ទីក្រុងកៀវ៖ រុស្ស៊ីវាយប្រហារអ៊ុយក្រែនដោយដ្រូន និងមីស៊ីលនៅតំបន់ឌីនីប្រូបណ្ដាលឱ្យស្លាប់មនុស្សយ៉ាងតិច៤នាក់ និងរបួស២១នាក់។ នេះបើយោងតាមការបង្ហើបឱ្យដឹងពីអាជ្ញាធរមូលដ្ឋាន។ គេបានរកឃើញសាកសពជនរងគ្រោះទាំងបួននាក់នៅក្នុងគំនរបាក់បែកនៃផ្ទះមួយខ្នងដែលឆេះដោយសារការវាយប្រហារកាលពីពេលយប់។ នេះបើយោងតាមអភិបាលតំបន់ឌីនីប្រូប៉េត្រូស លោកអូឡិចសាន់ដឺ កាន់ហ្សា (Oleksandr Ganzha)។
ប្រធានាធិបតីអ៊ុយក្រែន លោកហ្សេឡិនស្គី ថ្លែងថាមនុស្ស១១នាក់កំពុងសម្រាកព្យាបាលរបួសនៅមន្ទីរពេទ្យនៃទីក្រុងឌីនីប្រូបន្ទាប់ពីរុស្ស៊ីវាយប្រហារទីនោះ។ លោកកាន់ហ្សាបង្ហោះសារនៅលើតេឡេក្រាមពួករុស្ស៊ីវាយប្រហារឌីនីប្រូ, វាយប្រហារទីក្រុងនានា និងវាយប្រហារសហគមន៍ដទៃទៀតពេញមួយយប់ បណ្ដាលឱ្យមានភ្លើងឆេះគ្រប់ទីកន្លែងនៃទីក្រុងឌីនីប្រូ ហើយបង្កការខូចខាតអគារស្នាក់នៅរបស់ប្រជាជន ហាងលក់ទំនិញ និងផ្ទះឯកជន។
នៅតំបន់ភាគនិរតីឯណោះវិញ មនុស្ស២នាក់រងរបួសដោយសារការវាយប្រហារពីសំណាក់ដ្រូនទៅលើទីក្រុងអូដេសា។ អគារស្នាក់នៅរបស់ប្រជាជន, ហេដ្ឋារចនាសម្ព័ន្ធនៅកំពង់ផែ និងរថយន្តជាច្រើនគ្រឿងត្រូវបានបំផ្លិចបំផ្លាញនៅភាគខាងត្បូង។ នេះបើយោងតាមអភិបាលតំបន់កើតហេតុ លោកអូឡេ ឃីផឺ (Oleh Kiper)។ មិនមែនតែអ៊ុយក្រែនទេដែលរងការវាយប្រហារ រុស្ស៊ីក៏រងគ្រោះដូចគ្នាដែរ។ ស្ត្រីម្នាក់បានស្លាប់ និងបុរសម្នាក់រងរបួសដោយការវាយប្រហារពីសំណាក់ដ្រូនរបស់អ៊ុយក្រែននៅតំបន់បែលហ្គោរ៉ូតដែលស្ថិតនៅកៀកនឹងព្រំដែន។
ក្រោយការវាយប្រហារកាលពីយប់មិញនោះ ក្រសួងការពារជាតិរ៉ូម៉ានីថ្លែងថាខ្លួនរកឃើញបំណែកដ្រូនធ្លាក់ទៅលើតំបន់រស់នៅរបស់ប្រជាជននៅទីក្រុងកាឡាទី (Galati)។ ពោលគឺនៅកៀកនឹងព្រំដែននៃរដ្ឋជាសមាជិកអង្គការណាតូតែម្ដង។ សំណាងល្អពេលនោះគ្មាននរណាម្នាក់របួស ឬស្លាប់ទេ។ រ៉ូម៉ានីបញ្ជាក់ថាករណីបំណែកដ្រូនធ្លាក់ចូលទឹកដីរបស់ខ្លួនមានច្រើនករណីកន្លងមកហើយ។ គួរកត់សម្គាល់ថាការវាយប្រហារលើកនេះកើតឡើងបន្ទាប់ពីរុស្ស៊ី និងអ៊ុយក្រែនដូរឈ្លើយសឹកគ្នាម្ខាងៗ១៩៣នាក់៕ ប្រភព៖ អេភី (AP) និងប្រភពដទៃទៀត
ចែករំលែកព័តមាននេះ