សង្គ្រាមអ៉ីរ៉ង់ ៖ ប្រទេសអ៉ីរ៉ង់ កាលពីថ្ងៃទី១៧ មេសា បានបដិសេធថា មិនបានយល់ព្រមផ្ទេរអ៊ុយរ៉ានីញ៉ូមចម្រាញ់របស់ខ្លួនទៅឲ្យនរណាឡើយ បន្ទាប់ពីសេចក្ដីថ្លែងការណ៍របស់ប្រធានាធិបតីអាមេរិក លោកដូណាល់ត្រាំ អំពីរឿងផ្ទេរនោះ…
សង្គ្រាមអ៉ីរ៉ង់ ៖ ប្រទេសអ៉ីរ៉ង់ កាលពីថ្ងៃទី១៧ មេសា បានបដិសេធថា មិនបានយល់ព្រមផ្ទេរអ៊ុយ
រ៉ានីញ៉ូមចម្រាញ់របស់ខ្លួនទៅឲ្យនរណាឡើយ បន្ទាប់ពីសេចក្ដីថ្លែងការណ៍របស់ប្រធានាធិបតីអាមេរិក លោកដូណាល់ត្រាំ អំពីរឿងផ្ទេរនោះ ដែលជាចំណុចសំខាន់មួយរបស់ប្រទេសជាសត្រូវគ្នាទាំង២នេះ។
អ្នកនាំពាក្យក្រសួងការបរទេសអ៉ីរ៉ង់លោកអេស្មាអ៊ីលបាក់ហៃអ៉ី ថ្លែងតាមទូរទស្សន៍រដ្ឋថា អ៊ុយរ៉ានីញ៉ូមចម្រាញ់របស់អ៉ីរ៉ង់នឹងមិនផ្ទេរទៅណាឡើយ។ ដូចដែនដីអ៉ីរ៉ង់ជាដែនដីពិសិដ្ឋចំពោះភ្នែកយើងដែរ បញ្ហាអ៊ុយរ៉ានីញ៉ូមចម្រាញ់នោះ មានសារសំខាន់ធំធេងណាស់សម្រាប់យើង។
មុននេះ ប្រធានាធិបតីអាមេរិកលោកដូណាល់ត្រាំអះអាងថា អ៉ីរ៉ង់ព្រមបោះបង់អ៊ុយរ៉ានីញ៉ូមចម្រាញ់របស់ខ្លួន ដែលនោះជាការទាមទារមួយក្នុងចំណោមការទាមទាររបស់អាមេរិក ដើម្បីស្វែងរកកិច្ចព្រមព្រៀងមួយជាមួយអ៉ីរ៉ង់។
កាលពីថ្ងៃទី១៦ មេសា ប្រធានាធិបតីអាមេរិកធ្លាប់បានថ្លែងថា អ៉ីរ៉ង់ព្រមប្រគល់ធូលីនុយក្លេអ៊ែរ ដោយចង់និយាយយោងដល់អ៊ុយរ៉ានីញ៉ូមចម្រាញ់កម្រិតខ្ពស់ដែលអ៉ីរ៉ង់កំពុងមាន មុនអះអាងជាថ្មីនាថ្ងៃទី១៧ មេសា ថា បញ្ហានោះលែងជាបញ្ហានៃការរាំងខ្ទប់សម្រាប់ចុះហត្ថលេខាលើកិច្ចព្រមព្រៀងមួយឡើយ។
ការខ្វែងគំនិតគ្នានោះ កើតមានពេលប៉ាគីស្ថានជាអាជ្ញាកណ្ដាលខិតខំប្រឹងប្រែង ដើម្បីឲ្យមានការចរចាលើកទី២ រវាងអាមេរិក និងអ៉ីរ៉ង់ ក្រោយបរាជ័យនៃការចរចាដំបូងនៅក្រុងអ៉ីស្លាម៉ាបាដ កាលពីសប្ដាហ៍កន្លងទៅ ដើម្បីឲ្យសម្រេចបានការបញ្ចប់សង្គ្រាមជាស្ថាពរ៕
ចែករំលែកព័តមាននេះ