ខេត្តពោធិ៍សាត់ ៖ កាលពីថ្ងៃទី៣១ កក្កដា ឆ្នាំ២០១១ សមាគមអតីតយុទ្ធជនកម្ពុជាខេត្តដឹកនាំដោយលោកញឹក សារ៉េត ប្រធានមន្ទីរសង្គមកិច្ចអតីតយុទ្ធជន និងយុវនីតិសម្បទា សមាជិកគណៈកម្មាធិការកណ្តាល និងជាប្រធានសមាគមអតីតយុទ្ធជនកម្ពុជាខេត្ត បាននាំយកថវិកាមរណៈសង្គ្រោះ
ខេត្តពោធិ៍សាត់ ៖ កាលពីថ្ងៃទី៣១ កក្កដា ឆ្នាំ២០១១ សមាគមអតីតយុទ្ធជនកម្ពុជាខេត្តដឹកនាំដោយលោកញឹក សារ៉េត ប្រធានមន្ទីរសង្គមកិច្ចអតីតយុទ្ធជន និងយុវនីតិសម្បទា សមាជិកគណៈកម្មាធិការកណ្តាល និងជាប្រធានសមាគមអតីតយុទ្ធជនកម្ពុជាខេត្ត បាននាំយកថវិកាមរណៈសង្គ្រោះរបស់សមាគមទៅប្រគល់ជូនគ្រួសារសពអតីតយុទ្ធជនចំនួន៣គ្រួសារដល់លំនៅឋានផ្សេងៗគ្នា។
លោកយឹម ដេត លេខាធិការសមាគមបានថ្លែងថា គ្រួសារសពទាំង៣ មាន១-គ្រួសារសពលោកស្រីលឹម លន ជាភរិយាជនពលីឈ្មោះឃុំ ខេង រស់នៅភូមិដូងជ្រំ ឃុំបឹងបត់កណ្តោល ស្រុកបាកាន មរណភាពនៅថ្ងៃទី២០ កុម្ភៈ ឆ្នាំ២០១០។ ២-គ្រួសារសពលោកស្រីជួន សឿន ជាម្តាយជនពលីឈ្មោះមោក ម៉ៅ រស់នៅភូមិក្រាំងតាសែន សង្កាត់ព្រៃញី ក្រុងពោធិ៍សាត់ មរណភាពនៅថ្ងៃទី២៨ កុម្ភៈ ឆ្នាំ២០១០។ ៣-គ្រួសារលោកស្រីប៉ក់ ហ៊ិន ជាម្តាយជនពលីឈ្មោះសា រឿន រស់នៅភូមិវត្តពោធិ៍ទី២ ឃុំអន្លង់វិល ស្រុកកណ្តៀង មរណភាពនៅថ្ងៃទី១២ សីហា ២០១០។ គ្រួសារនីមួយៗទទួលបានថវិកាចំនួនបួនលានរៀល។
លោកញឹក សារ៉េត ថ្លែងថា សមាគមអតីតយុទ្ធជនកម្ពុជាបានបង្កើតឡើងក្នុងឆ្នាំ២០០៧ ក្រោមការដឹកនាំរបស់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលមានលោករដ្ឋមន្ត្រីអុិត សំហេង ជាអគ្គលេខាធិការ ក្នុងគោលបំណងជួយដោះស្រាយទុក្ខលំបាកគ្រួសារអតីតយុទ្ធជនដែលទទួលមរណភាព។ តាំងពីបង្កើតសមាគមមកយើងទទួលបានជោគជ័យដោយពិនិត្យឃើញគ្រួសារសពនីមួយៗ មានការកែប្រែយល់ដឹងច្រើន ទាំងជីវភាពរស់នៅ និងការចូលរួមប្រឡងប្រណាំងក្នុងសង្គម ។ ថវិកាចំនួន៤លានរៀលនេះបានមកពីការចូលរួមរបស់សមាជិកសមាគមអតីតយុទ្ធជនទូទាំងប្រទេស ក្នុងសពម្នាក់បង់១០០រៀល។ មុននឹងប្រគល់ថវិកាជូនលុះត្រាតែបានស៊ើបអង្កេតដល់លំនៅឋានច្បាស់លាស់ ហើយការប្រគល់ជូនអ្នកណាម្នាក់ក្នុងបន្ទុកគ្រួសារនោះគឺទៅតាមតែបណ្តាំមរណៈរបស់សពកាលពីនៅរស់តែប៉ុណ្ណោះ ដោយមិនប្រកាន់ជាតិសាសន៍ ពណ៌សម្បុរ និន្នាការនយោបាយអ្វីឡើយ។
លោកញឹក សារ៉េត បានថ្លែងទៀតថា មកដល់ពេលនេះសមាគមអតីតយុទ្ធជនកម្ពុជាខេត្តពោធិ៍សាត់ បានប្រគល់ថវិកាដល់គ្រួសារសពចំនួន៥៨នាក់ហើយ ក្នុងចំណោមជាង៦០នាក់ និងកំពុងបន្តនាំយកទៅប្រគល់ជូនដល់លំនៅឋានឱ្យបានគ្រប់គ្នាដោយធានាមិនឱ្យបាត់មួយរៀលណាឡើយ។ សមាគមអតីតយុទ្ធជនកម្ពុជាសូមកត់ត្រាទុកនូវស្នាដៃ និងគំរូវីរភាពដ៏អង់អាចក្លាហានរបស់អតីតយុទ្ធជនគ្រប់រូបដែលបានពលីកម្មបូជាសាច់ស្រស់ឈាមស្រស់ក្នុងបុព្វហេតុជាតិ មាតុភូមិ និងសូមឧទ្ទិសដល់វិញ្ញាណក្ខន្ធសពយុទ្ធជនទាំង៣នាក់បានទៅកាន់សុគតិភព។ ជាមួយគ្នានេះ លោកញឹក សារ៉េត បានពាំនាំបណ្តាំសម្តេចតេជោហ៊ុន សែន និងលោករដ្ឋមន្ត្រីអ៊ិត សំហេង ឱ្យក្រុមគ្រួសារដែលនៅរស់ យកថវិកាសមាគមនេះទៅប្រើប្រាស់ឱ្យបានចំទិសដៅក្នុងការធ្វើបុណ្យជូនសព និងបង្កើតមុខរបរចិញ្ចឹមកូនចៅឱ្យមានអនាគតល្អ ចៀសវាងយកទៅលេងល្បែងស៊ីសង ផឹកស្រា ឬបម្រើការសប្បាយផ្សេងៗខុសពីលក្ខន្តិកៈសមាគម នាំឱ្យប៉ះពាល់ដល់កិត្តិយសថ្នាក់ដឹកនាំ ៕
ចែករំលែកព័តមាននេះ