រាជធានីភ្នំពេញ ៖ បុរសជនជាតិចិន២នាក់ ជាប់ចោទចូលទៅលួចលុយនៅក្នុងឃ្លាំងទំនិញរបស់ជនជាតិចិនដូចគ្នា អស់ចំនួន៣ម៉ឺនដុល្លារ ព្រមទាំងទូរសព្ទដៃ និងកុំព្យូទ័រផង ក៏ត្រូវបានម្ចាស់ឃ្លាំង ធ្វើការឃាត់ខ្លួនបាន រួចប្រគល់ឲ្យនគរបាលនាំទៅសាកសួរ និងចាត់ការតាមច្បាប់តែម្ដង ។
ហេតុការណ៍ខាងលើនោះបានកើតឡើងនៅវេលាម៉ោង១១និង៥០នាទីថ្ងៃត្រង់ថ្ងៃទី១៤ ខែកក្កដា ឆ្នាំ២០២៦ នៅចំណុចឃ្លាំងគ្មានលេខ ស្ថិតនៅក្នុងភូមិព្រៃជីសាក់ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
ជនសង្ស័យ ទី១.ឈ្មោះ លិញ ចែវហួយ ភេទប្រុស អាយុ៣០ឆ្នាំ ទី២.ឈ្មោះ LIN JINLAI ភេទប្រុស អាយុ៥២ឆ្នាំ ជនសង្ស័យទាំង២នាក់នោះ ជាជនជាតិចិន មានមុខរបរជាអ្នកដឹកជញ្ជូន មានទីលំនៅភូមិអូរបែកក្អម សង្កាត់អូរបែកក្អម ខណ្ឌសែនសុខ រាជធានីភ្នំពេញ ។
ដោយឡែកម្ចាស់ឃ្លាំងឈ្មោះ ZHANG SENLIN ភេទប្រុស អាយុ ៣៦ឆ្នាំ ជនជាតិចិន មានទីលំនៅភូមិព្រៃជីសាក់ សង្កាត់ចោមចៅទី៣ ខណ្ឌពោធិ៍សែនជ័យ ។ បាត់បង់កុំព្យូទ័រចំនួន០២គ្រឿង. ទូរសព្ទម៉ាក HONOR ពណ៌ខ្មៅគ្មានស៊ីមកាត១គ្រឿង និងប្រាក់ចំនួន៣០,០០០$ (បីម៉ឺនដុល្លារអាមេរិក) ។ ហើយដកហូតមកវិញបានតែកុំព្យូទ័រចំនួន០២គ្រឿង និងទូរសព្ទម៉ាក HONOR ១គ្រឿងប៉ុណ្ណោះ មិនឃើញមានប្រាក់ចំនួន៣ម៉ឺនដុល្លារ នោះឡើយ ។
សមត្ថកិច្ចបានប្រាប់ឲ្យដឹងថា នៅមុនពេលកើតហេតុ ជនជាតិចិន ដែលជាម្ចាស់ឃ្លាំងទំនិញនោះ បានជិះរថយន្ត ១គ្រឿង ទៅកាន់ស្ថានទូតចិន លុះពេលទៅដល់ ស្រាប់តែមានមិត្តភក្តិទូរសព្ទប្រាប់ថា មានគេចូលយកអីវ៉ាន់នៅឃ្លាំងរបស់គាត់ហើយ ។ ភ្លាមនោះគាត់(ជនរងគ្រោះ) ក៏ប្រញាប់ត្រលប់មកមើលឃ្លាំងរបស់ខ្លួនវិញ ហើយបានឃើញជនសង្ស័យទាំង០២នាក់ខាងលើ កំពុងដោះកង្ហារទូរទឹកកក ខណៈនោះគាត់ក៏ហៅជនសង្ស័យទាំង០២នាក់ចូលក្នុងបន្ទប់ការិយាល័យដើម្បីសួរនាំ ។
សមត្ថកិច្ច បានប្រាប់ឲ្យដឹងបន្តទៀតថា ពេលចូលដល់ក្នុងបន្ទប់ការិយាល័យ ស្រាប់តែបាត់កុំព្យូទ័ររបស់ខ្លួន ចំនួន០២គ្រឿង រួចហើយឃើញជនសង្ស័យឈ្មោះ លិញ ចែវហួយ លាក់ទូរសព្ទរបស់គាត់ម៉ាកHONOR នៅខាងក្រោយខ្នង ដែលទូរសព្ទនោះគាត់បានទុកនៅក្នុងថតតុក្នុងបន្ទប់ ។ បន្ទាប់មកគាត់(ជនរងគ្រោះ)ក៏បានយកទូរសព្ទនោះមកវិញ ហើយបើកថតតុមើលស្រាប់តែបាត់លុយអស់ចំនួន៣០,០០០$ (បីម៉ឺនដុល្លារអាមេរិកគត់) ដែលគាត់បានទុកនៅក្នុងថតតុនោះ ហើយគាត់ក៏សួរដេញដោល ជនសង្ស័យ ។
សមត្ថកិច្ច បានប្រាប់ឲ្យដឹងបន្ថែមថា ខណៈនោះជនសង្ស័យទាំង០២នាក់ បានព្យាយាមដើរចេញទៅខាងក្រៅ ក៏ត្រូវម្ចាស់ឃ្លាំងរូបនោះឃាត់ខ្លួន រួចរាយការណ៍ទៅកម្លាំងប៉ុស្តិ៍នគរបាលរដ្ឋបាលចោមចៅទី៣ ឲ្យចុះទៅនាំយកជនសង្ស័យទាំង២នាក់នោះ ដើម្បីធ្វើការសាកសួរនិងចាត់ការតាមច្បាប់តែម្តង ៕
ចែករំលែកព័តមាននេះ