រាជធានីភ្នំពេញ ៖ ជនរងគ្រោះដោយគ្រោះថ្នាក់ចរាចរណ៍៣នាក់ដែលក្រោយពេលជួប គ្រោះថ្នាក់ត្រូវបានរថយន្ដសាមុយរបស់គ្លីនិកឯកជនមួយដឹកយកទៅ សង្គ្រោះនៅគ្លីនិករបស់ខ្លួននោះ បាននាំគ្នារត់ចេញមកព្យាបាលនៅមន្ទីរពេទ្យព្រះកុសុមៈវិញ ដោយសារតែតម្លៃព្យាបាលនៅគ្លីនិកឯកជននោះ
រាជធានីភ្នំពេញ ៖ ជនរងគ្រោះដោយគ្រោះថ្នាក់ចរាចរណ៍៣នាក់ដែលក្រោយពេលជួបគ្រោះថ្នាក់ត្រូវបានរថយន្ដសាមុយរបស់គ្លីនិកឯកជនមួយដឹកយកទៅសង្គ្រោះនៅគ្លីនិករបស់ខ្លួននោះ បាននាំគ្នារត់ចេញមកព្យាបាលនៅមន្ទីរពេទ្យព្រះកុសុមៈវិញ ដោយសារតែតម្លៃព្យាបាលនៅគ្លីនិកឯកជននោះថ្លៃហួសហេតុពេកធ្វើឱ្យអ្នកជំងឺគ្មានប្រាក់សម្រាប់ព្យាបាលឡើយ ។
អ្នករងគ្រោះដែលត្រូវរថយន្ដសាមុយរបស់គីនិកទួលគោកដឹកយកទៅព្យាបាលពេលជួបគ្រោះថ្នាក់ភ្លាមៗ បានចេញពីគ្លីនិកនោះទៅសម្រាកព្យាបាលនៅមន្ទីរពេទ្យព្រះកុសុមៈចំនួន៣នាក់ មាន១-ឈ្មោះប្រាក់ វិច ភេទប្រុស អាយុ៣៦ឆ្នាំ ជាបុគ្គលិកសន្ដិសុខក្រុមហ៊ុនឆ្មាំ ជិះម៉ូតូឌុបប្រពន្ធឈ្មោះវី អាយុ២៧ឆ្នាំ ដើម្បីយកលុយទៅសងគេ ក៏បុកជាមួយរថយន្ដនៅមុខសាលាខណ្ឌប្ញស្សីកែវ ធ្វើឱ្យបុរសឈ្មោះប្រាក់ វិច សន្លប់បាត់ស្មារតី ចំណែកប្រពន្ធគ្រាន់តែរយះកែងជើងបន្ដិច ។ គ្រោះថ្នាក់នេះត្រូវបានអ្នកឃើញហេតុការណ៍ទូរស័ព្ទហៅរថយន្ដសាមុយរបស់គ្លីនិកទួលគោកទៅដឹកពីរនាក់ប្ដី-ប្រពន្ធយកទៅព្យាបាលរយៈពេល៣យប់៣ថ្ងៃបង់ថ្លៃព្យាបាលអស់ចំនួន១.៣៩០ដុល្លារអាមេរិក ។ ដោយសារតម្លៃព្យាបាលថ្លៃហួសហេតុពេក ទើបសាច់ញាតិបានសុំគ្រូពេទ្យចេញមកព្យាបាលនៅមន្ទីរពេទ្យព្រះកុសុមៈ ប៉ុន្ដែបង់ប្រាក់មិនគ្រប់ក៏បានយកប្លង់ដីមកដាក់បញ្ចាំឱ្យខាងគ្លីនិក ។
អ្នករងគ្រោះទី២ឈ្មោះយ៉ុម យ៉េន ភេទប្រុស អាយុ២៧ឆ្នាំ មានទីលំនៅភូមិក្រោលគោ ឃុំសំបួរមាស ស្រុកមុខកំពូល ខេត្ដកណ្ដាល បានជិះម៉ូតូឌុបក្មួយឈ្មោះជា ធេប ភេទប្រុស អាយុ១៩ឆ្នាំ ជាសិស្សថ្នាក់ទី១០នៃវិទ្យាល័យ ជា ស៊ីម ចំរើនរដ្ឋ ទៅលេងផ្ទះឪពុកធំនៅព្រែកព្នៅ ក៏បុកគ្នាជាមួយរថយន្ដ បណ្ដាលឱ្យឈ្មោះយ៉ុម យ៉េន សន្លប់ ហើយត្រូវរថយន្ដសាមុយរបស់គ្លីនិកទួលគោកដឹកយកទៅព្យាបាលនៅទីនោះ ចំណែកក្មួយឈ្មោះជា ធេប ត្រូវស្លាប់បាត់បង់ជីវិត ។ រីឯឈ្មោះយ៉ុម យ៉េន ចូលសម្រាកនៅគ្លីនិកនាយប់ថ្ងៃទី២៩ កក្កដា ២០១១ ចេញពីគ្លីនិកទៅព្យាបាលបន្ដនៅមន្ទីរពេទ្យព្រះកុសុមៈនៅវេលាម៉ោងប្រមាណ១រសៀលថ្ងៃទី៣០ កក្កដា បង់ថ្លៃព្យាបាលអស់ចំនួន៨៧៥ដុល្លារអាមេរិក ។
អ្នករងគ្រោះទី៣ ឈ្មោះកែវ ណាវី ភេទស្រី អាយុ៥៤ឆ្នាំ ទីលំនៅផ្ទះលេខ២៩ ក្រុម៧ ភូមិ១ ផ្លូវលេខ៣៥១ សង្កាត់បឹងកក់ទី១ ខណ្ឌទួលគោក ជួបគ្រោះថ្នាក់កាលពីថ្ងៃទី៣០ កក្កដា ខណៈពេលជិះម៉ូតូឌុបចេញពីធ្វើការហើយម៉ូតូ គេចជាមួយរថយន្ដធ្វើឱ្យគាត់ធ្លាក់ពីលើម៉ូតូបាក់ជើង ។ ភ្លាមៗនោះ អ្នកនៅជិតកន្លែងកើតហេតុបាននាំគ្នាលើកគាត់ដាក់ម៉ូតូយកទៅចូលគ្លីនិកទួលគោករយៈពេល៤ម៉ោងបង់ថ្លៃសេវាអស់២១៥ដុល្លារអាមេរិក ។
ក្នុងចំណោមជនរងគ្រោះទាំងបីនាក់ខាងលើ ម្នាក់ៗសុទ្ធតែត្អូញត្អែរ និងរាងចាលមិនហ៊ានចូលគ្លីនិកឯកជនទៀតទេ ព្រោះបើតែថ្នាក់ហ្នឹងប្រជាពលរដ្ឋក្រីក្រលក់ដីស្រែចម្ការយកមកបង់ថ្លៃព្យាបាលក៏មិនគ្រប់ផង ។
ប្រភពព័ត៌មានបានឱ្យដឹងថា រថយន្ដសាមុយរបស់គ្លីនិកឯកជនមួយចំនួនយប់ឡើងបានបើកដាក់ពង្រាយតាមផ្លូវក្នុងរាជធានីភ្នំពេញ ពេលដែលមានគ្រោះថ្នាក់ចរាចរណ៍កើតឡើង គឺទៅដល់មុនគេ ចំណែករថយន្ដសាមុយរបស់មន្ទីរពេទ្យរដ្ឋទៅមិនទាន់ទេ ។ ម្យ៉ាងទៀតដោយសារថារថយន្ដសាមុយឯកជនពេលដែលអ្នកឃើញហេតុការណ៍គ្រោះថ្នាក់ចរាចរណ៍ទូរស័ព្ទប្រាប់ខាងគ្លីនិកបានផ្តល់កម្រៃជើងសាមិនថា អ្នកនោះពលរដ្ឋសាមញ្ញ ឬសមត្ថកិច្ចទេ ដូច្នេះហើយទើបមានអ្នកចូលចិត្ដទូរស័ព្ទហៅ ។ មិនតែប៉ុណ្ណោះ រថយន្ដសាមុយឯកជនដឹកតែអ្នករងគ្រោះមិនធ្ងន់ធ្ងរ បើធ្ងន់ធ្ងរគឺមិនដឹកទេ សុខចិត្តត្រឡប់មកវិញរថយន្ដទទេ ។
ជុំវិញករណីនេះ ជនរងគ្រោះទាំងបីរូប ក៏ដូចជាប្រជាពលរដ្ឋទូទៅ សូមអំពាវនាវដល់រាជរដ្ឋាភិបាលមេត្ដាជួយទប់ស្កាត់រថយន្ដសាមុយគ្លីនិកឯកជនទាំងអស់ផង និងជួយជំរុញឱ្យអ្នកដែលឃើញហេតុការណ៍ទូរស័ព្ទហៅរថយន្ដសាមុយរដ្ឋដែលមានលេខទូរស័ព្ទ១១៩ ទូរស័ព្ទគ្រប់ប្រព័ន្ធហៅចូលមិនគិតប្រាក់ ទោះបីនៅក្នុងទូរស័ព្ទរបស់លោកអ្នកអត់មានលុយ ក៏ហៅចេញបានដែរ ៕
ចែករំលែកព័តមាននេះ