ទីក្រុងវ៉ាស៊ីនតោន៖ គិតទាំងមុនទាំងក្រោយ យោធាអាមេរិកបានស្ទាក់ចាប់កប៉ាល់ដែលមានទំនាក់ទំនង ឬដោតទង់ជាតិអ៊ីរ៉ង់ចំនួនបីគ្រឿងនៅលើដែនសមុទ្រនៃទ្វីបអាស៊ីដូចជានៅក្បែរប្រទេសឥណ្ឌា ម៉ាឡេស៊ី និងសិរីលង្កាជាដើម។ បន្ទាប់មកអាមេរិកបានបញ្ជូននាវាទាំងនោះទៅទីកន្លែងផ្សេង។ អាមេរិកបានចាត់វិធានការបិទខ្ទប់ដែនសមុទ្រអ៊ីរ៉ង់មិនឱ្យនាវាបើកចេញចូលកំពង់ផែអ៊ីរ៉ង់បានទេ។ ចំណែកអ៊ីរ៉ង់ក៏បន្តបិទខ្ទប់ច្រកសមុទ្រហ័រម៉ូស និងបាញ់នាវាណាដែលហ៊ានបើកកាត់ទីនោះដោយគ្មានការអនុញ្ញាតពីខ្លួន។
យោធាអាមេរិកទើបតែស្ទាក់ចាប់កប៉ាល់ដឹកទំនិញមួយគ្រឿង និងកប៉ាល់ដឹកប្រេងមួយគ្រឿងរបស់អ៊ីរ៉ង់កាលពីប៉ុន្មានថ្ងៃមុននេះ។ ចំណែកអ៊ីរ៉ង់អះអាងថាខ្លួនក៏ចាប់បានកប៉ាល់ដឹកកុងតេណឺពីរគ្រឿងផងដែរដែលចង់បើកចេញពីឈូងសមុទ្រឆ្លងកាត់ច្រកសមុទ្រហ័រម៉ូសកាលពីថ្ងៃពុធបន្ទាប់ពីបាញ់ព្រមានហើយ ពួកគេនៅតែមិនព្រមស្ដាប់។ នេះជាលើកដំបូងដែលអ៊ីរ៉ង់ឃាត់ទុកកប៉ាល់ចាប់តាំងពីសង្គ្រាមផ្ទុះឡើងដំបូង។
នៅក្នុងចំណោមកប៉ាល់ទាំងបីគ្រឿងដែលអាមេរិកចាប់បាននោះ មួយគ្រឿងដោតទង់ជាតិអ៊ីរ៉ង់ជាប្រភេទកប៉ាល់ដឹកប្រេងខ្នាតធំ និងបានផ្ទេរប្រេងឆៅមួយចំនួនរួចហើយ។ កប៉ាល់នេះត្រូវបានស្ទាក់ចាប់នៅដែនសមុទ្រម៉ាឡេស៊ីកាលពីមួយសប្ដាហ៍មុន។ ចំណែកកប៉ាល់ឈ្មោះសឺវីន (Sevin) ដែលដោតទង់ជាតិអ៊ីរ៉ង់ដែរ ប៉ុន្តែខ្នាតតូចជាង អាចផ្ទុកប្រេងឆៅបាន១លានបារ៉ែលក៏ត្រូវអាមេរិកចាប់បានផងដែរ។ ប៉ុន្តែកាលពីពេលចាប់បាននោះ នាវានេះផ្ទុកចំណុះត្រឹមតែ៦៥%នៃចំណុះសរុបប៉ុណ្ណោះ។ កប៉ាល់នេះត្រូវគេប្រទះឃើញនៅលើដែនសមុទ្រម៉ាឡេស៊ីកាលពីមួយខែមុន។
បញ្ជាការដ្ឋានកណ្ដាលយោធាអាមេរិកបង្ហោះសារនៅលើបណ្ដាញអ៊ិចថានាវាឈ្មោះដូរេណា (Dorena) ត្រូវបានអមដំណើរដោយនាវាពិឃាតរបស់អាមេរិកនៅមហាសមុទ្រឥណ្ឌាបន្ទាប់ពីព្យាយាមធ្វើខុសពីវិធានការបិទខ្ទប់។ អាមេរិកក៏ទំនងជាស្ទាក់ចាប់កប៉ាល់មួយគ្រឿងទៀតឈ្មោះដេរីយ៉ា (Derya) ផងដែរ។ កប៉ាល់នេះត្រូវផ្ទេរប្រេងឆៅនៅប្រទេសឥណ្ឌានៅអំឡុងពេលដែលអាមេរិកផ្ដល់ការលើកលែង។ ប៉ុន្តែកប៉ាល់នោះប្រហែលជាផ្ទេរមិនទាន់ពេលវេលា សុពលភាពក៏បានផុតរលត់ទៅវិញកាលពីថ្ងៃអាទិត្យ។ យោធាអាមេរិកអះអាងថាចាប់តាំងពីអនុវត្តវិធានការបិទខ្ទប់ដែនសមុទ្រអ៊ីរ៉ង់មក កប៉ាល់២៩គ្រឿងត្រូវខ្លួនស្ទាក់ដំណើរ និងបញ្ជាឱ្យបកក្រោយវិញទៅរកកំពង់ផែរបស់អ៊ីរ៉ង់៕ ប្រភព៖ រ៉យទ័រ (Reuters) និងប្រភពដទៃទៀត
ចែករំលែកព័តមាននេះ