នាងស៊េរីណា វីលៀមអតីតកីឡាការិនីលំដាប់ទី១ពិភពលោកសម្តែងក្តីរីករាយជាខ្លាំងបន្ទាប់ពីបានបំបាក់កីឡាការិនីបារាំងម៉ារីយ៉ុង បាតូលីយកឈ្នះពានជើងឯកកម្មវិធីBank of the West Classicកាលពីថ្ងៃអាទិត្យទី៣១ខែកក្កដាកន្លងមកនេះ។ កម្មវិធីប្រកួតដែលមានទឹកប្រាក់សរុប៧២១ពាន់ដុល្លារនេះត្រូវបានរៀបចំធ្វើនៅទីលានប្រកួតនៃ
នាងស៊េរីណា វីលៀមអតីតកីឡាការិនីលំដាប់ទី១ពិភពលោកសម្តែងក្តីរីករាយជាខ្លាំងបន្ទាប់ពីបានបំបាក់កីឡាការិនីបារាំងម៉ារីយ៉ុង បាតូលីយកឈ្នះពានជើងឯកកម្មវិធីBank of the West Classicកាលពីថ្ងៃអាទិត្យទី៣១ខែកក្កដាកន្លងមកនេះ។ កម្មវិធីប្រកួតដែលមានទឹកប្រាក់សរុប៧២១ពាន់ដុល្លារនេះត្រូវបានរៀបចំធ្វើនៅទីលានប្រកួតនៃពហុកីឡដ្ឋានTaube Family Tennis Stadium ក្រុងស្ទែនហ្វតរដ្ឋកាលីហ្វ័រនីញ៉ា សហរដ្ឋអាមេរិក។
នាងស៊េរីណាដែលបានយកឈ្នះនាងសារ៉ាប៉ូវ៉ាក្នុងលទ្ធផល៦-១និង៦-៣កាលពីវគ្គពាក់១/៤ផ្តាច់ព្រ័ត្របានបន្តជ័យជម្នះរបស់ខ្លួនលើនាងបាតូលីក្នុងវគ្គផ្តាច់ព្រ័ត្រជាមួយលទ្ធផល២សិតផ្ទួនៗ៧-៥និង៦-១ ទទួលបានពានជើងឯកយកមកគ្រប់គ្រង។ នេះគឺជាការប្រកួតលើកទី១នៅលើទឹកដីកំណើតរបស់ខ្លួនសម្រាប់នាងស៊េរីណាចាប់តាំងពីឆ្នាំ២០០៩មក ហើយបើគិតចាប់តាំងពីប្រកួតក្នុងក្របខណ្ឌធំWimbledonឆ្នាំ២០១០ នេះគឺជាពានជើងឯកលើកទី១របស់នាងផងដែរ។ ស្ថិតនៅក្នុងវ័យ២៨ឆ្នាំ ស៊េរីណាបានយកឈ្នះពានជើងក្របខណ្ឌធំចំនួន១៣លើក ព្រមទាំងរកចំណូលបានជាង៣២លានដុល្លារអាមេរិក។ ប៉ុន្តែរយៈពេលចុងក្រោយនេះដោយសាតែរបួសជាបន្តបន្ទាប់ ធ្វើឲ្យនាងបាត់មុខស្ទើរទាំងស្រុងពីទីលានប្រកួត និងបានធ្លាក់ចំណាត់ថ្នាក់ពីលេខ១ទៅលេខ១៦៩លើលោក។ ជោគជ័យក្នុងពេលនេះគឺអាចជាការចាប់ផ្តើមជាថ្មីរបស់នាង។
ថ្លែងបន្ទាប់ពីទទួលបានជ័យជម្នះស៊េរីណាបញ្ជាក់ថា៖«ត្រឡប់មកប្រកួតសាជាថ្មី ហើយទទួលបានសម្លេងទះដៃអបអរសាទរធ្វើឲ្យខ្ញុំនឹកស្រណោះខ្លាំងណាស់។ កីឡាមិនមែនគ្រប់ៗគ្នាអាចធ្វើបាននោះទេ។ ខ្ញុំមិនដឹងថា យ៉ាងណានោះទេ ប៉ុន្តែខ្ញុំបានហ្វឹកហាត់ហ្មត់ចត់ខ្លាំងទើបទទួលបានពានជើងឯកដូចជាក្នុងពេលនេះ»។
នាងស៊េរីណាបានចេញមុខប្រកួតបានតែម្តងប៉ុណ្ណោះបន្ទាប់ពីបានវះកាត់ប្រអប់ជើងនិងដុំឈាមកកក្នុងសួត។ នាងត្រូវបានបំបាក់ដោយកីឡាការិនីបារាំងម៉ារីយ៉ុង បាតូលីក្នុងជុំទី៤នៃក្របខណ្ឌធំWimbledonខែកន្លងទៅ។ បរាជ័យនាពេលនោះបានធ្វើឲ្យចំណាត់ថ្នាក់ពិភពលោករបស់នាងធ្លាក់ទៅទី១៧៥គឺជាចំណាត់ថ្នាក់យ៉ាងទាបបំផុតគិតចាប់តាំងពីឆ្នាំ១៩៩៧មក។ ជ័យជម្នះលើកនេះអាចជាការសងសឹកមួយផងដែរទៅលើនាងបាតូលី។ មួយវិញទៀតវាក៏បានជួយឲ្យនាងឡើងទៅកាន់ចំណាត់ថ្នាក់ពិភពលោកទី៨០ផងដែរ។ នាងបាននិយាយថា៖«ខ្ញុំមិនចូលចិត្តលេខ៣ខ្ទង់នោះទេ។ឥឡូវនេះខ្ញុំមានលេខតែ២ខ្ទង់ប៉ុណ្ណោះ»។ នាងបាតូលីវិញបាននិយាយថា៖«ស៊េរីណាបានកែលំអកាន់តែល្អឡើងៗពីមួយថ្ងៃទៅមួយថ្ងៃ»។ សូមបញ្ជាក់ថាការប្រកួតរវាងនាងស៊េរីណានិងបាតូលីបានចំណាយពេលអស់២ម៉ោងនិង២២នាទី។
ព្រមពេលជាមួយគ្នានោះដែរនៅក្នុងកម្មវិធីប្រកួតមួយផ្សេងទៀតនៅរដ្ឋម៉ារីលែន សហរដ្ឋអាមេរិកដដែល កីឡាការិនីរុស្ស៊ីណាឌៀ ប៉េត្រូវ៉ាបំបាក់កីឡាការិនីអុីស្រាអែលសាហា ភៀយកឈ្នះពានជើងឯកនៃកម្មវិធីCiti Openដែលមានទឹកប្រាក់រង្វាន់សរុប២២០០០០ដុល្លារអាមេរិក។ ប៉េត្រូវ៉ាបានយកឈ្នះនាងសាហាភៀក្នុងលទ្ធផល៧-៥និង៦-២ទទួលបានពានជើងឯកWTAជាលើកទី១០នៅក្នុងអាជីព។ ថ្វីដ្បិតតែនេះជាការប្រកួតកំដៅសាច់ដុំត្រៀមក្របខណ្ឌធំUS Openក៏ដោយ ប៉ុន្តែសម្រាប់នាងប៉េត្រូវ៉ាពិតជាមានន័យខ្លាំងណាស់ដ្បិតចាប់តាំងពីឆ្នាំ២០០៨មក នេះគឺជាការឈ្នះជើងឯកលើកទី១ហើយ។ ជាមួយនឹងទឹកប្រាក់រង្វាន់៣៧០០០ដុល្លារ ប៉េត្រូវ៉ាបានថ្លែងថា៖«ខ្ញុំបានរង់ចាំពាននេះយ៉ាងអត់ធ្មត់បំផុត ហើយខ្ញុំពិតជាសប្បាយចិត្តដែលដណ្តើមបានពានលើកទី១០នេះ។ វាជាសម្មិទ្ធិផលយ៉ាងល្អមួយ»៕
ចែករំលែកព័តមាននេះ