ុណ្ណោះ និងប្រាប់គាត់ទៀតថា អ្នកទាំង២បានសន្សំប្រាក់ដែលរកសុីបានជាមួយគ្នាទៀតផង ។ លុះក្រោយមកចំណងស្នេហ៍អ្នកទាំង២នាក់នោះមានភាពរកាំរកូស ហើយក៏បានឈានដល់ផ្លូវបែក និងបានបែកគ្នារយៈពេលជាង១ឆ្នាំកន្លងមកហើយ ។
ស្ត្រីជាម្ដាយរូបនោះបាននិយាយបន្តទៀតថា ក្រោយពេលបែកគ្នា កូនប្រុសគាត់បានទាមទារឲ្យចែកប្រាក់ដែលបានរកសុីសន្សំជាមួយគ្នានោះពីស្ត្រីជាអតីសង្សារនោះវិញ ប៉ុន្តែទារអត់បានទេ ដោយនាងម្នាក់នោះបានបដិសេធន៍ថា មិនបានយកលុយពីកូនប្រុសគាត់ឡើយ ។ ដោយឡែកនៅវេលាយប់ថ្ងៃទី២៥ ខែមេសា ឆ្នាំ២០២៦ កូនប្រុសគាត់បានជិះម៉ូតូតាមនិយាយគ្នាជាមួយនាងជាអតីសង្សារនោះ ដោយកូនប្រុសប្រាប់គាត់ថាចង់និយាយជាមួយនាងតែ២-៣ម៉ាត់ប៉ុណ្ណោះ ប៉ុន្តែនាងពេលនោះនាងមិនព្រមឈប់និយាយជាមួយសោះ ហើយនាងបានខលហៅបងថ្លៃប្រុសខាងលើ និងបងប្រុសបង្កើតរបស់នាងម្នាក់ទៀតឲ្យទៅជួយនាងទៀតផង ។
អ្នកស្រី ទិន ស្រីទូច បាននិយាយបន្ថែមទៀតថា ពេលនោះបងប្រុសបង្កើតបានឃាត់ មិនឲ្យឈ្លោះគ្នាទេ ប៉ុន្តែបុរសដែលជាបងថ្លៃខាងលើ ដែលមិនបានដឹងរឿងអីសោះផងនោះ ក៏បានវាយកូនប្រុសគាត់ (នេះបើតាមកូនប្រុសគាត់និយាយប្រាប់គាត់មុនពេលស្លាប់នៅវេលាយប់នោះ) ។ ពេលនោះរូបគាត់ដែលជាម្ដាយក៏មិនបានដឹងថាកូនគាត់អាក្រក់ ឬក៏កូនគេអាក្រក់នោះ ក៏គាត់មិនដឹងដែរ ប៉ុន្តែគាត់បានណែនាំកូនប្រុសកុំឲ្យតាមរករឿងគេអី ព្រោះបើតាមច្បាប់គេអាចដាក់ពាក្យបណ្ដឹងប្ដឹងយើងបាន ។ លុះក្រោយមកទៀតគាត់មិនដឹងរឿងអ្វីទៀតទេ លុះនៅវេលាព្រឹកថ្ងៃកើតហេតុ ក៏ស្រាប់ទទួលដំណឹងដ៏អកុសលបែបនេះទៅវិញ ហើយពេលមកដល់កន្លែងកើតហេតុគាត់បានឃើញកូនប្រុស និងបងថ្លៃស្ត្រីជាអតីតសង្សារកូនប្រុសគាត់នោះស្លាប់ទាំង២នាក់បាត់ទៅហើយ ៕
ចែករំលែកព័តមាននេះ