ទីក្រុងតេអេរ៉ង់៖ ការចរចាសន្តិភាពរវាងអ៊ីរ៉ង់ និងអាមេរិកអាចចាប់ផ្ដើមនៅប្រទេសប៉ាគីស្ថាន។ គេរំពឹងថារដ្ឋមន្ត្រីការបរទេសអ៊ីរ៉ង់ លោកអាបាស់ អារ៉ាក់ឈី (Abbas Araghchi) ក៏នឹងមានវត្តមាននៅក្នុងឱកាសនោះផងដែរ។ ពោលគឺលោកនឹងធ្វើដំណើរទៅដល់ប្រទេសប៉ាគីស្ថាននៅយប់នេះតែម្ដង។…
ទីក្រុងតេអេរ៉ង់៖ ការចរចាសន្តិភាពរវាងអ៊ីរ៉ង់ និងអាមេរិកអាចចាប់ផ្ដើមនៅប្រទេសប៉ាគីស្ថាន។ គេរំពឹងថារដ្ឋមន្ត្រីការបរទេសអ៊ីរ៉ង់ លោកអាបាស់ អារ៉ាក់ឈី (Abbas Araghchi) ក៏នឹងមានវត្តមាននៅក្នុងឱកាសនោះផងដែរ។ ពោលគឺលោកនឹងធ្វើដំណើរទៅដល់ប្រទេសប៉ាគីស្ថាននៅយប់នេះតែម្ដង។ នេះបើយោងតាមការបង្ហើបឱ្យដឹងពីមន្ត្រីរដ្ឋាភិបាលប៉ាគីស្ថានបីរូប។ ប្រភព២នាក់ប្រាប់ថាក្រុមការងារខាងភស្តុភារ និងសន្តិសុខរបស់អាមេរិកក៏បានធ្វើដំណើរទៅដល់ប៉ាគីស្ថានរួចជាស្រេច។
ប្រភព២នាក់ប្រាប់ទីភ្នាក់ងារព័ត៌មានអេភី (AP) ថារដ្ឋមន្ត្រីការបរទេសអ៊ីរ៉ង់នឹងមានគណៈប្រតិភូខ្នាតតូចអមដំណើរលោកទៅប៉ាគីស្ថាន។ ទោះជាមានការអះអាងបែបនេះក្ដី គេមិនទាន់ឃើញមានការធ្វើអត្ថាធិប្បាយ ឬឆ្លើយតបពីទីក្រុងវ៉ាស៊ីនតោន ឬតេអេរ៉ង់នៅឡើយទេ។ ទីភ្នាក់ងារព័ត៌មានអ៊ីរ៉ង់រាយការណ៍ថាលោកអារ៉ាក់ឈីនឹងធ្វើដំណើរទៅទីក្រុងឥស្លាមម៉ាបាត, មូស្កាត់ និងម៉ូស្គូ។
ទីភ្នាក់ងារដដែលនេះរាយការណ៍ថាគោលបំណងសំខាន់នៃដំណើរទស្សនកិច្ចលើកនេះដើម្បីចូលរួមការផ្ដោះប្ដូរយោបល់គ្នា និងពិភាក្សាគ្នាអំពីស្ថានការណ៍វិវត្តថ្មីៗនៅក្នុងតំបន់ ក៏ដូចជាសភាពការណ៍ចុងក្រោយនៅក្នុងសង្គ្រាមអ៊ីរ៉ង់។ នៅថ្ងៃនេះ តម្លៃប្រេងឆៅធ្លាក់ចុះបន្តិចវិញដោយសារក្រុមអ្នកវិនិយោគមានសុទិដ្ឋិនិយមចំពោះការចរចាសន្តិភាព។ បន្ទាប់ពីឡើងថ្លៃ២%កាលពីមុននេះ តម្លៃប្រេងឆៅតាមហាងឆេងអឺរ៉ុប (Brent) ធ្លាក់ថ្លៃ០,៥% មានន័យថាលក់ចេញ១០៤,៥៧ដុល្លារក្នុងមួយបារ៉ែល។ ចំណែកប្រេងឆៅតាមហាងឆេងអាមេរិក (West Texas) ធ្លាក់ថ្លៃ១,១% ពោលគឺលក់ចេញមួយបារ៉ែលថ្លៃ៩៤,៨ដុល្លារ។
តាមពិត គេរំពឹងថានឹងមានការចរចាគ្នាតាំងពីថ្ងៃអង្គារសប្ដាហ៍នេះមកម៉្លេះ។ ប៉ុន្តែសម្រេចសម្រួចនៅទីបញ្ចប់គ្មានការជួបគ្នាអ្វីទាំងអស់។ កាលនោះ អ៊ីរ៉ង់អះអាងថាខ្លួនមិនទាន់ត្រៀមលក្ខណៈសម្បត្តិគ្រប់ជ្រុងជ្រោយដើម្បីចូលរួមការចរចាគ្នា។ ចំណែកគណៈប្រតិភូអាមេរិកដឹកនាំដោយលោកជេឌីវេននោះបានត្រឹមតែនិយាយចោលថានឹងទៅប៉ាគីស្ថាន។ ប៉ុន្តែជាក់ស្ដែង ពួកគេមិនបានចាកចេញពីវ៉ាស៊ីនតោនទេ។ ឥឡូវនេះស្រួលណាស់ ចង់ចរចាគ្នាពេលណាក៏បានដែរព្រោះលោកត្រាំហាក់ដូចជាលែងចង់វាយប្រហារអ៊ីរ៉ង់តទៅទៀតហើយ ហើយលោកប្រកាសបន្តសុពលភាពបទឈប់បាញ់ដោយឥតកំណត់ពេលវេលា៕ ប្រភព៖ ឆេនណល ញូស៍ អេស៊ា (Channel News Asia) និងប្រភពដទៃទៀត
ចែករំលែកព័តមាននេះ