ទីក្រុងប៊ែឡាំង៖ នាពេលឆាប់ៗនេះ ប្រទេសអាល្លឺម៉ង់ត្រៀមបញ្ជូននាវារាវមីនទៅសមុទ្រមេឌីទែរ៉ាណេដើម្បីបំពេញបេសកកម្មសំខាន់ដោះមីននៅច្រកសមុទ្រហ័រម៉ូសនៅពេលដែលសង្គ្រាមអ៊ីរ៉ង់បិទបញ្ចប់ទៅវិញ។ ខាងលើនេះជាការអះអាងរបស់អ្នកនាំពាក្យក្រសួងការពារជាតិអាល្លឺម៉ង់ប្រាប់ទីភ្នាក់ងារព័ត៌មានអាអែហ្វប៉េ។ ប្រទេសមួយចំនួនសុទ្ធតែអះអាងដូចៗគ្នាថាពួកគេត្រៀមខ្លួនចូលរួមនៅក្នុងបេសកកម្ម «អព្យាក្រិត» ដើម្បីធានាសន្តិសុខសម្រាប់ការធ្វើនាវាចរណ៍នៅច្រកហ័រម៉ូស។
កាលពីសប្ដាហ៍មុន អាមេរិកអះអាងថាខ្លួនចាប់ផ្ដើមដោះគ្រាប់មីនជាបណ្ដើរៗហើយក្រោមកិច្ចសហការជាមួយអ៊ីរ៉ង់។ ទោះជាយ៉ាងណាក្ដី អ៊ីរ៉ង់មិនទាន់បញ្ជាក់អំពីរឿងនេះនៅឡើយទេ។ នាវាឈ្មោះហ៊្វូលដា (Fulda) របស់កងទ័ពជើងទឹកអាល្លឺម៉ង់នឹងបញ្ជូនទៅមេឌីទែរ៉ាណេនាប៉ុន្មានថ្ងៃខាងមុខទៀត។ នេះបើយោងតាមអ្នកនាំពាក្យអាល្លឺម៉ង់។ គោលបំណងពិតគឺដើម្បីចូលរួមចំណែកឱ្យចេញជាសាច់ការជាមួយសម្ព័ន្ធមិត្តជាអន្តរជាតិក្នុងការការពារសេរីភាពខាងនាវាចរណ៍នៅច្រកនេះ។
សូមបញ្ជាក់ថានាវារាវមីនជាប្រភេទនាវាដែលផលិតចេញមកមានលក្ខណៈពិសេសអាចទប់ទល់នឹងគ្រាប់រំសេវបាន និងមានភាពអត់ធន់ខ្លាំងព្រោះត្រូវប្រឈមនឹងគ្រាប់មីនរាប់មិនអស់ដែលគេដាក់ពង្រាយនៅលើផ្ទៃសមុទ្រ។ នាវានេះមានតួនាទីចាប់សញ្ញាថាតើគ្រាប់មីនស្ថិតនៅទីណា រួចហើយក៏ស្រង់គ្រាប់មីនឡើងមកលើគោក។ ចំពោះករណីនាវាដោះមីនរបស់អាល្លឺម៉ង់នេះ នាវានឹងបោះយុថ្កាសំចតនៅមេឌីទែរ៉ាណេជាមួយនឹងនាវឹក៤៥នាក់។
ប៉ុន្តែនាវានេះមិនទាន់អាចបើកចូលច្រកហ័រម៉ូសទេ លុះត្រាតែសង្គ្រាមអ៊ីរ៉ង់ចប់ជាស្ថាពរសិន។ ម៉្យាងទៀតត្រូវឆ្លងកាត់ការអនុម័តយល់ព្រមពីរដ្ឋសភាអាល្លឺម៉ង់ថែមទៀត។ ឥឡូវនេះ មានសញ្ញាថាការចរចាគ្នារវាងអាមេរិក និងអ៊ីរ៉ង់អាចនឹងចាប់ផ្ដើមជាថ្មីនៅប្រទេសប៉ាគីស្ថាន។ ភាគីទាំង២បានបញ្ជូនគណៈប្រតិភូទៅទីក្រុងឥស្លាមម៉ាបាតរួចហើយ៕ ប្រភព៖ ឆេនណល ញូស៍ អេស៊ា (Channel News Asia) និងប្រភពដទៃទៀត
ចែករំលែកព័តមាននេះ