រាជធានីភ្នំពេញ ៖ បុរសជាអ្នករត់កង់បីម្នាក់បានបាត់ខ្លួន ហើយត្រូវបានក្រុមគ្រួសារស្វែងរក ក៏បានប្រទះឃើញម៉ូតូកង់បីរបស់ប្ដី ត្រូវបានគេដុតកម្ទេចចោលនៅដីវាលមួយកន្លែងនៅក្នុងភូមិត្រពាំងពោធិ៍ សង្កាត់គោករការ ខណ្ឌព្រែកព្នៅ រាជធានីភ្នំពេញ ។…
រាជធានីភ្នំពេញ ៖ បុរសជាអ្នករត់កង់បីម្នាក់បានបាត់ខ្លួន ហើយត្រូវបានក្រុមគ្រួសារស្វែងរក ក៏បានប្រទះឃើញម៉ូតូកង់បីរបស់ប្ដី ត្រូវបានគេដុតកម្ទេចចោលនៅដីវាលមួយកន្លែងនៅក្នុងភូមិត្រពាំងពោធិ៍ សង្កាត់គោករការ ខណ្ឌព្រែកព្នៅ រាជធានីភ្នំពេញ ។ ទោះបីជាយ៉ាងណា គ្រឿងមួយចំនួនដូចជា ម៉ាស៊ីន កង់ និងស្លាកលេខបានបាត់ ។
ហេតុការណ៍បាត់ប្ដីនេះ បង្កឲ្យមានការភ្ញាក់ផ្អើលកាលពីវេលាយប់ថ្ងៃទី២៤ ខែមេសា ឆ្នាំ២០២៦ បន្ទាប់ពីស្ត្រីជាប្រពន្ធ និងក្រុមគ្រួសារបានស្វែងរកអ្នកសារព័ត៌មានផ្សព្វផ្សាយ និងឡាយពីដំណឹងដ៏សោកសៅនេះ ។
បុរសដែលបាត់ខ្លួនបន្សល់ទុកតែម៉ូតូកង់បី ត្រូវបានគេដុតបំផ្លាញនោះឈ្មោះថុន វិចិត្រ អាយុ៣៣ឆ្នាំ មុខរបរជាអ្នករត់ម៉ូតូកង់បី មានទីលំនៅបុរីចេនឡា ភូមិចុងថ្នល់ សង្កាត់ពន្សាំង ខណ្ឌព្រែកព្នៅរាជធានីភ្នំពេញ ។
តាមក្រុមគ្រួសារបានឲ្យដឹងថា បុរសជាអ្នករត់ម៉ូតូកង់បីរូបនោះ បានបាត់ខ្លួននៅវេលាម៉ោង ប្រមាណ២រំលងអធ្រាត្រ ចូលថ្ងៃទី២៤ ខែមេសា ឆ្នាំ២០២៦ ដោយពុំអាចទាក់ទងបាន ខណៈពេលដែលគាត់បានចេញទៅរត់ម៉ូតូកង់៣ប្រចាំនៅម្តុំផ្សារដីហុយ ។
តាមស្ត្រីជាប្រពន្ធបានអោយដឹងថា «ទម្លាប់ប្ដី ទោះរវល់យ៉ាងណា ក៏គាត់ផ្ញើរ Sticker តបវិញដែរ តែនេះចូលមើលហើយស្ងាត់សូន្យ សង្ស័យថា អ្នកដែលកំពុងកាន់ទូរស័ព្ទនោះ មិនមែនជាប្ដីគាត់ ឡើយ» ។ បន្ទាប់ពីបាត់ខ្លួន ក្រុមគ្រួសារនិងសាច់ញាតិបងប្អូនក៏បានស្វែងរកហើយទទួលដំណឹងថា ម៉ូតូកង់បីមួយគ្រឿងត្រូវបានគេដុតកម្ទេចចោលកាលពីវេលារសៀលថ្ងៃទី២៤ ខែមេសា ក៏ចុះទៅមើលទើបដឹងថា ម៉ូតូកង់បីនោះជាម៉ូតូកង់បីរបស់ប្ដី ។
តាមនគរបាលមូលដ្ឋានខណ្ឌព្រែកព្នៅបានឲ្យដឹងថា សំណល់ ម៉ូតូកង់បី ដែលត្រូវគេដុតចោលនោះត្រូវបានអ្នកនេសាទប្រទះឃើញកាលពីវេលាម៉ោងជាង៨ព្រឹក ថ្ងៃទី២៤ ខែមេសា ឆ្នាំ២០២៦នៅដីវាលមួយកន្លែងនៅភូមិត្រពាំងពោធិ៍ សង្កាត់គោករការ ខណ្ឌព្រែកព្នៅ រាជធានីភ្នំពេញ ។ លុះក្រោយមក នៅវេលារសៀលទើបដឹងដំណឹងដល់ក្រុមគ្រួសារ រួចមកដាក់ពាក្យបណ្ដឹង ដើម្បីឲ្យជួយរកប្ដីរបស់ខ្លួនដែលជាម្ចាស់កង់បី ។
សំណល់ម៉ូតូកង់បីដែលត្រូវគេដុតបំផ្លាញនោះ គេពុំឃើញមានម៉ាស៊ីន ដៃចង្កូត និងស្លាកលេខ ដែលគេសង្ស័យថា ត្រូវបានគេដោះចេញមុនពេលដុតបំផ្លាញចោល ។ ទោះបីជាយ៉ាងណា គេពុំដឹងថា ម៉ូតូកង់បីនោះ ត្រូវបានម្ចាស់ដុតបំផ្លាញចោលខ្លួនឯង ឬត្រូវបានអ្នកផ្សេងដុតបំផ្លាញនោះឡើយ? ។
ជុំវិញករណីនេះ សមត្ថកិច្ចនគរបាលខណ្ឌព្រែកព្នៅ ព្រមទាំងនគរបាលជំនាញព្រហ្មទណ្ឌនៃស្នងការនគរបាលរាជធានីភ្នំពេញ កំពុងស្រាវជ្រាវ ដើម្បីរកម្ចាស់កង់បីដែលបានបាត់ខ្លួននោះ ៕
ចែករំលែកព័តមាននេះ