រាជធានីភ្នំពេញ៖ យានដ្ឋានជួសជុលរថយន្តមួយកន្លែង ត្រូវបានភ្លើងឆាបឆេះសន្ធោសន្ធៅ ដែលសង្ស័យបណ្ដាលមកពីឆ្លងចរន្តអគ្គិសនី ហើយភ្លាមៗនោះមានរថយន្តពន្លត់អគ្គិភ័យជាច្រើនគ្រឿងបានចេញអន្តរាគមន៍ពន្លត់រលត់ទៅវិញ ។ ប៉ុន្តែយានដ្ឋាននោះ រួមទាំងរថយន្ត១គ្រឿងនិងម៉ូតូ១គ្រឿង ព្រមទាំងសម្ភារៈច្រើនទៀត បានក្លាយជាចំណីព្រះអគ្គិទាំងស្រុង…
រាជធានីភ្នំពេញ៖ យានដ្ឋានជួសជុលរថយន្តមួយកន្លែង ត្រូវបានភ្លើងឆាបឆេះសន្ធោសន្ធៅ ដែលសង្ស័យបណ្ដាលមកពីឆ្លងចរន្តអគ្គិសនី ហើយភ្លាមៗនោះមានរថយន្តពន្លត់អគ្គិភ័យជាច្រើនគ្រឿងបានចេញអន្តរាគមន៍ពន្លត់រលត់ទៅវិញ ។ ប៉ុន្តែយានដ្ឋាននោះ រួមទាំងរថយន្ត១គ្រឿងនិងម៉ូតូ១គ្រឿង ព្រមទាំងសម្ភារៈច្រើនទៀត បានក្លាយជាចំណីព្រះអគ្គិទាំងស្រុង ព្រមទាំងឆេះរោលរថយន្តម៉ាកហ្វត១គ្រឿងទៀតផងដែរ ប៉ុន្តែពុំបានបណ្ដាលឲ្យមានមនុស្សណាម្នាក់រងគ្រោះនោះឡើយ ។
ហេតុការណ៍នោះបានកើតឡើងកាលពីវេលាម៉ោង១១និង១៥នាទីព្រឹកថ្ងៃទី២៤ ខែមេសា ឆ្នាំ២០២៦ ហើយយានដ្ឋានជួសជុលរថយន្តខាងលើស្ថិតនៅតាមបណ្ដោយផ្លូវបេតុងក្នុងភូមិព្រៃល្វា សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ ។
ម្ចាស់យានដ្ឋានខាងលើនោះឈ្មោះមាស ភក្ដី ភេទប្រុស អាយុ៥២ឆ្នាំ ហើយយានដ្ឋានជួសជុលរថយន្តរបស់គាត់ជាសំណង់ដែកប្រក់ស័ង្កសី មានទំហំទទឹង១៣ម៉ែត្រ និងបណ្ដោយ២០ម៉ែត្រ ។ ដោយឡែកគ្រឿងបន្លាស់រថយន្ត និងសម្ភារៈផ្សេងៗ បានរងការឆាបឆេះខូចខាតទាំងស្រុង ហើយក៏មាននៅរថយន្ត១គ្រឿងម៉ាកកូរ៉ូឡាពណ៍សំបកឪឡឹក ពាក់ស្លាកលេខតាកែវ2A-1732 ត្រូវភ្លើងឆេះនៅសល់តែផ្នែកខាងក្រោយបន្តិចប៉ុណ្ណោះ និងម៉ូតូម៉ាកស៊ុយហ្ស៊ុយគីវីវ៉ា១គ្រឿងទៀតក៏ត្រូវភ្លើងឆេះទាំងស្រុងដែរ ។ រថយន្តនិងម៉ូតូនេះ គឺជាកម្មសិទ្ធិរបស់គាត់(ម្ចាស់យានដ្ឋានខាងលើ) រីឯរថយន្ត១គ្រឿងទៀតម៉ាកហ្វតពណ៍ស ពាក់ស្លាកលេខភ្នំពេញ2AB-1987 ជារបស់ភ្ញៀវដែលបានយកទៅជួសជុល ក៏ត្រូវភ្លើងឆេះដែរ តែដោយសារបើកចេញទាន់ពេល ទើបគ្រាន់តែឆេះរោលៗខូចខាតបន្តិចបន្តួចប៉ុណ្ណោះ ។
សាក្សីនៅកន្លែងកើតហេតុបាននិយាយថា នៅមុនពេលកើតហេតុគាត់បានឃើញភ្លើងចាប់ផ្ដើមឆេះចេញពីបន្ទប់ដាក់គ្រឿងបន្លាស់រថយន្តមុន ហើយតែមួយភ្លែតប៉ុណ្ណោះក៏ឆេះរាលពេញយានដ្ឋានទាំងមូល ដោយមានអណ្ដាតភ្លើងសន្ធោសន្ធៅ និងផ្សែងឃ្មួលខ្មាញ់ ។ ពេលនោះអ្នកភូមិបានជួយពន្លត់ដែរ ប៉ុន្តែពន្លត់អត់ឈ្នះឡើយ ចំណែកម្ចាស់យកចេញបានតែរថយន្តហ្វត១គ្រឿងដែលភ្ញៀវយកទៅជួសជុលប៉ុណ្ណោះ ក្រៅពីនេះត្រូវបានភ្លើងគ្រប់គ្រងទាំងស្រុង លុះមួយសន្ទុះក្រោយមកអាជ្ញាធរនិងសមត្ថកិច្ចខណ្ឌពោធិ៍សែនជ័យបានទៅជួយអន្តរាគមន៍ និងហៅរថយន្តពន្លត់អគ្គិភ័យទៅជួយបាញ់ទឹកពន្លត់ ។
សាក្សីដដែលបានប្រាប់ឲ្យដឹងបន្តទៀតថា ពេលនោះមានរថយន្តពន្លត់អគ្គិភ័យទៅដល់ជាច្រើនគ្រឿងហើយបាញ់ទឹកអស់ច្រើនរថយន្តទើបភ្លើងរលត់ទៅវិញទាំងស្រុង ពុំបានបណ្ដាលឲ្យមានមនុស្សរងរបួស ឬឆេះរាលទៅដល់ផ្ទះអ្នកជិតខាងឡើយ ៕
ចែករំលែកព័តមាននេះ