រាជធានីភ្នំពេញ ៖ មន្ត្រីអនុរក្សពន្ធនាគារម្នាក់ដែលរាប់អានធ្វើមិត្តភក្តិជា មួយអ្នកធ្លាប់ជាប់ពន្ធនាគារ ផ្ទុយទៅវិញមិត្តភាពបានក្លាយជាការជូរចត់ ហើយបានបង្ហាញច្បាស់ថា ឆ្កែកន្ទុយខ្វៀននៅតែខ្វៀនមានន័យថា ចោរនៅតែចោរ។ បានជាហ៊ាននិយាយបែបនេះដោយសារតែលទ្ធផលបង្ហាញថា ជនធ្លាប់
រាជធានីភ្នំពេញ ៖ មន្ត្រីអនុរក្សពន្ធនាគារម្នាក់ដែលរាប់អានធ្វើមិត្តភក្តិជាមួយអ្នកធ្លាប់ជាប់ពន្ធនាគារ ផ្ទុយទៅវិញមិត្តភាពបានក្លាយជាការជូរចត់ ហើយបានបង្ហាញច្បាស់ថា ឆ្កែកន្ទុយខ្វៀននៅតែខ្វៀនមានន័យថា ចោរនៅតែចោរ។ បានជាហ៊ាននិយាយបែបនេះដោយសារតែលទ្ធផលបង្ហាញថា ជនធ្លាប់ជាប់គុកនោះមិនបោះបង់ទង្វើអាក្រក់របស់ខ្លួននោះទេ ទីបំផុតមន្ត្រីអនុរក្សពន្ធនាគារបានក្លាយជាជនរងគ្រោះដោយសារមិត្តភក្តិជាចោរនោះល្បួងឱ្យផឹកស៊ីពីកន្លែងមួយទៅកន្លែងមួយ បន្ទាប់មកជនកំហូចបានប្លន់យករថយន្ត១គ្រឿង ព្រមទាំងគ្រឿងអលង្ការ និងលុយមួយចំនួន ហើយបានគេចខ្លួនបាត់ស្រមោល។ រីឯជនរងគ្រោះរូបនោះបានអ្នករត់ម៉ូតូឌុបប្រទះឃើញឌុបទៅផ្ទះ ទើបបង្កឱ្យមានការភ្ញាក់ផ្អើលយ៉ាងខ្លាំង ហើយក្រុមគ្រួសារបានប្តឹងប៉ូលិសឱ្យជួយអន្តរាគមន៍ភ្លាមៗដែរ ប៉ុន្តែសូម្បីស្រមោលជនសង្ស័យនោះរកមិនឃើញផង។
មន្ត្រីអនុរក្សពន្ធនាគាររូបនោះត្រូវបានគេប្រទះឃើញកាលពីវេលាម៉ោង៤និង៣០នាទី ទៀបភ្លឺថ្ងៃទី១ សីហា នៅលើផ្លូវចំការដូង ត្រង់ចំណុចអតីតស្ពានដែក ភូមិសំបួរ សង្កាត់ដង្កោ ខណ្ឌដង្កោ ។ ជនរងគ្រោះឈ្មោះហ៊ូ សេន អាយុ៤០ឆ្នាំ ជាមន្ត្រីអនុរក្សពន្ធនាគារព្រៃស ស្នាក់នៅក្បែរមណ្ឌលកែប្រែម១ បានបាត់បង់អស់រថយន្ត១គ្រឿង ម៉ាកតូយ៉ូតា ស៊ើបពណ៌ទឹកប៊ិច ពាក់ស្លាកលេខភ្នំពេញ 2G-4077 ខ្សែ.កមាស១តម្លឹង ខ្សែដៃប្លាទីន២តម្លឹង លុយ៦០ម៉ឺនរៀល និងនាឡិកាដៃម៉ាក Rado ១គ្រឿង។ ចំណែកឯជនសង្ស័យដែលជាមិត្តភក្តិឈ្មោះវណ្ណ អាយុ៣៧ឆ្នាំ ជាមុខសញ្ញាទើបចេញពីពន្ធនាគារថ្មីៗ ហើយពុំដឹងថា មានទីលំនៅនៅឯណានោះឡើយ។
តាមប្រភពព័ត៌មានបានឱ្យដឹងថា នៅវេលាម៉ោង១០ព្រឹកថ្ងៃទី៣១ កក្កដា ជនសង្ស័យនិងជនរងគ្រោះព្រមទាំងប្រពន្ធបាននាំគ្នាទៅសីុផឹកនៅឯខេត្តតាកែវ ផ្ទះឪពុកម្តាយរបស់ជនរងគ្រោះ។ ពួកគេបានផឹកសីុជាមួយគ្នានៅទីនោះរហូតដល់ម៉ោង៦ល្ងាចថ្ងៃដដែល ទើបត្រឡប់មកភ្នំពេញវិញ ប៉ុន្តែមិនបានចូលផ្ទះនោះទេ លុះដល់វេលាម៉ោង៨យប់ ក៏បាននាំគ្នាចូលទៅច្រៀងខារា៉អូខេ នៅហាងសួនមនោរម្យ ស្ថិតនៅម្តុំចំការដូង សង្កាត់ដង្កោបន្តទៀត ។ ប្រភពដដែលបានឱ្យដឹងទៀតថា ក្រោយពេលច្រៀង និងផឹកសីុសប្បាយនៅទីនោះអស់ចិត្ត រហូតដល់ម៉ោង១១និង៣០នាទីពាក់កណ្តាលអធ្រាត្រ ទើបឈប់ ហើយស្ត្រីជាប្រពន្ធរបស់ជនរងគ្រោះបានក្រោកដើរចេញទៅគិតលុយឱ្យម្ចាស់ហាង។ ចំណែកឯជនរងគ្រោះស្រវឹងខ្លាំងរហូតលែងដឹងខ្លួនទៅហើយ ឆ្លៀតឱកាសប្រពន្ធជនរងគ្រោះចេញទៅគិតលុយបាត់ ជនសង្ស័យឈ្មោះវណ្ណ បានគ្រាហ៍ជនរងគ្រោះឡើងរថយន្តបើកចេញទៅបាត់ស្រមោល ។ ប្រភពដដែលបានបន្តទៀតថា ចំណែកឯស្ត្រីជាប្រពន្ធជនរងគ្រោះក្រោយពេលគិតលុយរួចហើយមិនឃើញប្តីមិនមានការសង្ស័យនោះទេ ដោយនឹកស្មានថា បុរសជាប្តីទៅជាមួយជនសង្ស័យនាំគ្នាទៅរកសប្បាយបន្តទៀត ហើយគាត់ក៏បានជិះម៉ូតូឌុបទៅផ្ទះវិញ តែម្នាក់ឯង ។
ដោយឡែកជនសង្ស័យក្រោយពេលគ្រាហ៍ជនរងគ្រោះចេញទៅពុំដឹងថា នាំទៅស៊ីផឹកនៅកន្លែងណាបន្តទៀតនោះទេ រហូតដល់វេលាម៉ោង៤និង៣០នាទីទៀបភ្លឺ ទើបដឹកយកទៅទម្លាក់ចោលនៅជិតអតីតស្ពានដែកភូមិសំបួរ សង្កាត់ដង្កោ តាមបណ្តោយផ្លូវចំការដូង រួចបានដោះយកគ្រឿងអលង្ការ លុយ និងរថយន្តគេចខ្លួនបាត់ស្រមោល៕
ចែករំលែកព័តមាននេះ