ខេត្តស្ទឹងត្រែង ៖ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តស្ទឹងត្រែង បានចាត់វិធានការដោយបញ្ជូនមន្ត្រីជំនាញ ចុះទៅដល់ចម្ការកសិករជាបន្ទាន់ ដើម្បីផ្តល់បច្ចេកទេស ទប់ស្កាត់ជំងឺងាប់ដើម លើដំណាំម្រះ…
ខេត្តស្ទឹងត្រែង ៖ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តស្ទឹងត្រែង បានចាត់វិធានការដោយបញ្ជូនមន្ត្រីជំនាញ ចុះទៅដល់ចម្ការកសិករជាបន្ទាន់ ដើម្បីផ្តល់បច្ចេកទេស ទប់ស្កាត់ជំងឺងាប់ដើម លើដំណាំម្រះ ដែលកំពុងគំរាមកំហែងដល់ជីវភាពកសិករក្នុងរដូវប្រមូលផល ។ សកម្មភាពការងារនេះ បានធ្វើឡើងកាលពីថ្ងៃទី២៥ ខែមេសា ឆ្នាំ២០២៦ បន្ទាប់ពីទទួលបានសេចក្តីរាយការណ៍ពីផលប៉ះពាល់ ។
លោក ទុំ នីរ៉ូ ប្រធានមន្ទីរកសិកម្មខេត្ត បានបញ្ជាឱ្យមន្ត្រីកសិកម្មប្រចាំឃុំ-សង្កាត់ ចុះទៅពិនិត្យ និងប្រឹក្សាបច្ចេកទេសជូនកសិករនៅភូមិកន្ទុយគោ សង្កាត់សាមគ្គី ក្រុងស្ទឹងត្រែង ។
លោកប្រធានមន្ទីរបញ្ជាក់ថា ការចុះអន្តរាគមន៍នេះ ធ្វើឡើងក្នុងគោលបំណងរួមគ្នាដោះស្រាយបញ្ហាប្រឈម ដើម្បីកាត់បន្ថយការខាតបង់ដើមទុន និងពេលវេលារបស់កសិករ ។
តាមការពិនិត្យជាក់ស្តែង លោក ផេង លីហេង មន្ត្រីកសិកម្មប្រចាំសង្កាត់សាមគ្គី បានរកឃើញថា ដំណាំម្រះទាំងនោះ កំពុងរងការវាយប្រហារដោយ “ជំងឺផ្សិតឫស” ដែលបណ្តាលឱ្យដើមងាប់ជាបន្តបន្ទាប់។ ដើម្បីទប់ស្កាត់មន្ត្រីជំនាញបានណែនាំ នូវវិធានការសំខាន់ៗ រួមមាន ៖ ការគ្រប់គ្រងទឹក ត្រូវប្តូរមកស្រោចទឹកនៅពេលព្រឹកព្រលឹមវិញ ចៀសវាងការស្រោចនៅពេលអាកាសធាតុក្តៅខ្លាំង។ ត្រូវខាន់រងកុំឱ្យមានលំហូរទឹកពីដើម ដែលងាប់ទៅកាន់ដើមថ្មី ព្រោះទឹកជាភ្នាក់ងារចម្លងមេរោគផ្សិត។ ត្រូវដកដើម ដែលរងការប៉ះពាល់ចោល ហើយជ្រោយដីហាលឱ្យស្ងួតដើម្បីសម្លាប់មេរោគផ្សិតស។ ត្រូវភ្ជួររាស់ដីហាលថ្ងៃឱ្យបានយ៉ាងតិច ១សប្តាហ៍ និងប្រើប្រាស់កំបោរសដើម្បីសម្លាប់មេរោគក្នុងដី មុននឹងចាប់ផ្តើមដាំដុះឡើងវិញ ។
លោកស្រី វណ្ណ គឹម កសិករម្ចាស់ចម្ការម្រះ បានសម្តែង នូវក្តីបារម្ភយ៉ាងខ្លាំង ដោយលោកស្រី បញ្ជាក់ថា ក្នុងរបរដាំដុះជាង ១០ឆ្នាំមក នេះមិន ដែលជួបប្រទះបញ្ហាងាប់ដើមក្នុងពេលកំពុងប្រមូលផលបែបនេះទេ។ ទោះជាយ៉ាងណា លោកស្រីបានប្តេជ្ញា នឹងអនុវត្តតាមការណែនាំរបស់មន្ត្រីជំនាញ និងជួយផ្សព្វផ្សាយបន្តទៅកាន់កសិករផ្សេងទៀត ដែលកំពុងជួបបញ្ហាដូចគ្នា ។
បច្ចុប្បន្ន ខេត្តស្ទឹងត្រែងមានក្រុមកសិករដាំបន្លែចំនួន ២១ក្រុម (ស្មើនឹងជិត៦០០គ្រួសារ) ដែលទទួលបានការគាំទ្រពីគម្រោងសាវប្បកម្មកម្ពុជា។ ក្នុងរដូវប្រាំងឆ្នាំនេះ បន្លែក្នុងខេត្តទទួលបានទិន្នផលល្អ និងកំពុងមានតម្លៃខ្ពស់នៅលើទីផ្សារ ដែលជាឱកាសសម្រាប់កសិករ ប្រសិនបើអាចគ្រប់គ្រងបញ្ហាសត្វល្អិត និងជំងឺបានល្អប្រសើរ ៕
ចែករំលែកព័តមាននេះ