ខេត្តប៉ៃលិន ៖ ស្ត្រីមានផ្ទៃពោះជិតសំរាលកូនម្នាក់ ស្ទើរតែចូលទៅមន្ទីរពេទ្យមិនទាន់ពេល តែសំណាងល្អបានរួចផុតទុក្ខភ័យដោយក្រុមការងាររដ្ឋបាលខេត្តសហការជាមួយនឹងគ្រូពេទ្យចុះទៅជួយសង្គ្រោះទាន់ពេល ទើបសុខសប្បាយទាំងកូន និងម្តាយ ខណ:ដែលស្ត្រីរងគ្រោះឈឺពោះរៀបនឹងសម្រាល ហើយត្រូវប្តីដឹកតាមម៉ូតូយកទៅមន្ទីរពេទ្យបង្អែកខេត្ត តែមកមិនទាន់។
ហេតុការណ៍ស្ត្រីមានផ្ទៃពោះឈឺសម្រាលតាមផ្លូវនេះ កើតឡើងកាលពីវេលារសៀលថ្ងៃទី១៨ ខែមេសា ឆ្នាំ២០២៦ ត្រង់ចំណុចខាងមុខហាងកាហ្វេមួយកន្កែង ដែលស្ថិតនៅតាមបណ្តោយផ្លូវជាតិលេខ៥៧ សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ។
បើតាមប្រភពព័ត៌មានពីលោក លី មករា ប្រធានមន្ទីរពេទ្យបង្អែកខេត្តប៉ៃលិន បានរៀបរាប់ឱ្យដឹងថា ក្រោមការណែនាំចង្អុលបង្ហាញដ៍ខ្ពង់ខ្ពស់ពីលោកជំទាវបណ្ឌិត បាន ស្រីមុំ អភិបាលនៃគណៈអភិបាលខេត្តប៉ៃលិន បានណែនាំឱ្យលោកគ្រូ និងអ្នកគ្រូពេទ្យទាំងអស់ មើលថែទាំអ្នកជម្ងឺដោយយកចិត្តទុកដាក់បំផុត ពោលគឺមិនប្រកាន់វណ្ណ: និន្នាការនយោយបាយអ្វីឡើយ ដោយត្រូវអនុវត្តការងារប្រកាន់ខ្ជាប់នូវក្រមសីលធម៌វិជ្ជាជីវ:គ្រូពេទ្យ ។
លោកបានបន្តថា ដូចក្នុងករណីខាងលើ ក្រោយពីបានទទួលទូរស័ព្ទបន្ទាន់មួយពីប្រជាពលរដ្ឋ ទើបក្រុមគ្រូពេទ្យ ចុះទៅជួយសង្គ្រោះខណៈដែលពេលនោះ គឺស្ថិតនៅក្រោមកំដៅថ្ងៃដ៏ក្តៅខ្លាំង អ្នកគ្រូពេទ្យ លី សុខលីន ជាបុគ្គលិកផ្នែកសម្ភពនៃមន្ទីរពេទ្យបង្អែកខេត្តប៉ៃលិន បានធ្វើការសង្គ្រោះជូនចំពោះស្ត្រីឈ្មោះ ប្រាក់ នៅ អាយុ៤១ឆ្នាំ រស់នៅភូមិអណ្តូងថ្ម ឃុំស្ទឹងកាច់ ស្រុកសាលាក្រៅ ខេត្តប៉ៃលិន ដែលមានផ្ទៃពោះកូនទី៦ ខណៈគ្រួសារព្យាយាមបញ្ជូនមកកាន់មន្ទីរពេទ្យបង្អែកខេត្តប៉ៃលិន តាមម៉ូតូផ្ទាល់ខ្លួន ។ តែដោយសារឈឺពោះខ្លាំង ហើយក៏សម្រាលកូននៅតាមផ្លូវតែម្តង ។ តែត្រូវបានក្រុមគ្រូពេទ្យជួយសង្គ្រោះ បានជោគជ័យ និងត្រូវបានបញ្ជូនម្តាយ និងទារកដែលមានទំងន់២គីឡូ៩ខាំ មកដល់មន្ទីរពេទ្យបង្អែកខេត្តប៉ៃលិន ដោយសុខសុវត្ថិភាព និងមានសុខភាពល្អ។
ទោះបីជាយ៉ាងណាក៏ដោយ ក្រោមការដឹកនាំដែលមានព្រហ្មវិហាធម៌របស់លោកជំទាវ បាន ស្រីមុំ អភិបាលខេត្តប៉ៃលិន សកម្មភាពទាំងនេះស្តែង និងបង្ហាញនូវស្មារតីទទួលខុសត្រូវខ្ពស់ក្នុងនាមជាបុគ្គលិកសុខាភិបាលដែលមានចំណេះដឹង ជំនាញ បទពិសោធន៍ និងជាគំរូដ៏ល្អមួយ បង្ហាញថា ទាំងអស់គ្នាដែលតែងតែនៅក្បែរ និងជួយសង្គ្រោះប្រជាពលរដ្ឋគ្រប់ពេលវេលា និងគ្រប់កាលៈទេសៈ មិនមាននរណាម្នាក់ ត្រូវបានទុកចោលនោះទេ។
ជាមួយគ្នារដ្ឋបាលខេត្តប៉ៃលិន ក៍សូមអំពាវនាវដល់បងប្អូនប្រជាពលរដ្ឋទាំងអស់ បើជួបទុក្ខលំបាកឬជួបគ្រោះអាសន្នណាមួយសូមទំនាក់ទំនងទៅក្រុមការងារយុវជនស្ម័គ្រចិត្ត និងរថយន្តសង្គ្រោះបន្ទាន់របស់រដ្ឋបាលខេត្ត ដើម្បីជួយសង្ក្រោះទាន់ពេលវេលា៕
ចែករំលែកព័តមាននេះ