ខេត្តស្វាយរៀង ៖ កម្លាំងសមត្ថកិច្ចនគរបាលខេត្តស្វាយរៀង បានបើកប្រតិបត្តិការ ចុះបង្ក្រាបបទល្មើស Online Scams ស្ថិតនៅសណ្ឋាគារ និងកាស៊ីណូ «TITANKING»…
ខេត្តស្វាយរៀង ៖ កម្លាំងសមត្ថកិច្ចនគរបាលខេត្តស្វាយរៀង បានបើកប្រតិបត្តិការ ចុះបង្ក្រាបបទល្មើស Online Scams ស្ថិតនៅសណ្ឋាគារ និងកាស៊ីណូ «TITANKING» ក្នុងក្រុងបាវិត ដោយឃាត់ខ្លួនជនល្មើស ចំនួន២៣នាក់ ព្រមទាំងដកហូតសម្ភារមួយចំនួនទៀត ។
បើតាម សមត្ថកិច្ចបានឲ្យដឹងថា ប្រតិបត្តិការខាងលើនេះ បានធ្វើឡើងក្រោមការបញ្ជាផ្ទាល់ពីនាយឧត្តមសេនីយ៍ ស ថេត អគ្គស្នងការនគរបាលជាតិ លោក ប៉េង ពោធិ៍សា អភិបាលខេត្តស្វាយរៀង និងលោកឧត្តមសេនីយ៍ទោ ពេជ្រ វីរៈ ស្នងការនគរបាលខេត្ត ក្រោមការសម្របសម្រួលពីតំណាងអយ្យការអមសាលាដំបូងខេត្ត កាលពីរសៀលថ្ងៃទី២០ ខែមេសា ឆ្នាំ២០២៦ ។
យោងតាមរបាយការណ៍របស់ស្នងការដ្ឋាននគរបាលខេត្តស្វាយរៀង បានប្រាប់អ្នកសារព័ត៌មានយើងនៅថ្ងៃទី២២ ខែមេសា ឆ្នាំ២០២៦ បានបញ្ជាក់ថា ក្រោយទទួលបានព័ត៌មាន នៃបទល្មើសមួយនេះ កម្លាំងសមត្ថកិច្ច បានចុះសហការត្រួតពិនិត្យ និងឈានដល់បង្ក្រាបជាក់ស្តែងទីតាំងសង្ស័យលួចលាក់ប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (Online Scams) រកឃើញមានពាក់ព័ន្ធបទល្មើសចំនួន២បន្ទប់ និងបានឃាត់ខ្លួនជនសង្ស័យ ២៣នាក់ (ស្រី២នាក់) មាន ០៤សញ្ជាតិ រួមមាន ៖ ចិន១៨នាក់ ស្រី០២នាក់, ឥណ្ឌា០៣នាក់ ស្រី០១នាក់, បង់ក្លាដេស០១នាក់ ប្រុស និងចិនតៃវ៉ាន់ ០១នាក់ ប្រុស ។
នៅក្នុងប្រតិបត្តិការនេះ កម្លាំងនគរបាល បានដកហូតវត្ថុតាង រួមមាន ៖ កុំព្យូទ័រ, កំព្យូទ័រយួរដៃ, ទូរស័ព្ទដៃ និងសម្ភារមួយចំនួនទៀត ។
បច្ចុប្បន្ន ជនសង្ស័យចំនួន២៣នាក់ខាងលើ រួមទាំងវត្ថុតាង ត្រូវបានបញ្ជូនមកការិយាល័យប្រឆាំងបទល្មើសបច្ចេកវិទ្យា នៃស្នងការដ្ឋាននគរបាលខេត្ត ដើម្បីបន្តតាមនីតិវិធី ៕
ចែករំលែកព័តមាននេះ