ទីក្រុងឡាអេ៖ អតីតប្រធានាធិបតីហ្វ៊ីលីពីន លោកឌូតឺតេ នឹងប្រឈមនឹងការកាត់ទោសនៅតុលាការទីក្រុងឡាអេបន្ទាប់ពីអង្គជំនុំជម្រះចោទប្រកាន់ពីបទប្រព្រឹត្តឧក្រិដ្ឋកម្មប្រឆាំងមនុស្សជាតិនៅក្នុងសង្គ្រាមប្រឆាំងគ្រឿងញៀនដែលលោកជាអ្នកដឹកនាំ-បញ្ជាដោយផ្ទាល់។ អង្គបុរេជំនុំជម្រះបានបញ្ជាក់ជាឯកច្ឆន្ទនូវការចោទប្រកាន់គ្រប់សំណុំរឿងទៅលើរូបលោកឌូតឺតេ និងសម្រេចថាត្រូវតែកាត់ទោសរូបលោក។ នេះបើយោងតាមសេចក្ដីប្រកាសរបស់តុលាការព្រហ្មទណ្ឌអន្តរជាតិ អាយស៊ីស៊ី (ICC)។
លោកឌូតឺតេនឹងក្លាយជាមេដឹកនាំនៅអាស៊ីដំបូងបង្អស់ដែលត្រូវកាត់ទោសនៅទីក្រុងឡាអេដោយតុលាការព្រហ្មទណ្ឌអន្តរជាតិ។ តុលាការនេះក៏កំពុងប្រឈមនឹងបញ្ហាលំបាកលំបិនសម្បើមណាស់ដែរដោយសារអាមេរិកកាត់ផ្ដាច់ជំនួយ និងដាក់ទណ្ឌកម្មទៅលើចៅក្រម និងបុគ្គលមួយចំនួនបន្ទាប់ពីពួកគេចេញដីកាចាប់ខ្លួនលោកណឺតានយ៉ាហ៊ូ។ ហេតុនេះលោកត្រាំថាតុលាការនេះធ្វើការលម្អៀងផ្នែកនយោបាយ។
នៅក្នុងសំណុំរឿងលោកឌូតឺតេ គេមិនទាន់ដឹងច្បាស់ថាតើលោកនឹងចូលរួមនៅក្នុងសវនាការដោយផ្ទាល់ដែរឬទេ ឬក៏ទស្សនាដំណើរការកាត់ក្ដីពីចម្ងាយតាមប្រព័ន្ធវីឌីអូ។ ក្រុមសហមេធាវីការពារក្ដីឱ្យរូបលោកថ្លែងថាលោកមានសុខភាពខួរក្បាលទ្រុឌទ្រោមណាស់ទៅហើយ។ ដូច្នេះមិនអាចតាមដានដំណើរការកាត់ក្ដីនេះបានទេ។ មានករណីតែម្ដងគត់ចាប់តាំងពីពេលចាប់ខ្លួនដែលលោកបង្ហាញមុខជាសាធារណៈគឺនៅពេលលោកថ្លែងតាមប្រព័ន្ធវីឌីអូនៅក្នុងសវនាការជាលើកដំបូងបំផុត។ កាលនោះ លោកហាក់ដូចជាវង្វេងវង្វាន់ អស់កម្លាំង និងនិយាយឮខ្សាវៗសឹងតែស្ដាប់មិនបាន។
អង្គបុរេជំនុំជម្រះសន្និដ្ឋានថាមានភស្តុតាងគ្រប់គ្រាន់ដែលគេជឿជាក់ថាលោកឌូតឺតេជាអ្នកទទួលខុសត្រូវនៅក្នុងឧក្រិដ្ឋកម្មប្រឆាំងមនុស្សជាតិដោយមនុស្សឃាត ឬប៉ុនប៉ងមនុស្សឃាត។ កាលពីខែកុម្ភៈ រដ្ឋអាជ្ញាចោទប្រកាន់ថាលោកឌូតឺតេបានសម្លាប់ជនសង្ស័យជួញដូរ ឬប្រើប្រាស់គ្រឿងញៀនរាប់ពាន់នាក់កាលលោកនៅកាន់តំណែងជាអភិបាលក្រុងដាវ៉ៅ (Davao) និងបន្តសម្លាប់ទៀតនៅពេលលោកកាន់តំណែងជាប្រធានាធិបតី៕ ប្រភព៖ ឆេនណល ញូស៍ អេស៊ា (Channel News Asia) និងប្រភពដទៃទៀត
ចែករំលែកព័តមាននេះ