ទីក្រុងវ៉ាស៊ីនតោន៖ ធ្មេចបើកៗ បទឈប់បាញ់រវាងអ៊ីរ៉ង់ និងអាមេរិករយៈពេល២សប្ដាហ៍នោះជិតឈានដល់ទីបញ្ចប់ហើយ។ ប្រសិនបើគ្មានអ្វីប្រែប្រួលទេ សង្គ្រាមអាចនឹងផ្ទុះឡើងសាជាថ្មី។ ការចរចាគ្នាក៏មិនទាន់មានសញ្ញាថាអាចនឹងមានដំណោះស្រាយនាពេលឆាប់ៗនេះនៅឡើយដែរ។ គេហទំព័រអាក់សឺស (Axios) ចុះផ្សាយថាលោកដូណាល់ត្រាំកាលពីយប់មិញបានកោះប្រជុំនៅ…
ទីក្រុងវ៉ាស៊ីនតោន៖ ធ្មេចបើកៗ បទឈប់បាញ់រវាងអ៊ីរ៉ង់ និងអាមេរិករយៈពេល២សប្ដាហ៍នោះជិតឈានដល់ទីបញ្ចប់ហើយ។ ប្រសិនបើគ្មានអ្វីប្រែប្រួលទេ សង្គ្រាមអាចនឹងផ្ទុះឡើងសាជាថ្មី។ ការចរចាគ្នាក៏មិនទាន់មានសញ្ញាថាអាចនឹងមានដំណោះស្រាយនាពេលឆាប់ៗនេះនៅឡើយដែរ។ គេហទំព័រអាក់សឺស (Axios) ចុះផ្សាយថាលោកដូណាល់ត្រាំកាលពីយប់មិញបានកោះប្រជុំនៅ «បន្ទប់ស្ថានការណ៍» នៃសេតវិមានជាមួយមន្ត្រីកំពូលៗរបស់លោក។
រហូតមកដល់ពេលនេះ ភាគីទាំង២មិនទាន់កំណត់ពេលវេលាដើម្បីជួបចរចាគ្នាជាថ្មីទេ។ មន្ត្រីជាន់ខ្ពស់អាមេរិកម្នាក់សម្ដែងការព្រួយបារម្ភថាប្រសិនបើគ្មានការរីកចម្រើនទៅមុខទេ សង្គ្រាមអាចនឹងផ្ទុះឡើងនៅក្នុងរយៈពេលប៉ុន្មានខាងមុខនេះ។ ទីភ្នាក់ងារព័ត៌មានរ៉យទ័ររាយការណ៍ថាប្រធានរដ្ឋសភាអ៊ីរ៉ង់ លោកបាហ្គើ ហ្កាលីបាហ្វ (Bagher Ghalibaf) ថ្លែងថាការចរចាជាមួយអាមេរិករីកចម្រើនទៅមុខ។ ប៉ុន្តែនៅមានកិច្ចការជាច្រើនទៀតដែលត្រូវធ្វើ។
ឆ្មាំបដិវត្តឥស្លាមរបស់អ៊ីរ៉ង់ចោទប្រកាន់ថាអាមេរិកបានប្រព្រឹត្តល្មើសនឹងលក្ខខណ្ឌនៃបទឈប់បាញ់។ ពួកគេចោទថាអាមេរិកក្បត់ពាក្យសន្យា និងបន្តបិទខ្ទប់កំពង់ផែរបស់អ៊ីរ៉ង់មិនឱ្យកប៉ាល់ចេញចូលបានឡើយ។ ហេតុនេះពួកគេ (អ៊ីរ៉ង់) ត្រូវតែបិទខ្ទប់ច្រកសមុទ្រហ័រម៉ូសឡើងវិញ។ កាលពីម្សិលមិញ មានសេចក្ដីរាយការណ៍ថាយោធាអ៊ីរ៉ង់បាញ់ឆេះកប៉ាល់២គ្រឿងដែលបើកកាត់ច្រកសមុទ្រនោះ។ ឥឡូវនេះបញ្ហាចម្រូងចម្រាសនៅត្រង់ថាលោកត្រាំសន្យាបិទបញ្ចប់ការបិទខ្ទប់ដែនសមុទ្រអ៊ីរ៉ង់លុះត្រាភាគីទាំង២សម្រេចបានកិច្ចព្រមព្រៀងសន្តិភាពជាមួយគ្នាជាមុនសិន។
ចំណែកអ៊ីរ៉ង់ថាបើអាមេរិកនៅតែបន្តបិទដែនសមុទ្រខ្លួន ខ្លួនក៏នៅតែបន្តបិទច្រកសមុទ្រហ័រម៉ូស។ សារព័ត៌មានវ៉លស្ទ្រីតជើណល (Wall Street Journal) បានដកស្រង់ប្រភពពីមន្ត្រីរដ្ឋាភិបាលអាមេរិកជាច្រើនរូបមកផ្សាយថាយោធាអាមេរិកត្រៀមបញ្ជូនកម្លាំងទៅបញ្ឈប់នាវាដឹកប្រេងដែលមានទំនាក់ទំនងជាមួយអ៊ីរ៉ង់ ហើយនឹងរឹបអូសកប៉ាល់ដឹកទំនិញនៅមជ្ឈិមបូព៌ា និងនៅលើដែនសមុទ្រអន្តរជាតិ។ នេះជាផ្នែកមួយនៃការដាក់សម្ពាធលើអ៊ីរ៉ង់ដើម្បីបង្ខំឱ្យបើកច្រកហ័រម៉ូស និងធ្វើសម្បទាននៅក្នុងបញ្ហានុយក្លេអ៊ែរ៕ ប្រភព៖ អឹនអេចខេ (NHK) និងប្រភពដទៃទៀត
ចែករំលែកព័តមាននេះ