រាជធានីភ្នំពេញ ៖ ជនសង្ស័យម្នាក់ បានធ្វើសកម្មភាពលួចម៉ូតូម៉ាកហុងដាឌ្រីមសេ១២៥ មួយគ្រឿង ដែលជារបស់យុវជនជាងសំណង់ម្នាក់នៅឯខេត្តព្រះសីហនុ រួចបានទិញអយស្ទ័រ ១កេស ដឹកពីក្រោយជិះគេចខ្លួនយ៉ាងខែងរ៉ែង ដែលទំនងជាគិតថា លួចបានសម្រេចនិងស៊ីផឹកឲ្យអស់ដៃម្ដង។ ជនសង្ស័យរូបនោះ បានជិះគេចខ្លួនតាមផ្លូវជាតិលេខ៣ បានឆ្លងកាត់តាមបណ្ដាខេត្តនានា មានដូចជាខេត្តកំពត ខេត្តតាកែវ ខេត្តកំពង់ស្ពឺ និងខេត្តកណ្ដាល លុះចូលដល់រាជធានីភ្នំពេញ ក៏ត្រូវបានអស់លក្ខណ៍។ ដោយត្រូវបានកម្លាំងអធិការដ្ឋានក្រុងព្រះសីហនុ ដេញតាមប្រមាញ់តាមរយៈប្រព័ន្ធតាមដានសុវត្ថិភាព GPS រួចបានសហការណ៍ជាមួយកម្លាំងប៉ុស្តិ៍នគរបាលរដ្ឋបាលចោមចៅទី៣ នៃអធិការដ្ឋាននគរបាលខណ្ឌពោធិ៍សែនជ័យ ស្ទាក់ឃាត់បានទាំងមនុស្ស និងម៉ូតូ តែម្ដង ។
ហេតុការណ៍បាត់ម៉ូតូនោះ បានកើតឡើងបង្កឲ្យមានការភ្ញាក់ផ្អើលនៅវេលាម៉ោង១១ព្រឹក ថ្ងៃទី១៤ ខែកក្កដា ឆ្នាំ២០២៦ នៅក្នុងការដ្ឋានសំណង់មួយកន្លែង ដែលមានទីតាំងស្ថិតនៅក្រុមទី៨ ភូមិ១ សង្កាត់លេខ៣ ក្រុងព្រះសីហនុ ខេត្តព្រះសីហនុ ។
ជនសង្ស័យខាងលើនោះឈ្មោះ ហេង ឈុនហាក់ ភេទប្រុស អាយុ៣៨ឆ្នាំ មានស្រុកកំណើតនៅស្រុកមេមត់ ខេត្តត្បូងឃ្មុំ ហើយមុនពេលត្រូវចាប់ខ្លួនជននេះ បានដើរតែស្នាក់នៅមិនប្រាកដប្រជាកន្លែងណាមួយនោះឡើយ ។
នគរបាល បានដកហូតវត្ថុតាងមួយចំនួនពីជនសង្ស័យរូបនោះ រួមមាន ឧបករណ៍សម្រាប់កាច់សោកម៉ូតូ, កាបូបលុយ, ទូរសព្ទ ២គ្រឿង ព្រមទាំងម៉ូតូដែលលួចបានម៉ាកហុងដាឌ្រីមសេ១២៥ ផលិតឆ្នាំ២០២៦ ពណ៍ខ្មៅ ពាក់ស្លាកលេខភ្នំពេញ 1MA-1297 និងអយស្ទ័រ ១កេសផងដែរ ។
ដោយឡែក យុវជនដែលជាម្ចាស់ម៉ូតូឈ្មោះផុន កុសល អាយុ២១ឆ្នាំ មុខរបរកម្មករសំណង់ មានទីលំនៅក្រុមទី១ ភូមិ១ សង្កាត់លេខ៣ ក្រុងព្រះសីហនុ ខេត្តព្រះសីហនុ ។
ជាងសំណង់រូបនេះ បាននិយាយប្រាប់នគរបាលថា នៅវេលាម៉ោង៧និង១០នាទីព្រឹកថ្ងៃកើតហេតុ ខ្លួនបានជិះម៉ូតូ ១គ្រឿង ខាងលើចេញពីផ្ទះទៅធ្វើការនៅការដ្ឋានសំណង់កើតហេតុនោះ ។ លុះពេលទៅដល់ ខ្លួនបានទុកម៉ូតូនៅត្រង់ចំណុចមុខរោងកម្មករស្នាក់នៅដោយបានចាក់សោកត្រឹមត្រូវ ប៉ុន្តែអត់បានបិទសន្ទះសុវត្ថិភាពសោម៉ូតូនោះឡើយ រួចក៏ដើរទៅធ្វើការដូចសព្វមួយដង មិនបានគិតថាមានចោរលួចម៉ូតូនោះទេ ។
យុវជន ផុន កុសល បានរៀបរាប់ប្រាប់នគរបាលបន្តទៀតថា រហូតដល់វេលាម៉ោង១១ព្រឹកថ្ងៃកើតហេតុ ដដែល ខណៈដល់ម៉ោងសម្រាកចេញពីធ្វើការហូបបាយថ្ងៃត្រង់ ដើរទៅកន្លែងទុកម៉ូតូ ដើម្បីយកជិះទៅរកទិញបាយហូប។ ស្រាប់តែអត់ឃើញ ត្រូវចោរលួចបាត់ ក៏មានការភ្ញាក់ផ្អើលឆោឡោ ហើយខ្លួនក៏បានទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលសង្កាត់លេខ៣ ក្រុងព្រះសីហនុ ដើម្បីឲ្យនគរបាលជួយអន្តរាគមន៍ភ្លាមៗ ។
នគរបាលបានប្រាប់ថា ក្រោយទទួលបានបណ្ដឹងជនរងគ្រោះ កម្លាំងប៉ុស្តិ៍នគរបាលរដ្ឋបាលសង្កាត់លេខ៣ និងកម្លាំងអធិការដ្ឋានក្រុងព្រះសីហនុ បានធ្វើការស្រាវជ្រាវតាមប្រព័ន្ធតាមដានសុវត្ថិភាព GPS ដែលបានបំពាក់ជាមួយម៉ូតូខាងលើ ។ ខណៈនោះ ប្រព័ន្ធGPS បានចង្អុលបង្ហាញប្រាប់ទិសដៅជនសង្ស័យកំពុងជិះចូលរាជធានីភ្នំពេញ ទើបនគរបាលខាងលើទាក់ទងមកកាន់កម្លាំងប៉ុស្តិ៍នគរបាលរដ្ឋបាលចោមចៅទី៣ នៃអធិការដ្ឋាននគរបាលខណ្ឌពោធិ៍សែនជ័យ ឲ្យជួយស្ទាក់ ។
នគរបាល បានបញ្ជាក់ប្រាប់បន្ថែមថា រហូតដល់វេលាម៉ោង១រសៀលថ្ងៃខែឆ្នាំដដែល បានឃើញជនសង្ស័យជិះម៉ូតូខាងលើតាមផ្លូវជាតិលេខ៣ និងចូលទៅតាមផ្លូវបេតុង ស្ថិតនៅក្នុងភូមិព្រៃព្រីងជើង១ សង្កាត់ចោមចៅទី៣ នគរបាលក៏បានឃាត់ខ្លួនតែម្ដង ។ បន្ទាប់មក ក៏បានប្រគល់ទាំងជនសង្ស័យ និងវត្ថុតាងទៅឲ្យកម្លាំងប៉ុស្តិ៍នគរបាលរដ្ឋបាលសង្កាត់លេខ៣ និងកម្លាំងអធិការដ្ឋាននគរបាលក្រុងព្រះសីហនុ ដើម្បីធ្វើការសាកសួរ និងកសាងសំណុំរឿងបញ្ជូនទៅកាន់សាលាដំបូងខេត្តព្រះសីហនុ ចាត់ការតាមច្បាប់ ៕
ចែករំលែកព័តមាននេះ