រាជធានីភ្នំពេញ ៖ សភាព្រហ្មទណ្ឌសាលាឧទ្ធរណ៍ភ្នំពេញ កាលពីព្រឹកថ្ងៃទី១៤ ខែកក្កដា ឆ្នាំ២០២៦ គ្រោងនិងបើកសវនាការសួរដេញ លើបណ្តឹងឧទ្ធរណ៍របស់ជនជាប់ចោទ គឺលោក វ៉ាន់ កុសល អតីតផ្កាយ២ អនុប្រធានមន្ទីរប្រឆាំងគ្រឿងញៀន និងកូនចៅ ៤នាក់ ដែលកើតទុកមិនសុខចិត្ត ចំពោះសាលក្រមសាលាដំបូងរាជធានីភ្នំពេញ បានផ្តន្ទាទោសរូបលោក និងកូនចៅដាក់ពន្ធនាគារ ដោយមានស្ថានទម្ងន់យ៉ាងធ្ងន់ធ្ងរបំផុត ដែលមិនអាចទទួលយកបាន។ ប៉ុន្តែគម្រោងការសវនាការជំនុំជម្រះក្តីនោះ ត្រូវបានលើកពេល ទៅថ្ងៃក្រោយដោយមិនកំណត់ មូលហេតុមេវីការពារក្តីសុំលើកពេល ដូច្នោះជនជាប់ចោទ ដែលជាដើមបណ្តឹងឧទ្ធរណ៍ ត្រូវបានអនុរក្សពន្ធនាគារ ដឹកយកទៅឃុំខ្លួនកន្លែងដើមវិញ ។
សូមជម្រាបថា កាលពីថ្ងៃទី១៨ ខែកញ្ញា ឆ្នាំ២០២៥ លោក ស សំណាង ប្រធានក្រុមប្រឹក្សាជំនុំជម្រះ នៃសាលាដំបូងរាជធានីភ្នំពេញ បានប្រកាសសាលក្រមផ្តន្ទាទោស លើជនជាប់ចោទ ៖
១. លោក វ៉ាន់ កុសល អាយុ៦០ឆ្នាំ អតីតផ្កាយ២ អនុប្រធានមន្ទីរប្រឆាំងបទល្មើសគ្រឿងញៀន ដាក់ពន្ធនាគារកំណត់១៧ឆ្នាំ ពីបទ.ចាប់ និងបង្ខាំងដោយខុសច្បាប់ មានស្ថានទម្ងន់ទោស (ជំរិតយកប្រាក់) និងបទសម្អាតប្រាក់ ។
២. ផ្តន្ទាទោស ឈ្មោះ ជួន លឹមហេង ភេទប្រុស អាយុ៣៣ឆ្នាំ
៣. ឈ្មោះ អុន សំអូន ភេទប្រុស អាយុ៤៦ ឆ្នាំ
៤. ឈ្មោះ នេត សុខុម ភេទប្រុស អាយុ៤៤ ឆ្នាំ
៥. ឈ្មោះ ឈាវ ស៉ីដេត ភេទប្រុស អាយុ៤៨ ឆ្នាំ ដាក់ពន្ធនាគារម្នាក់ៗកំណត់១៥ឆ្នាំ ពីបទចាប់ និងបង្ខាំង ដោយខុសច្បាប់មានស្ថានទម្ងន់ទោស (ជំរិតយកប្រាក់) ចំនួន៣ករណីប្រព្រឹត្តនៅរាជធានីភ្នំពេញ កាលពីថ្ងៃទី១៦ ខែតុលា ឆ្នាំ២០២៣ តាមមាត្រា២៥៤ កថាខណ្ឌទី១ ចំណុច៣ នៃក្រមព្រហ្មទណ្ឌ ។
ក្រោយពីសាលក្រមសាលាដំបូងរាជធានីភ្នំពេញ បានប្រកាសផ្តន្ទាទោសលើជនជាប់ចោទយ៉ាងដូច្នេះហើយជនជាប់ចោទទាំង ៥នាក់ ទាំងមេទាំងកូនចៅ កើតទុកមិនសុខចិត្តចំពោះការសម្រេចក្តីនេះ ក៏បានដាក់ពាក្យប្តឹងឧទ្ធរណ៍ តាមកំណត់ច្បាប់ ទើបថ្ងៃទី១៤ ខែកក្កដា ឆ្នាំ២០២៦នេះ សភាព្រហ្មទណ្ឌសាលាឧទ្ធរណ៍ភ្នំពេញ គ្រោងនឹងលើកយកបណ្តឹងឧទ្ធរណ៍នេះ មកបើកសវនាការជំនុំជម្រះក្តី ប៉ុន្តែត្រូវបានមេធាវីស្នើសុំលើកពេល ។ អង្គហេតុពាក់ពន្ធសំណុំរឿងទាំងមូល សូមតាមដាននៅលើគេហទំព័រកាសែតកោះសន្តិភាព ៕
ចែករំលែកព័តមាននេះ