ទីក្រុងមូស្គូ៖ សង្គ្រាមរវាងរុស្ស៊ី និងអ៊ុយក្រែនបានឡើងកម្ដៅដល់កម្រិតសាហាវខ្លាំងកាលពីយប់មិញ បន្ទាប់ពីរុស្ស៊ីបានបើកការវាយប្រហារតាមអាកាសដ៏ធំបំផុតមួយ ដោយប្រើប្រាស់ដ្រូន និងមីស៊ីលជាង ៦០០គ្រឿង បាញ់ស្រោចលើទីក្រុងជាច្រើននៅទូទាំងប្រទេសអ៊ុយក្រែន។ អាជ្ញាធរអ៊ុយក្រែនបានបញ្ជាក់ថា មនុស្សយ៉ាងហោចណាស់ ៧នាក់បានបាត់បង់ជីវិត ដែលក្នុងនោះ ៥នាក់ស្លាប់នៅទីក្រុង Dnipro បន្ទាប់ពីគ្រាប់មីស៊ីលបានធ្លាក់ចំអគារស្នាក់នៅយ៉ាងដំណំ ខណៈដែលប្រតិបត្តិការសង្គ្រោះជនរងគ្រោះពីក្រោមគំនរបាក់បែកកំពុងបន្តយ៉ាងដុតដៃដុតជើង។ នេះបើយោងតាមការចុះផ្សាយរបស់សារព័ត៌មាន BBC នៅថ្ងៃទី២៥ ខែមេសានេះ។

ជាការឆ្លើយតបវិញ អ៊ុយក្រែនបានបង្ហាញសមត្ថភាពដ៏គួរឱ្យភ្ញាក់ផ្អើល ដោយបានបង្ហោះដ្រូនវាយបកចូលទៅក្នុងទឹកដីរុស្ស៊ីបានឆ្ងាយបំផុតមិនធ្លាប់មាន ដោយទៅដល់ទីក្រុង Yekaterinburg ដែលមានចម្ងាយរហូតដល់ ១,៦០០ គីឡូម៉ែត្រពីព្រំដែន បណ្តាលឱ្យមនុស្ស ៦នាក់រងរបួស។ ស្ថានភាពនេះក៏បានធ្វើឱ្យអង្គការណាតូមានការប្រុងប្រយ័ត្នខ្ពស់ផងដែរ ដោយយន្តហោះចម្បាំង​របស់ចក្រភពអង់គ្លេសដែលឈរជើងនៅរូម៉ានី ត្រូវបានបញ្ជាឱ្យហោះឡើងជាបន្ទាន់ដើម្បីត្រៀមស្ទាក់ចាប់ដ្រូនរុស្ស៊ីដែលហោះកៀកព្រំដែន។

ចំពេលដែលសមរភូមិកំពុងក្តៅគគុក និងការចរចាសន្តិភាពកំពុងជាប់គាំង ប្រធានាធិបតី ហ្សេឡេនស្គី បានបន្តកិច្ចខិតខំប្រឹងប្រែងផ្នែកការទូតដោយធ្វើដំណើរទៅជួបព្រះអង្គម្ចាស់មហាក្សត្រអារ៉ាប៊ីសាអូឌីត ដើម្បីពិភាក្សាលើការផលិតអាវុធរួមគ្នា និងពង្រឹងប្រព័ន្ធការពារអាកាស។ ទន្ទឹមនឹងនេះ រុស្ស៊ីបានអះអាងថាខ្លួនបានវាយដណ្ដើមយកបានភូមិ Bochkove ក្នុងតំបន់ Kharkiv បន្ថែមទៀត ដែលបង្ហាញថាការរុលទៅមុខរបស់កងទ័ពរុស្ស៊ីនៅតែបន្តធ្វើឡើងយ៉ាងសកម្មនៅតាមព្រំដែនភាគខាងជើង៕