រាជធានីភ្នំពេញ ៖ ដូចតាមការកំណត់របស់អង្គភាពប្រឆាំងអំពើពុករលួយ គ្រាន់តែយឺត១ម៉ោង គឺនៅវេលាម៉ោងប្រមាណ៥កន្លះល្ងាច ថ្ងៃទី២២ ខែមេសា ឆ្នាំ២០២៦ អង្គភាពប្រឆាំងអំពើពុករលួយ(ACU) បានបញ្ជូនជនសង្ស័យចំនួន៤នាក់…
រាជធានីភ្នំពេញ ៖ ដូចតាមការកំណត់របស់អង្គភាពប្រឆាំងអំពើពុករលួយ គ្រាន់តែយឺត១ម៉ោង គឺនៅវេលាម៉ោងប្រមាណ៥កន្លះល្ងាច ថ្ងៃទី២២ ខែមេសា ឆ្នាំ២០២៦ អង្គភាពប្រឆាំងអំពើពុករលួយ(ACU) បានបញ្ជូនជនសង្ស័យចំនួន៤នាក់ ក្នុងនោះ២នាក់ជាមន្ត្រីនគរបាលជាន់ខ្ពស់ ម្នាក់ពាក់ផ្កាយ៣ និងម្នាក់ទៀតពាក់ផ្កាយ២ ព្រមទាំងអ្នកពាក់ព័ន្ធ២នាក់ទៀត ទៅសាលាដំបូងរាជធានីភ្នំពេញ ជាប់ចោទពីបទស៊ីសំណូកពីក្រុម Online Scams ។
ជនសង្ស័យទាំង៤នាក់ ត្រូវបានកម្លាំងអង្គភាពប្រឆាំងអំពើពុករលួយ ដឹកតាមរថយន្តទំនើប
២បាំងចំនួន៤គ្រឿង គឺរថយន្តមួយគ្រឿងដាក់ជនសង្ស័យម្នាក់ ដោយមានមន្ត្រីអង្គភាពប្រឆាំងអំពើពុករលួយអង្គុយអមសងខាង និងមានរថយន្ត១គ្រឿងទៀតជារថយន្តមន្ត្រី ACU ដែលជាអ្នកកាន់សំណុំរឿងជិះតាមពីក្រោយ សរុបរថយន្ត៥គ្រឿង ។
ក្បួនរថយន្តទាំង៥គ្រឿង បានចេញដំណើរពីអង្គភាពប្រឆាំងអំពើពុករលួយ ឆ្ពោះទៅកាន់សាលាដំបូងរាជធានីភ្នំពេញ ដែលរថយន្ត១គ្រឿងខាងមុខគេ គឺដឹកឧត្តមសេនីយ៍ឯក អ៊ុក
ហៃសីឡា អគ្គនាយរងនៃអគ្គនាយកដ្ឋានអន្តោប្រវេសន៍ ។ រថយន្តទី២ ដឹកឧត្តមសេនីយ៍ទោ សរ សំណាង ស្នងការរងនៃស្នងការដ្ឋាននគបាលរាជធានីភ្នំពេញ ។ រថយន្តទី៣ ដឹកជនសង្ស័យឈ្មោះ យ៉ាត កុសល និងរថយន្តទី៤ ដឹកអ្នកស្រី អស កូពិសី ប្រពន្ធលោក សរ សំណាង ។
ជនសង្ស័យទាំង៤នាក់ ត្រូវបាននាំខ្លួនទៅដល់សាលាដំបូងរាជធានីភ្នំពេញដើម្បីប្រគល់ជូនស្ថាប័នអយ្យការអមសាលាដំបូងបើកការស៊ើបសួរ ប៉ុន្តែទំនងដោយសារជ្រុលម៉ោងបន្តិច ទៅហើយ ទើបតំណាងអយ្យការបានអនុញ្ញាតឲ្យអង្គភាពប្រឆាំងអំពើពុករលួយដឹកជនសង្ស័យយកទៅអង្គភាពវិញ គឺផ្ញើទុកសិន និងតម្រូវបន្តសាកសួរនៅព្រឹកថ្ងៃទី២៣ ខែមេសា ទៀត ។
សូមជម្រាបថា ឯកឧត្តមទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយ បានបញ្ជាក់ប្រាប់បណ្តាញព័ត៌មានឱ្យដឹងថា អង្គភាពប្រឆាំងអំពើពុករលួយរៀបចំបញ្ជូនមន្ត្រីនគរបាលជាតិជាន់ខ្ពស់២រូប និងជនសង្ស័យ២នាក់ទៀត ទៅសាលាដំបូងរាជធានីភ្នំពេញ នៅរសៀលថ្ងៃទី២២ ខែមេសា ឆ្នាំ២០២៦ ដោយជាប់ពាក់ព័ន្ធនឹងសំណុំរឿងស៊ីសំណូកពីក្រុម Online Scams និងសម្អាតប្រាក់ ។
ជនសង្ស័យទាំង៤នាក់នេះមាន ៖
១-ឧត្តមសេនីយ៍ឯក អ៊ុក ហៃសីឡា (ផ្កាយ៣) អគ្គនាយករងនៃអគ្គនាយដ្ឋានអន្តោប្រវេសន៍ ។
២-ឧត្តមសេនីយ៍ទោ សរ សំណាង (ផ្កាយ២) ស្នងការរងនៃស្នងការដ្ឋាននគរបាលរាជធានីភ្នំពេញ ។
៣-អ្នកស្រី អស កូពិសី ជាប្រពន្ធលោក សរ សំណាង ។
៤-ឈ្មោះ យ៉ាត កុសល ។
បើតាមឯកឧត្តមទេសរដ្ឋមន្ត្រី មនុស្ស២នាក់ទៀត ដែលជាប់ពាក់ព័ន្ធនឹងករណីនេះ រួមមាន អ្នកស្រី អស កូពិសី ជាប្រពន្ធលោក សរ សំណាង និងម្នាក់ទៀតឈ្មោះ យ៉ាត កុសល ដែលជាប់សង្ស័យរឿងស៊ីសំណូកពីក្រុម Online Scams និងសម្អាតប្រាក់ ។
ឯកឧត្តមទេសរដ្ឋមន្ត្រី ឱម យ៉ិនទៀង បន្ថែមថា ការចាប់ខ្លួននាយនគរបាលជាន់ខ្ពស់២រូបនិងជនពាក់ព័ន្ធខាងលើ បានធ្វើឡើងជាបន្តបន្ទាប់ ចាប់តាំងពីថ្ងៃទី១៩ ខែមេសា ឆ្នាំ២០២៦ ។ ករណីនេះ អង្គភាពប្រឆាំងអំពើពុករលួយ(ACU) បានបើកប្រតិបត្តិការស៊ើបអង្កេតរយៈពេល២០ថ្ងៃមកហើយ ហើយប្រតិបត្តិការ២០ថ្ងៃនេះ អង្គភាពនឹងបញ្ជាក់ជូនលម្អិត ក្រោយពេលបញ្ជូនជនសង្ស័យទាំង៤នាក់ទៅសាលាដំបូងរាជាធានីភ្នំពេញរួចរាល់ ៕
ចែករំលែកព័តមាននេះ