រាជធានីភ្នំពេញ ៖ កិច្ចប្រជុំពេញអង្គលើកទី១០ នៃសាលាក្តីត្រូវបានធ្វើឡើងនៅក្នុងសាលសវនាការធំចាប់ពីថ្ងៃទី ១ ដល់ថ្ងៃទី៣ សីហា ។ ក្នុងកិច្ចប្រជុំនេះមានវត្តមានលោកចាង ហូជុង (Chang Ho Chung) ដែលជាចៅក្រមអន្តរជាតិរបស់អង្គបុរេជំនុំជម្រះ ដែលទើបត្រូវបានតែងតាំងនាពេលថ្មីៗនេះ
រាជធានីភ្នំពេញ ៖ កិច្ចប្រជុំពេញអង្គលើកទី១០ នៃសាលាក្តីត្រូវបានធ្វើឡើងនៅក្នុងសាលសវនាការធំចាប់ពីថ្ងៃទី១ ដល់ថ្ងៃទី៣ សីហា ។ ក្នុងកិច្ចប្រជុំនេះមានវត្តមានលោកចាង ហូជុង (Chang Ho Chung) ដែលជាចៅក្រមអន្តរជាតិរបស់អង្គបុរេជំនុំជម្រះ ដែលទើបត្រូវបានតែងតាំងនាពេលថ្មីៗនេះ បន្ទាប់ពីលោកត្រូវបានជ្រើសរើសដោយអគ្គលេខាធិការអង្គការសហប្រជាជាតិ និងត្រូវបានតែងតាំងដោយឧត្តមក្រុមប្រឹក្សានៃអង្គចៅក្រមកម្ពុជា ។
លោកចាង ហូ ជុង មានបទពិសោធន៍វិជ្ជាជីវៈលេចធ្លោ ក្នុងនាមជាចៅក្រមនៅសាលាដំបូង (District Court) និងតុលាការកំពូលនៃប្រទេសកូរ៉េ ព្រមទាំងមានបទពិសោធន៍បម្រើការងារទូតប្រចាំស្ថានទូតកូរ៉េផងដែរ ។ ពិធីសច្ចាប្រណិធានចូលកាន់តំណែងប្រព្រឹត្តទៅនៅចំពោះមុខកិច្ចប្រជុំពេញអង្គ បន្ទាប់ពីសុន្ទរកថារបស់លោកស្រី ចៅក្រមស៊ីលវា ខាដរ៉ាយត៍ អនុប្រធានកិច្ចប្រជុំពេញអង្គ ។
ក្នុងសុន្ទរកថាបើកកិច្ចប្រជុំបានបង្ហាញថា ចាប់តាំងពីកិច្ចប្រជុំពេញអង្គលើកចុងក្រោយនៅក្នុងខែកុម្ភៈ ឆ្នាំ២០១១ មក អ.វ.ត.ក បានធ្វើដំណើរឆ្ពោះទៅមុខ និងសម្រេចបានសមិទ្ធផលសំខាន់ៗមួយចំនួនធំ ។ ក្រោយពីការបញ្ចប់ការជំនុំជម្រះក្តីលើកទី១ របស់ អ.វ.ត.ក នៅក្នុងសំណុំរឿងកាំង ហ្កេកអ៊ាវ និងការប្រកាសសាលក្រមរបស់អង្គជំនុំជម្រះសាលាដំបូងកាលពីខែកក្កដា ឆ្នាំ២០១០ មក ភាគីពាក់ព័ន្ធបានដាក់បណ្តឹងសាទុក្ខដែលកំពុងត្រូវបានពិនិត្យពិចារណាយ៉ាងយកចិត្តទុកដាក់ដោយអង្គជំនុំជម្រះតុលាការកំពូល ។ អង្គជំនុំជម្រះតុលាការកំពូលបានបើកសវនាការជាសាធារណៈកាលពីខែមីនា ឆ្នាំ២០១១កន្លងទៅនេះ ហើយសង្ឃឹមថា សាលដីកា នឹងត្រូវប្រកាសក្នុងពេលឆាប់ៗតាមដែលអាចធ្វើទៅបាន ។
បន្ទាប់ពីការិយាល័យសហចៅក្រមសើុបអង្កេតចេញដីកាដំណោះស្រាយក្នុងសំណុំរឿង០០២ កាលពីថ្ងៃទី១៥ កញ្ញា ឆ្នាំ២០១០ ដោយអនុលោមតាមនីតិវិធីតុលាការ ភាគីពាក់ព័ន្ធបានដាក់បណ្តឹងឧទ្ធរណ៍ប្រឆាំងនឹងដីកាដំណោះស្រាយទៅអង្គជំនុំជម្រះ ។ នៅថ្ងៃទី១៣ មករា ឆ្នាំ២០១១ អង្គបុរេជំនុំជម្រះបានតម្កល់ និងកែ ប្រែដីកាដំណោះស្រាយត្រង់ផ្នែកមួយចំនួន ហើយបន្ទាប់មកបានបញ្ជូនសំណុំរឿងនេះទៅជំនុំជម្រះ ។ នៅថ្ងៃទី២៤ មិថុនា ឆ្នាំ២០១១ អង្គបុរេជំនុំជម្រះបានចេញសាលដីកាលើបណ្តឹងឧទ្ធរណ៍ចំនួន៩៤ដោយបានទទួលស្គាល់ដើមបណ្តឹងរដ្ឋប្បវេណីនៅក្នុងកិច្ចដំណើរការនីតិវិធី ។ បណ្តឹងឧទ្ធរណ៍ទាំងនេះត្រូវបានប្តឹងប្រឆាំងនឹងសេចក្តីសម្រេចរបស់សហចៅក្រមសើុបអង្កេតលើពាក្យសុំតាំងខ្លួនជាដើមបណ្តឹងរដ្ឋប្បវេណីចំនួន១.៧៤៧ពាក្យសុំ ។ អង្គបុរេជំនុំជម្រះបានសម្រេចទទួលយកបណ្តឹងឧទ្ធរណ៍ទាំងនេះ ហើយបានទទួលស្គាល់ឋានៈដើមបណ្តឹងរដ្ឋប្បវេណីនៅក្នុងសំណុំរឿង០០២ ចំនួន៩៨% ក្នុងចំណោមអ្នកដាក់ពាក្យសុំចំនួន១.៧៤៧នាក់ ។ នាពេលបច្ចុប្បន្ន អង្គជំនុំជម្រះសាលាដំបូងកំពុងតែរៀបចំការចាប់ផ្តើមការជំនុំជម្រះក្តីលើសំណុំរឿង០០២ នេះ ។ កាលពីថ្ងៃទី ៤ ដល់ថ្ងៃទី៥ មេសា ឆ្នាំ ២០១១ កន្លងទៅនេះ អង្គជំនុំជម្រះសាលាដំបូងបានរៀបចំកិច្ចប្រជុំរៀបចំសវនាការជាអសាធារណៈមួយ ព្រមទាំងសវនាការបឋមចាប់ពីថ្ងៃទី២៧ ដល់ថ្ងៃទី៣០ មិថុនា ឆ្នាំ២០១១ ថ្មីៗនេះ ។ សវនាការបឋមនេះ បានដេញដោលលើអញ្ញត្រកម្មស្តីពីបញ្ហានានា រួមមានការលើកលែងទោស និងការអនុគ្រោះទោស និងអាជ្ញាយុកាលពាក់ព័ន្ធនឹងបទល្មើសនានា ដូចមានចែងនៅក្នុងក្រមព្រហ្មទណ្ឌជាតិដែលពាក់ព័ន្ធ ។ អ.វ.ត.ក រំពឹងថា ការជំនុំជម្រះលើរឿងក្តីបន្ទាប់ នឹងចាប់ផ្តើមនៅចុងឆ្នាំនេះ ដែលសំណុំរឿងនេះនឹងមានការប្រឈមមុខជាក់ស្តែង និងបញ្ហាគតិយុត្តិស្មុគស្មាញមួយចំនួន៕
ចែករំលែកព័តមាននេះ